新車激試

百公里試盡  30萬德法電動新竉 Volkswagen eGolf& Renault Zoe

Ads by Google

環保從來都要代價,而有錢人可以付出嘅價錢比一般人多,所以價值 76萬嘅 Tesla Model S P85電動車(EV)可以賣到一街都係,但以往 30零萬嘅 EV反而大部分都係大機構先會買……
不過,環保風氣係可以做出嚟嘅!有錢人大舉轉玩 Tesla,平民自然亦想升格。名牌效應特強嘅 BMW上年推出 i3,雖然續航力同其他平價 EV差唔多,但賣到近 40萬一樣大賣 196部!
所以,上個月尾歐洲 EV就大舉進駐,德國 Volkswagen eGolf同法國 Renault Zoe差不多同步上市, 30零萬就有交易,就試足佢哋 100km睇吓有幾大進步!

快叉制式各不同


香港 30-60分鐘充電 80%嘅快叉站大部分係用 Chademo制式,但 eGolf用嘅 CCS制式全港就只得九龍灣啟程邨有。 

老實講,平價 EV百幾公里嘅續航力,作為私家車喺香港一日通常都唔會用得晒,大家嘅心理關口係萬一唔夠用就會好影響行程安排,甚至冇電時要拖車!其實只要香港多啲充電站就可以好大程度彌補到 EV續航力唔夠長嘅問題。可惜現時香港嘅 EV充電位雖然已經有成 935個,但大家都知用普通 13A插頭充電起碼要 8-10個鐘先滿 100%,根本就解唔到不時之需,而約 1個鐘可以充電 80%嘅快叉位就仍然只得 12個!更大問題係現時 EV中叉同快叉制式分日本 Chademo、歐洲 IEC62196同美國 J1772呢三大陣營,令公共機構唔可以集中資源安裝同一種中叉或快叉設施,所以就算 1-4個鐘可以充電 80%嘅中叉位有 140個,但都唔係部部 EV用得到,呢個先係喺香港推動 EV嘅最大阻力!

難以衝破的 200km

上月新款歐洲 EV雙雙到港,但係兩款平價 EV嘅性能同續航力都冇乜突破……其實由 2010年首部 EV到港至今,除美國 Tesla外,所有歐日 EV喺數據上續航力都只係 200km左右,計埋行車環境令行走距離打個折扣,實際上冇一部車價低於 40萬嘅 EV真係充一次電就可以行到 200km!
不過,喺現時大眾對 EV嘅認識同充電設施都有改善嘅環境下,有兩款新 EV推出,吸引力已經大過早幾年好多。而且 Renault Zoe同 Volkswagen eGolf定價分別只係約 33萬同 37萬,設備已經非常齊全, LED頭尾燈、駕駛控式掣、 touch screen大 mon.、香港地圖聲控導航系統、軚盤遙控、藍牙 handsfree等兩部車都有齊,實屬中級車設定,性價比進一步同汽油車拉近距離,係時候諗諗投入 EV環保家庭喇!



歷年本地 EV續航力比較

 

細得夠精緻  Renault Zoe


車身比 Clio GT 120長 7mm、高 121mm,但因為冇用肌肉形設計,車身就窄 215mm,其實車廂空間差唔多,甚至會闊落少少。 

Zoe係 Renault四大 EV計劃中最後登陸香港嘅一款,同之前嘅 Fluence Z.E.、 Kangoo Z.E.唔同, Zoe並冇汽油版,只出電動版,所以外形設計更科幻,仲有心思到喺司機位同車頂加入 Z.E.電動車系圖案。骨子裡,其實 Zoe同 Clio共用底盤,所以 size差唔多,車廂空間感好少少,設備就大致相同。但作為 EV梗係唔會有 Clio嘅跑車化設備,取而代之係一系列 EV專用設計,表板係一個長方形大 mon.、 7吋 touch screen有多項行車資料統計、 ECO模式掣可降低行車耗電量,仲驚 EV行車太靜車主會唔慣,加入咗 3種模擬行車聲效,同早幾年純為代步而設嘅日本 EV比,明顯落咗更多心思!
講到大家最關心嘅價錢,同 Zoe尺寸差唔多嘅 1.3公升汽油揭背車仔通常都係 17萬左右,但要好似 Zoe咁多設備,同廠 Clio GT 120、 Honda Jazz RS同 Toyota Ractis都賣到近 20萬,而 hybrid嘅 Prius C更加要約 23萬。以 Zoe定價$329,800,係就係車價貴咗 10萬以上,但已經係現時香港最平嘅 EV,而且長達 240km續航力亦係 40萬以下 EV中最長!所以政府一早已買咗約 20部畀消防、海關同民航署等部門用,可見性價比有幾高。

