靚抽王

最好打嘅娛圈武術高手

Ads by Google

講到最好打,自古有黃飛鴻呀霍元甲呀李小龍呀宇宙最強等……我同你講吖,你如果咁諗就太天真喇!呢啲只係電影故事,係武術指導令你覺得佢哋好好打咋。咁邊個真係好打?講好打梗係要搵啲有實績啦!以下嚴選圈中好打分子,出街見到佢哋,以和為貴呀!

崔建邦

絕技:阿米高擒拿
危險度:高

練過散打、連贏過 6場散打比賽嘅崔建邦,係娛圈入面著名嘅武癡之一。佢有幾癡?練拳練到搵佢嘅伴侶試招,仲唔夠癡? 2009年爆出崔氏打女友嘅新聞,嗰個來自巴西嘅女仔鄺敏慧怕且都係巴西柔術嘅高手,先可以同崔氏打個平手!只係有些少瘀痕,但都算係全身而退。當年此舉觸動大台高層,最後崔氏被迫要喺大台戲劇部做 PA練內功(須知做大台 PA唔簡單,上年先有人寫書講述內裏的地獄狀況)!

范振鋒

絕技:醉拳
危險度:中上

身為醉拳高手嘅范少俠,早兩日飲大兩杯,返屋企時耍住佢最耍家嘅醉拳,喺屋企停車場度赫然發現有另一名醉拳高手,「咦,對手嘅一身好功夫睇嚟都係來自少林,唔通係出自同一師門?」於是就同佢命中注定嘅宿敵講手起上嚟。最終當然係有人報警跟住被捕。事後,有傳媒訪問范少俠,佢話:「最衰我冇戴吉祥物……」嗯,該傳媒理解此句為范少俠今年犯太歲,故有此言。不過我哋唔係咁睇,醉拳可能只係佢其中一門武藝,點知佢有冇身懷另一套功夫?例如係范家霸王鐵鎚之類呢。

吳鎮宇

絕技:突襲
危險度:極高

是咁的,嗰日吳大俠嘅太太去買買麵包,因小事與某地產經紀爭執,吳大俠愛妻心切,使出十成功力突襲地產霸權爪牙,最後被警察拉,再罰款了事。唔知大家有冇睇《爸爸去哪兒 2》,吳大俠連對住自己仔仔,都成日想變超級撒亞人咁,何況你係一名路人?喺街見到吳生,小心,佢前一刻都仲係一個斯文靚仔飛機師,你唔知幾時佢會變番《古惑仔》入面個𡃁坤㗎!


最 XX

每期分析行事最誇張嘅人物(例如最賤、最大使、最口臭等),並排出當中的三甲位置,食花生之餘,叫做為世界伸張吓正義咁啦!


撰文:娛文樂

    全站熱搜

    tvb4life 發表在 痞客邦 留言(0) 人氣()