祥哥喺尖沙咀嘅南貨鋪,專賣大閘蟹、金華火腿等食材,今鋪「大閘蟹」早春應市。(歐陽江攝) 

中環人語

頂角樓蟹提早應市

Ads by Google

春天還未完,有排先等到有大閘蟹應市。喺尖沙咀賣南貨嘅紹萬有南貨士多店老闆許金祥,率先做咗「樓蟹」。

 

話說祥哥係恒基粉絲,樓市仍未煲起時,經常幫襯四叔買新盤投資,好似仁安醫院附近名家匯、比華利山、德成軒等等,皆因四叔旗下有財仔造埋二按扶祥哥上車,估唔到當日粉絲變債仔,祥哥遭恒基旗下財仔入稟追債,就係幾年前借落嘅德成軒按揭及比華利山二按貸款;順德佬一向講人情,四叔搞到搵胡關李羅入稟追債,無橋啦,祥哥手頭物業仲向幾間財仔借咗錢,搶先入稟無蝕底嘅。早兩個月,祥哥已遭獅子銀行和另一財仔入稟訴訟按揭,近呢七、八年,祥哥入咗成三十件貨;大部分短揸獲利,辣招殺到,難以貨如輪轉,睇嚟呢隻「樓蟹」,頂晒角咁肥美矣!

李光耀遺願拆屋


李光耀故居,擺設簡單、樸素。 

新加坡國父李光耀上月尾去世,近日佢二仔李顯揚公開部分李光耀遺囑內容。遺囑係兩年前訂立,原來佢堅持要將住咗七十幾年嘅大宅拆毀。李光耀生前同屋企人住喺當地 Oxley Road 38號,內裡有五間房,裝修簡陋,地下室正是人民行動黨嘅創黨基地。拆屋係咪李氏想重建賺錢?新加坡唔似得香港,佢拆屋係希望可以解禁附近一帶嘅建屋限制,提升土地價值。因為先前附近一帶嘅樓,都不能起高過李光耀大宅,免得佢一舉一動被睇晒,洩露「國家機密」。佢認為兒女不會抱怨房子被拆,因有舊照片讓他們緬懷過去。又係嘅,有政績,人民一世都懷念你,唔使四處豎碑立狀嘅。

中環寸嘴 鬧得有道理

工廈大王楊耀松長子,是各大有名食肆之 VIP,喜歡研究已故及城中有錢佬對食之喜好,強調「貴」唔等如識食,自詡分享食經
乃是提升讀者之水平。
同個老友約喺香格里拉酒店間 Island Gourmet coffee shop飲早茶順便食埋晏;見我入嚟,個貌似 Q版「余麗珍」嘅侍應好鬼熟㗎啦,即刻搵個靠窗嘅風水位,又識得俾埋個中餐牌我睇,喺隔籬「夏宮」撲啲點心嚟,衰得佢個「余麗珍」,同我老友講,話見到我,唔敢怠慢,容乜易又俾我鬧餐飽喎。係呀,慘得過我鬧得有道理,鬧完又俾足貼士,吹咩,我鬧佢,係「醒」佢咋。等佢知道,唔係個個入五星級酒店嘅人格都咁高尚呀。佢都唔知,城中某位長期幫襯福臨門嘅富豪,拿起手掟叉燒包添呀,話說叉燒包梗係用賣唔去嘅隔夜叉燒整,如果整得唔好食賣唔出,即係變唔番錢,個富豪話係「醒」你福臨門老闆,唔好淨係識賣燕窩同鮑魚呀,無橋㗎,俾人入到位!鬧得有道理喎。
好似四季酒店 coffee shop個副經理,成個「小桂子」咁,睇住佢上位,由𡃁仔做到副經理;佢一見新地郭老太來飲茶,就仆上前招呼,反而其他高級侍應見到大人物,怕唔識招呼都唔敢上,「小桂子」同我講郭老太新年封$1,000利是俾佢,巴之閉話袋住唔捨得使,我醒佢一招,將$1,000捐去教會,幫郭老太做善事積福,咁郭老太仲唔記住你呀!


四季酒店個「小桂子」,年初三見我去飲茶,幾乖巧呀,識得同我整碟瓜子糖果(免費),抵我醒佢$1,000利是㗎。 

楊國佳 

好歸宿

過身一年多的羅兵咸永道會計師行創辦人容永道,生前與「情人」後轉為「養女」的藍思敏生活多年;這段忘年戀曾遭到女方親友極力反對,因容永道的年紀較藍思敏的生父更大;為此原本姓林的她遂改姓藍;然而,容老仙遊,藍思敏亦展開新生活,早前下嫁一名牙醫;而容老生前亦把玫瑰新邨二千多呎單位轉到藍思敏名下,算是贈她一個好歸宿。自己則在過身前與前妻鄺美玲重修舊好再結婚,可謂完美的人生終結。


藍思敏展開新生活,容永道生前把二千多呎玫瑰新邨單位轉到她名下,市值四、五千萬。(何少忠攝) 

昔日放在客廳的舊照。(何少忠攝) 

金牙大狀講嘢 「拉住先」、「告住先」


壹哥:警察唔係法官,話之你,拉住先!(高仲明攝) 

壹哥曾偉雄話,警方有警方拘捕嘅標準、檢控有檢控嘅標準、判案有判案嘅標準;冇可能要求警察做法官。振振有詞,大條道理咁嘅款。
可能因為咁,故此警方就拘捕咗港台助理編導張育堅,律政司跟手控以襲擊罪;上到庭大家至知道原來冇人知究竟佢襲擊咗邊個。有被告而冇原告,咁都得,難怪練錦鴻法官一拍驚堂木:「點告?」
雖然告無可告,但根據壹哥「警察唔係法官,律政司亦唔係法官」嘅邏輯,話之佢,一於「拉住先」、「告住先」,由得法官大老爺喜歡點判咪點判囉。如若啲官唔識 do,你估慌死會冇人鬧佢係狗官吖?「拉住先」、「告住先」睇你班人慄唔慄?

中環人語迷你版

“不用急,不用慌!”

估中邊個中環人講呢句說話,送你 JWATCH J-33藍寶石鏡面限定版手錶一隻有意參加者,請於四月十五日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。
本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉答案

“抽水抽到石,砸親自己隻腳。”

李柱銘
得獎者: Yip Muk Lam
中獎時間: 1:00pm 8/4/15

全站熱搜

tvb4life 發表在 痞客邦 留言(0) 人氣()