 

 


揭開車頭廠徽就係充電插頭,喺香港可以用 935個 13A慢叉位同 140個 IEC62196制式中叉位,仲可以畀$8,000喺屋企停車場裝私伙中叉, 4個鐘就可以 100%充電。 

雖然摩打得 88匹,但扭力係勁過 Clio RS嘅 25.5kgm,實際試 0-100km/h加速真係做到約 14秒時間。 

充滿 100%電未著車時,表板會顯示有最理想嘅 210km(紅圈)續航距離,但電腦會跟據之前駕駛耗電量預計實際續航距離,所以著車後得番 123km。

1前速波箱冇嘢玩,但 ECO模式掣可以將續航力延長 10%,定速巡航系統仲可以㩒掣加速同減速。 

軚盤左邊+/-掣唔係控制+/-波,而係用定速巡航時控制加速同減速,試過急降 20km/h車速反應快到同輕踩 brake差唔多。 

由專門研究聲效嘅 IRCAM設計嘅模擬行車聲音系統(左),有 Pure、 Glam同 Sport三種聲效選擇。 

表板有兩種圖案選擇,底色仲會跟駕駛風格變,正常駕駛係綠色、揸得慳電係藍色、谷佢就紫色。 

㩒掣控車速

Zoe嘅賣點唔只係唔使入油咁簡單,科幻嘅操作感亦係一般汽油車提供唔到嘅。其中最好玩係個定速巡航系統, set咗定速之後唔只唔使踩油門,仲可以㩒軚盤上嘅+/-掣改變車速,因為用摩打驅動所以加減速反應特別快兼極之 smooth,仲唔會有引擎同拖波聲,直頭好似打機咁過癮!
此外,咪以為平價 EV就冇駕駛樂趣,因為 Zoe同 Clio共用底盤同前懸掛,試落真係有 Clio嘅 8成操控表現,而且劈彎時明顯感覺到重心好底,車身傾側輕微。而 88匹嘅摩打推 1,468kg車身, 0-100km/h造出 13.5秒,加速力亦比 1.3公升車仔勁少少。最值得一讚係電腦預計嘅續航距離非常準確,充滿電開車時預計行到 123km,由鯉魚門 showroom來回機場行咗 105.6km後,續航距離剩番 28km,比預計仲行多咗約 10km,代表可信度好高,睇住續航距離揸唔怕突然冇晒電要拖車。


中控台設計同 Clio差唔多,連個 R-Link 7吋 mon.同鋼琴黑 panel都係一樣款,但電鍍裝飾就加咗淺藍色。 

絲絨前座賣相科幻,頭枕仲有 Z.E.圖案,包圍力亦比睇落更好,可惜冇天窗。 

因為座椅薄啲同樓底高啲,後座頭部同腳部都比 Clio更闊落, 5尺 10吋成人坐都唔會頂頭頂腳。

卡片形車匙除咗用嚟著車同控制防盜,仲要用佢先可以為充電插頭解鎖拔出。 

導航內置香港地圖,仲有聲控搜尋、預計目的地距離同續航力提示功能。 

雖然冇天窗,但車頂都整咗一大幅 Z.E.車系坑紋圖案裝飾。

338L尾箱勉強擺到兩個行李箱,摺合後座就可擴至 1,225L,原裝會跟慢叉同中叉兩條電線。 

電池平舖喺地台底重心極底,亦令前後車重比例達到 59:41,再加上用咗 2.71:1嘅快軚設定,馬力唔大都劈得吓! 


