張學友冇膽參加《我是歌手》

被封歌神嘅張學友,喺歌壇叱咤三十年,以佢嘅資歷真係可以隨口噏當秘笈,唔怪得之早排香港大學嘅通識科,都請佢去開座談會,同一眾博士、教授傾吓偈,向一大班大學生分享吓人生經驗、做人道理,仲有佢對本地樂壇、影壇發展嘅見解。

Ads by Google

對於o依家香港樂壇嘅情況,學友都好鬼慨歎,佢又重提曾經聽過有學生哥講過,畀錢買音樂係一件老土嘅事,認為網上下載歌先係合理,搞到o依家唱片銷量大不如前。佢仲話同歐美地方比較,我哋樂迷嘅道德標準真係冇得比,當大家可以用幾萬蚊買一個名牌手袋,點解唔可以使幾蚊畀錢下載一首歌呢?難怪,成個音樂行業都好沮喪,但作為歌手,就只可以做好本分,希望「好歌有好報」。

咪睇學友o依家喺樂壇咁「神級」,喺座談會度,佢都提過自己初初入行時,冇乜經驗,喺頒獎禮上面,拍埋去同班前輩歌手好似許冠傑、譚詠麟,仲有關正傑咁同台,感覺戰戰兢兢。而呢個緊張嘅階段,仲足足維持好幾年先克服到。

學友早排去咗港大出席座談會,同學生哥分享人生經驗,做人道理,仲有對樂壇發展嘅睇法。

就算o依家入行三十年,學友都唔係冇有怕,好似內地盛極一時嘅歌唱比賽《我是歌手》咁,佢就好坦白話冇乜勇氣參加,仲話好佩服啲同行歌手拎得出呢份勇氣喎。佢話:「喺三十年生涯中,不斷畀人攞去比較,我認為係件無奈嘅事,但我無法子控制。所以喺可控範圍內,我唔想做呢件事,都要多謝大家支持,先可以令我咁自在。」

東姑即刻諗起,呢期《我是歌手3》韓紅攞咗最終「歌后」寶座;不過,喺節目度同陳奕迅對唱嗰段就成為城中熱話,畀人猛彈佢唱到走晒板,唱衰晒Eason首〈十年〉;學友話自己冇膽參加《我是歌手》真係不無道理。之但係,就真係替大家感覺好可惜,睇唔到歌神點同班內地歌手fight過,如果學友肯唱,好相信佢一定可以為港爭光,大家話係咪先?!

學友好坦白話冇膽參加唱歌比賽《我是歌手》,最近就連中國歌后韓紅,同陳奕迅喺節目度對唱〈十年〉,都畀人猛彈韓紅唱到甩板。

初出道時嘅學友,喺頒獎禮上面遇着一班前輩級歌手,包括:譚詠麟、許冠傑、關正傑咁,佢話嗰時原來好戰戰兢兢o架!

    全站熱搜

    tvb4life 發表在 痞客邦 留言(0) 人氣()