黃倩靄六十一歲,已婚,育有兩女一子,網上當紅「棉花糖師奶」,最叻將棉花糖變成一朵朵花。她一手做出來的軟綿綿糖果,背後是一個葵涌師奶的養家智慧與汗水。 

坦白講

人生棉花糖

Ads by Google

人稱「靄姐」的黃倩靄賣糖十二年,深信五顏六色的糖果能為人生加甜。
她睇片苦學自製「棉花糖花」,令她成功衝出葵涌廣場,成為𡃁界潮師奶。

 

唔好以為棉花糖一嚿雲咁,佢可以千變萬化,我試過變成太空船、聖誕樹,賣八蚊一支,小朋友好鍾意。我唔想客人覺得厭,會不停轉花款。有一日,我同老公諗緊新嘢嘅時候,有個後生仔搭訕,話去完台灣旅行,見有人整「棉花糖花」好靚,叫我都整吓,俾段片我睇之後講句:「加油!」就走咗。我個腦即刻叮一聲,上網再搵番條片,就自己學整「棉花糖花」。
我拎住支竹籤,喺一團圓碌碌嘅棉花糖,搵五個角逐一用力壓下,花形就成。聽落好簡單,有時天氣乾燥,唔同顏色嘅棉花糖好難黐埋,做唔到層次感顯示花瓣和花蕊,最後我苦練咗幾個月先成功。
諗番起十幾年前我嘅創業路,其實一啲都唔似棉花糖咁甜蜜蜜。記得○三年,我只係個日日買餸煮飯去百佳惠康嘅師奶,老公打散工,一時喺貨櫃碼頭做卸貨,一時做替更保安,搵得八、九千蚊,沙士爆發佢就坐喺屋企,我問佢點算好,佢話等。我話點等呀,屋企要開飯,三個仔女仲讀緊中學,唔通真係坐喺度等運到。我知道自己年紀大打工無人請,見沙士之後租平,一個月都係幾千蚊,就膽粗粗喺葵涌廣場租個幾十呎鋪位,賣我最鍾意嘅糖果。

 

喺人生最苦嘅時候,我記得細個屋企無錢,但我好想食甜嘢,就自己整生果雪條,我呢個師奶無嘢識,但相信糖果會為我幾乎絕路嘅人生加甜,二話不說就決定賣糖。起初我賣軟糖,後生仔女鍾意夾吓夾吓嗰啲。○五年情人節我用絲帶織花,好似我平時織冷衫咁,配埋珍寶珠就變成一紮珍寶珠花。記得有個男仔同我買一紮,我剛開始做得慢,佢等咗我個幾鐘,埋單嗰年情人節我都賺到二、三千蚊,每個月收入都夠一家五口慳慳哋生活,起碼唔使攤大手板攞綜援。
後來業主隔年加租,我知道生意要做落去,一定要不停諗新嘢,我見全個葵涌廣場無人賣棉花糖,就決定去馬。冒險樂園都只係星期六、日有,我就一至日都賣,日日做十二個鐘,再搞吓「棉花糖花」呢啲花臣,我個女又幫我喺 facebook宣傳,依家啲生意都好穩定,間中 TVB都有搵我去整糖幫節目搞氣氛,所以陳豪咪識得搵我。
估唔到,老公失業,我會搵番自己事業,仲愈做愈過癮。我由始至終都無怪過老公,我哋一家人,仲好 sweet咁住喺青衣居屋,老公已經退休,間中會幫我看檔,佢都捱咗咁多年啦。其實人生就好似棉花糖咁,可以扭出唔同形狀,視乎你睇唔睇得開,或者,識唔識得變。

由你開講

一切好人好事,壞人壞事,先吐為快。
你敢坦白,我敢講。
電郵: mailto:voice@nextmedia.com


撰文:陳雅欣
攝影:高仲明

    全站熱搜

    tvb4life 發表在 痞客邦 留言(0) 人氣()