雖然用到 17吋巨軨,但就係第一款 EV配上 Michelin EnergyTM E-V超低阻力輪胎,加上特強制動力回收系統,令續航力更勁。 

齊料易適應  Volkswagen eGolf


C字形 LED日行燈係 VW電動家族嘅標誌設計,鬼面罩同頭泵把都多咗密封位,加埋 16吋 Astana專用軨,令空氣阻力比一般 Golf低咗成 10%。 

相信香港冇人唔識最高銷量嘅 VW Golf車系,其實廠方 09年推出上代時已經開發出 eGolf電動版畀各地公共機構測試,今年就終於推出量產版引入香港,成為車系中第 7款選擇。以性能論,電動嘅 115匹 eGolf只係同賣 21萬嘅 122匹入門版 Golf 1.4 TSI差唔多,但定價$369,880就同 230匹嘅 Golf GTI Performance一樣,表面睇好似好貴,但細心分析其實都唔過份。
因為 eGolf除咗冇天窗同電凳之外,設備係全車系最高級,得佢用全 LED頭燈同藍色 LED車廂氣氛燈,連賣 50萬嘅頂級 Golf R想加錢都冇!而 8吋 mon.嘅 Discover Pro多媒體系統、雙區恆溫冷氣、泊車鏡頭、自動泊車系統等亦係車系中最頂級。雖然 eGolf唔似 GTI同 R型號咁主攻駕駛表現,但喺電動系統方面就係極致。新款包圍同專用 16吋 Astana胎軨,令風阻降低至 0.281Cd。多媒體系統加入多項耗電統計同提示功能,連導航地圖都可以顯示續航距離可以行到邊。最緊要係多咗咁多新系統,但車內陳設同舖排都冇變,揸落用落同普通 Golf一樣咁簡便,轉揸 EV都完全唔使重新適應。

 

 


中控台設計冇變,但已有晒 8吋 mon.、軚盤遙控、電子手掣、雙區恆溫冷氣等頂級設備。 

前座都係用高級 Vienna皮革,而且有電暖功能,但為輕量化就冇咗電動功能。 

後座空間同汽油版一樣,而且車廂全部燈都已改用 LED。

同貫通鬼面罩同頭燈嘅藍色裝飾線一樣,藍色 LED門檻同車廂氣氛燈都係 eGolf獨有。 

原裝已經有埋泊車鏡頭同自動泊車系統,比 21萬嘅入門版高級得多。 

充電池裝喺地台底,完全唔影響車廂空間,後座冷氣風口同手枕依舊。

380L尾箱空間亦冇變,底下一樣有暗格,亦可摺後座將容量擴至 1,270L。 

車尾右邊入油口已改為充電插頭,可以普通 13A慢叉同 IEC62196制式中叉,但 CCS快叉全港就只得一個。 

115匹摩打馬力同 1.4公升 turbo引擎嘅 122匹差唔多,扭力亦只係大咗 7.1kgm,所以性能唔會有好大分別。

波棍左上方嘅行車模式掣有 Normal、 Eco同 Eco+,後兩者分別會將輸出降至 94匹同 74匹,極速亦會分別限制喺 115km/h同 90km/h。 

制動力回收系統分 D1、 D2同回收力最強嘅 D3,如果減速效果都未夠,就可以拖落 B波,如果減速得太急,尾燈仲會自動著警示後車。 

因為改用摩打同地台底有 318kg嘅充電池,車身比 Golf 1.4 TSI入門版重咗 336kg,所以 0-100km/h數據上加速慢咗 1.1秒,實際試亦要約 11秒。


1前速波棍改用藍色裝飾,仍然有自動泊車系統,但左邊 Mode掣已改為慳電模式掣,右邊+/-符號就變成制動力回收模式切換指示。 

模式定距離

eGolf同其他 Golf車系一樣用全新嘅 MQB輕量化底盤,不過因為車身重啲, 10.4秒 0-100km/h加速比 Golf 1.4 TSI入門版慢咗 1.1秒,但試車時覺得性能分別唔太大,反而摩打早發力嘅特性,令加速感更爽快。
民用 EV嘅重點當然唔係性能,而係續航力,但廠方數據由 130-190km變化好大,筆者上到車就明白, 100%充電後表板顯示續航距離係 174km,但如果轉用 ECO或 ECO+模式,就會分別延長到 180km同 193km,事關用呢兩個模式時摩打會降低出力,預計可以行長啲距離。另外,雖然 eGolf冇+/-波玩,但波棍一樣有左+、右-嘅符號,原來呢個就係分三級嘅制動力回收系統,行緊車時推高一級就會好似+/-波箱拖波咁,即時有類似 engine brake嘅減速效果,而且回收程度愈高,續航距離愈長。單靠呢兩個系統,就可以令續航力有頗大變化。結果筆者用盡唔同模式駕駛,行完 95km之後,續航距離剩番 43km,同出車時預計嘅 174km比就似乎少咗啲,但約 130km實際續航力其實都係同其實 EV差唔多啫!


8吋 mon.可以實時顯示電量、摩打出力同動力回收情況,睇住佢就會發現駕駛模式同動力回收系統對耗電量嘅影響比一般 EV高。 

充滿電選擇用最慳電嘅 Eco+模式,顯示嘅 193km(紅圈)續航距離甚至超過 190km嘅廠方數字,但 95km試車旅程中,實際行車里數同預計續航距離嘅遞減唔太成正比。 

值得一提係筆者發覺充滿電出車初期嘅續航距離會跌得快啲,到剩番約 60km後就會跌得慢啲,若然試到冇晒電,真係行到 174km亦唔出奇。

撰文:陳致新
攝影:葉偉豪

    全站熱搜

    tvb4life 發表在 痞客邦 留言(0) 人氣()