So Comment

確係平靚正 城中小閣 地址:尖沙咀柯士甸道 102號 1樓 電話: 2730 6808 (甲-) (蘇施黃)

Ads by Google

哈哈!我都話啦,香港島食府多叫「 XX軒」,九龍比較多叫「 XX閣」!
朋友又介紹我去食間平、靚、正嘢,最啱傾。「城中小閣」喺柯士甸道,都算近港鐵口,駛車就麻煩一點,因冇代客泊車,如唔介意,可泊去山林道。
我星期天去,不算多人,可能附近太多選擇,而又冇乜街行。不過,我試完之後,的確係區內一個平靚正的 good choice!

裝潢

簡潔、開揚,樓底非常之高,少有。
基本係灰色,但係啲櫈好奇怪,椅背好像有些傾前,和朋友研究點解咁得意,會否為支撑脊骨,我試坐又冇乜特別。我選擇坐卡位。


食物

娥媚千層夾$32
嘩!好細碟,真係得幾嚿。係面兩嚿好樣些,下面啲好油,炸功好水皮!香港炸嘢真係冇日本人叻,我自己炸嘢主要心得係學日本 tempura炸法。炸完之後,用筷箸夾住食物,將食物內的油揈出。不然,食物就會好快吸晒啲油,好肥膩!既唔靚,又成口油。

 

燒味拼盤$138
普通。

 

賽螃蟹$78
似大良炒鮮奶多啲,味道唔錯,但太濕。可以不叫。

 

荷葉古法蒸滑雞$108
一嚟到,大家很一齊讚先係好,細細碟。果然好滑,味道亦非常之好。

 

惠州梅菜蒸五花腩$78
當我叫時,我已經喺度諗蒸五花腩?梅菜炆五花腩食得多,點蒸呢?哦!原來五花腩切片,又幾特別,又可以 enjoy到五花腩甘香味,肥又可以令梅菜更好味,正!又學到嘢!

 

清湯蘿蔔牛腩煲$118
牛腩唔靚,唔好食。

 

清炒白菜仔$48
炒得腍咗啲。

 

荷葉飯$98
超好食,好 moist,好有古舊荷葉飯味,必食!

 

紅燒豆腐$58
非常好食,豆腐又滑,汁又調得好味,緊緊包住豆腐,豆腐切嘅方法和 size又剛好。唔會太大嚿,中間冇味。 This is Perfect!必食!

 

杏汁燉白肺$58/一位
白費了,陸羽有 95分,佢得 50分。

 

香煎馬蹄糕$28
有 3件,煎得燶燶,好香好正,仲有馬蹄粒,可惜糕稀了一點。實少少更好。

 

四個人食咗$979
有咁水準,有咁嘅地方,我覺得超值了, service亦一流,各人好戮力招呼,大家絕對值得一試。

 

城中小閣
地址:尖沙咀柯士甸道 102號 1樓
電話: 2730 6808

 

蘇施黃
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。


攝影:蘇施黃 

    tvb4life 發表在 痞客邦 留言(0) 人氣()