壹盤生意

港大生無書讀 賣 NB賺廿萬

Ads by Google

他,原本是家人朋友眼中的未來社會棟樑。
二十三歲的吳梓歡( Theo),一二年成功考入港大土木工程系,但入讀不久無心向學,第一學期因成績太差收學校警告信,第二學期仍「唔識死」,結果被港大踢出校!其後賦閒在家中足足一年,由未來社會棟樑變成別人眼中的「廢青」。
幸好,這個世界,條條大路通羅馬。終日在家上網的 Theo,偶爾在網上發現美國網站的 New Balance波鞋與香港行貨差價近四成,決定在 Instagram轉售圖利。他拍片教人分辨波鞋真假,在外地找買手入絕版貨,生意愈做愈大,成功由網上店搬落實體鋪,每月淨賺廿萬。

 


Theo重點推介的 NIKE Flyknit Lunar 3 

「以為過咗海就係神仙,點知原來過唔到!」 Theo獲派港大後,以為三年大學生涯好易「碌」過,怎知港大對學生畢業的要求相當高:「我 year one讀唔夠 credit(學分),去到教授面前,以為有情講,點知即刻就被踢出校,到嗰刻先知唔少人同我一樣。」 Theo原本打算經聯招( JUPAS)入讀其他大學,怎知轉制令計劃大亂:「我考嗰年咁啱係 A Level最後一屆,到下一年聯招已唔接受 A Level成績。」無書讀、由天堂跌落地獄的他,曾做兼職售貨員、補習老師,但大半年仍未有正式工作,父母對他十分不滿,叫他當差。本身是波鞋迷的 Theo沒有聽從,走去網上入 New Balance轉售,當初只搵「雞碎咁多」,令父母更加反感,明言:「一個仙都唔會俾你( Theo)﹗」

賣《星星》熱炒波鞋

面對家人反對, Theo堅持:「開網上店嘅成本好低,一開始都係買幾對,用信用卡過數,賣出套現之後再訂。」 Theo承認到國外買波鞋其實個個做到,不過依然有市場,其群組一開始已有人留意:「其實好多人唔會自己喺外國網站慢慢搵,見我 post出嚟嘅款靚就會問價錢!」他主要在日本、韓國及美國三地入貨,當中以日本手續最繁複,「喺日本訂鞋,好多時唔能夠直接寄嚟香港,我喺網上搵日本人借地址,專幫我收貨再轉寄俾我。」
New Balance、 Reebok及 Air Jordan都是 Theo的目標:「每期總有幾個牌子係特別興,如果嗰款香港無行貨,討論區又多人講,我就會擺嗰款上網,睇吓市場反應,如果多人問嘅話就會訂埋同一款嘅唔同顏色。」
Theo在港大讀教育系畢業的女友 Sandy,亦決定不做教師,瞓身幫他搞生意, Sandy說:「做生意嘅經驗唔會喺課堂上學到,第日教書嘅話都可以帶俾學生。」
現時 Sandy主要負責影相及設計,她本身是韓劇迷,更充當幕後軍師建議 Theo入貨。如去年韓劇《來自星星的你》大熱, Sandy即建議 Theo大量買入男主角「都敏俊」金秀賢穿的一款 Reebok波鞋,再主動向客人推銷,令波鞋生意大增:「好多人睇《星星》都會留意佢哋化咩妝,著咩衫,我就睇著咩鞋,見套劇咁受歡迎,就預先入定貨!其實嗰款波鞋二十年前已出過,上年出嘅復刻版一開始只有三、四十歲嘅人識。」但自《星星》熱潮襲港,該鞋款深受八、九十後歡迎,成為上年店內最暢銷鞋款,「廠商見咁受歡迎,都不斷出唔同顏色,呢款鞋我哋到目前為止賣咗三千對!」 Sandy說。


上年《星星》熱襲港,金秀賢所穿,同顏色的 Reebok Insta Pump Fury($1,850), Theo售近五百對,現時已斷貨。 

開樓上鋪 發大嚟做

經營網上生意約一年, Theo見網上波鞋店愈開愈多,開始有「賣假貨」、「收錢後唔送貨」的情形出現,不過有危就有機, Theo一方面拍片放上網,教人分辨波鞋真假,「嗰時動新聞踢爆香港有商場專賣假貨,好多人都驚買到假嘢,我就即時拍咗段教人點分真假嘅片,吸引好多人睇!」另一方面,他決定開實體鋪,增加客人對其生意的信心,亦方便交收。惟 Theo錢不多,只能租樓上鋪:「當時去搵 agent,專揀多後生仔嘅地方,最後搵到旺角好景樓上鋪,一個月只係五千蚊租,二按一上都係萬五蚊,仲要新裝修,所以好快就決定簽一年約。」
由網上轉到實體店,銷售增加,貨源要求自然大增, Theo更要與行家鬥快「搶貨」:「最緊要係留意發售時間,因為熱門貨一至兩分鐘會賣晒,準備定信用卡資料,訂到返嚟就要即刻做 design影相放上網。」他指亦要留意時勢,「之前日圓跌咗好多,日本版嘅波鞋好平,多咗客訂,我即刻入多啲貨。而每年美國感恩節好多減價貨,我都會入嚟賣。」另外, Theo要靠薄利多銷,一對近二千元的波鞋,他只賺二百至四百元:「唔似得其他炒家咁賣一對就賺好多,毛利一定比佢哋低。」


