夜晚十一點幾,阿雀(左)同法元(右)走上魔鬼山搵鬼。 

爆壹爆

上魔鬼山搵鬼實錄

Ads by Google

呢排夜晚吹雞飲酒,成日都搵唔到班𡃁仔,以為佢哋掛住去老蘭蒲,點知原來佢哋走晒上山,話玩啲更加刺激嘅嘢喎。一班十幾廿歲嘅𡃁仔,上山做乜呢?爆哥八卦,有晚得閒,一於跟佢哋去睇吓。

 

夜晚十一點幾,一行四人响油塘魔鬼山腳集合,拎住大電筒,就徒步走上山,沿途人影都無個,周圍黑漆漆,仲陰風陣陣添,究竟搞咩呀?
其中一個團友法元,突然間停低,煞有介事咁話︰「日佔時期,呢度係英軍一個碉堡,打過唔少場仗,好多士兵死傷,傳聞話啲戰死士兵寃魂仲喺度,有啲靈異事件,所以我哋去睇一睇。」謎底解開,原來班𡃁仔一齊上山探靈喎。
佢哋行到去一塊空地,竟然有個錄音機,播緊「南無阿彌陀佛……」嚇得爆哥心都寒埋,但佢哋四個就見怪不怪咁,仲拎啲金銀衣紙香燭出嚟,即場就地燒。
團友阿雀解畫︰「我哋呢個儀式,係吸引啲靈體過嚟。」
點解揀呢度呢?阿雀話︰「有報導指,以前有個媽媽孭住女嬰喺呢度吊頸,我哋之前都嚟過好幾次,都影過呢度有『能量球』。」話口未完,阿雀已經拎咗部相機出嚟,對住個山頭影完又影,突然佢叫大家一齊埋去,指住個相機顯示屏,好雀躍咁話︰「有喇、有喇。」佢指住畫面上一個個白色半透明嘅圓圈,話嗰啲就係「能量球」。
阿雀解釋︰「能量球其實都是鬼魂的一種,鬼魂不會影到整個樣貌的。」
望住呢班𡃁仔,好似發現新大陸咁興奮,爆哥忍唔住問佢哋有咩咁好玩?
阿雀話︰「我細細個已經睇好多鬼片,我好鍾意超自然嘅事物,所以我對探靈好有興趣,好想知道佢係咩嚟,好想去探索一下。」
爆哥就覺得,鬼神之說真係完全無科學根據,不過當係行吓山做運動,順便練吓膽量,都過癮嘅,不過就唔好太過沉迷走火入魔囉。


團友阿樂响荒山野嶺燒金銀衣紙,吸引靈體聚集。 

探靈吹噓其中一個重要環節,就係影「能量球」,即係鬼魂。圖上方白色半透明嘅圓圈,就係佢哋口中嘅能量球喇。 

老蘭港男港女互插

好耐冇落老蘭,上個禮拜去,又聽到港男港女互插。正所謂落得嚟嘅,女嘅低胸,男嘅 chok爆,眉來眼去,啱 feel就行埋一邊激烈地互相廝磨。睇落好似卿卿我我,但男女蒲友又互數對方衰格,隨口都噏得出對方一大堆缺點。
蒲咗十年嘅男蒲友 Chris,話最憎女仔飲醉酒,「有啲女仔會飲到好醉,佢哋會發癲大叫,我覺得女仔嚟呢啲地方,始終都唔好飲醉會比較好,因為始終都會危險。」
隔籬嘅 Kenny不停點頭,仲加把嘴話︰「飲到好醉,會亂鬧人、亂講嘢,我好討厭。經常買醉嘅女仔,真係唔可以溝,佢自己都無分寸,溝咗返嚟,無安全感。」
女蒲友當然都不甘示弱,一講起港男,就發晒火。
Kaby、 Yvonne同嘉敏都異口同聲話,最憎男蒲友趁個場又逼又黑,就伸手响女仔身體上下其手,摸腰、摸肚、摸胸、摸 pat pat乜都有,離晒大譜喎。不過,問佢哋有無報警,竟然個個都話無,都係縮吓避吓就算數,甚至乎靠借尿遁離開現場,至多都只係用粗口鬧爆對方,而最後都係走人了事。
佢哋都唔肯講點解咁容忍,反而男蒲友 Chris就大爆︰「啲女仔費事大嗌,俾人覺得佢惡吖嘛。」落得嚟老蘭互溝,雖然係一場男女博弈遊戲,但俾人非禮都唔出聲,蝕底㗎嘛。


盧覓雪疑似淫片流出

近日爆哥聽到有古惑仔四圍向各大傳媒,兜售一段名人自拍的四級片,而該片段是來自遺失手機,由於開價達十萬之高,爆哥八卦打探吓係邊位名人,聽聞片中見到一位貌似盧覓雪嘅女子坐在梳化及面對着鏡頭,而一名男子則背向鏡頭及跪在地上,而頭部則埋在梳化下忙碌。咁驚爆?上週趁有空,爆哥致電盧覓雪,通知佢兼八吓咩料,最重要係有無自拍咁重口味嘅四仔。
盧覓雪真係老江湖,危機處理手段極高,佢一接電話不怒反笑,仲同爆哥雞啄唔斷,話對呢條所謂淫片好有興趣喎。「吓,我無唔見電話,當然無自拍四仔啦,都 dry咗咁耐,我都想有呀,你應該戥我高興,話有性愛片段流出?我都冇性愛,係唔係拍咗祥仔(阮兆祥女人 look)呀?……十萬咁貴,我值唔值呀?張曼玉咩,我又無波無籮,三萬都唔好買啦,你哋唔好俾人呃,我咁嘅身形登出嚟都唔好睇啦……」
好嘢!以笑話來化解危機,真係有大將之風,啲高官明星學吓嘢啦,點樣將危機化成幽默。


爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

 

    全站熱搜

    tvb4life 發表在 痞客邦 留言(0) 人氣()