名人潮

初夏傘熱

Ads by Google

踏入初夏,天氣愈來愈熱,最方便的散熱招數,應該由衣着打扮入手。女士們要着得清爽舒服,唔一定袒胸露背,最近又再彈起的復古傘裙,成為圈中女星不二之選。
起源於上世紀 30年代的傘裙,感覺優雅高貴,帶出淑女感覺。今季大熱的 midi lenght(中長)剪裁,過膝長度並非人人 carry得到,唔想着到又肥又矮,千祈咪亂跟潮流喇!

陳慧琳 清新奪目  Chloe

Ricky評︰「 Kelly身形高䠷,容易 carry呢類裙。簡單同 tone嘅拼藍色裙,感覺舒服清新,襯埋綠色手袋、 ankle boots,配搭出艷麗光芒。裙嘅傘位唔算太誇張, volume好自然好靚,有壓場感。」

楊千嬅 自暴其短  Marchesa

Ricky評︰「佢本身高度唔夠,好難 carry呢個長度嘅傘裙,令佢 hip位肥大、對腳都短埋,自暴其短。頸鏈款式有型,但襯落咁女性化嘅裙款,完全格格不入。」

腰線突出  Ms Min

Ricky評︰「成個顏色打扮幾舒服,感覺好青春。呢條雪紡裙腰線明顯,長度啱佢,露到啲小腿比例好啲,加上對 platfloor鞋幾靚。」

劉嘉玲 下身臃腫  Dior

Ricky評︰「呢個打扮一般,裙款過分蓬鬆,傘位過大令佢下身有啲肥,加上裙腳層次,感覺好論盡。髮型、手袋都夾得好好,唯獨裙款唔係好襯佢。」

周麗淇 髮型累事

Ricky評︰「全黑打扮令露出嘅小蠻腰更突出,感覺性感誘人。裙長去到腳眼上 4吋剛好,係標準嘅長度,好有淑女 feel。可惜髮型太高,有啲師奶,轉個貼服啲會更加靚。」

諸葛逖岐 青春少婦

Ricky評︰「顏色配搭幾青春,飄逸嘅粉紅裙好睇,對於生完 BB嘅媽咪嚟講,呢個露腰打扮騷到佢嘅 fit身材。轉個簡單髮型、輕手嘅妝更好,整體合格,不過唔算出色。」

鄭裕玲 貴氣搶眼

Ricky評︰「成個感覺好優雅,裙長度好啱,令佢身形修長咗,全黑襯法令佢白滑嘅膚色更加突出。髮型、飾物撞得恰當,有時着 tude dress唔一定要配浮誇頸鏈,好似佢簡單一對耳環已經好好睇。」

Profile

星級形象指導郭慶彬( Ricky Kwok),定期被邀到巴黎時裝周欣賞大牌 fashion show,近年他做埋潮店老闆,於銅鑼灣開時裝店。

裙過長易變矮

傘裙打扮出名蝦人着, Ricky指亞洲女仔普遍唔高,若想跟潮流,就要由剪裁、物料等入手。
*修長感覺取決於裙長,如果上身為冇袖款,裙腳可長少少,大約腳眼上 4吋。身高唔夠的話,切忌過長,會令身形比例更短。
*小腿較粗女士,要着腰線較修身款式,若揀裙襬較誇張款,會令小腿粗上加粗。
*裙款質料好緊要,盡量揀輕身款,拉長身形比例,今季 hit的潛水衣料就可免則免。
*鞋款一定要夠高,最好揀露趾高踭鞋、尖頭鞋,切忌襯圓頭款,會變得好笨重。


Dior 

Chanel 

撰文:蔡靜雯
攝影:鄭家駿、陳志輝

    全站熱搜

    tvb4life 發表在 痞客邦 留言(0) 人氣()