訪問當天,適逢復活清明節假期,店鋪三時開門,即有不少年輕人迫不及待入店揀鞋。 

施小姐表示,經朋友介紹找到這間店,「啲款都幾齊,次次嚟親都咁多人,應該唔會賣假貨!」 

NB M990 GRY($1,599),用上猄皮及 Vibram底,余文樂都著過。

搞掂買手 大量入貨

生意有起色,但 Theo一人之力難以大量入貨:「開始發覺網上訂嘅貨始終有限,而且有啲貨要喺當地排隊先入到,所以就開始喺網上搵當地買手。」 Theo在網上發現討論區有不少買手設立群組,便開始主動聯絡:「佢哋好多都係喺外國住嘅香港人,有啲係留學生,有啲直情係 full time做買手。」 Theo透露有不少行家向買手訂了一大堆貨,但最後不肯接收,或者買了一段短時間就轉行,故不少買手都對他們有戒心:「最緊要有信用,呢兩年嚟,我訂幾多就拎幾多,而家做落一段時間,買手就會肯俾多啲限量版我。」
實體店策略奏效,吸引不少街客生意。因此, Theo決定搬鋪到同區柏裕商廈四百呎鋪面:「喺好景只係做咗十個月,得百零呎,開始見唔夠地方,好彩隔籬鋪肯接收餘下兩個月租約。」
這間鋪除了賺錢,亦實現了 Theo的「波鞋夢」,他說:「我中六已開始鍾意儲波鞋,但屋企無錢,自己做 part time,一個月最多買到一對,做呢盤生意令我可以買到啲用錢都未必買到嘅絕版波鞋!」
本來對 Theo這盤生意並不看好的父母,亦對他改觀,「佢哋而家覺得我好努力咁追求自己理想。」 Theo慶幸輟學後能搞起一盤生意,「我當年開鋪無乜競爭,先有本事儲到咁多熟客,而家無論網上同樓上鋪都好多人賣波鞋,如果我大學畢業後先至開呢間鋪,就好難做啦!」繼早前兩個女大學生,未畢業已在旺角賣鯛魚燒雪糕;又有 Theo被踢出校賣波鞋,都賺廿萬。大學畢業,真的是向上流的唯一階梯?


假的 Reebok Pump Fury,近鞋跟位的蜂巢圖案上只有白色(如圖所示),而真貨會依照原本顏色,此外,真貨並沒有 37碼。 

而 NB M998真貨(下圖)「 N」字較工整,而假貨(上圖)會出現爆線跡象。「 N」字亦較厚(如圖所示)。 

Sandy(左)現時全職幫手打理生意,二人在大學迎新營已認識, Theo離校後, Sandy仍對他不離不棄,他自言十分感動。

大學時期, Theo(左三)只熱衷上莊及參與課外活動,卻完全忘記要準時交 project。 

Air Jordon Future Premium($1,280)為現時店鋪力銷波鞋之一,在網上曾炒到逾兩千元。 

開業資料(現鋪)

10/2014
租金:$72,000#
裝修:$80,000
入貨:$400,000
總數:$552,000
#三按一上

營業資料

3/2015
營業額:$2,000,000
入貨:$1,700,000
人工:$60,000*
租金:$18,000
雜費:$7,000
盈利:$215,000
*兩個全職、四個兼職

一點意見

在香港零售業界打滾多年的吳民傑( Lawrence),對 Theo的波鞋店,有以下看法:

引獨家代理 提高競爭力
Lawrence稱:「水貨波鞋人人都買到,門檻低令太多人入行競爭,好似莎莎( 0178)、卓悅( 0653)咁,而家佢哋有一半以上嘅盈利,都係靠自家品牌代理嘅貨品。」他建議 Theo盡快爭取獨家代理銷售,或到外國網站引入香港不會售賣的潮流相關產品:「除咗可以提高利潤,仲可以給予顧客更多更獨特嘅選擇,提升競爭力。」

毛利太低 造成庫存危機
Lawrence認為 Theo生意得以維持,他眼光夠準是重點之一:「之前網上係賣一對訂一對。但係到實體鋪,你就要放一批貨喺鋪,如果眼光唔夠準,批貨唔受歡迎,或者唔小心入咗批次貨,就會損失。以佢大約 15%毛利,嗰個月就好容易賺唔到錢。」他認為擴大店面是「雙刃刀」:「當然間鋪大咗會做多啲生意,但要留意入嘅貨多咗,庫存問題一定會增加。」他認為 Theo現時第一步要想辦法提升毛利。


撰文:梁延宇
攝影:鄭樹清、于港民
mailto:ed_bn@nextmedia.com

    全站熱搜

    tvb4life 發表在 痞客邦 留言(0) 人氣()