伍家謙離開無綫,在新一條起跑線重新出發。有報導曾指,伍家謙在無綫月薪三萬五,記者問他現在是否搵得更多,他笑答:「少少啦!」 

坦白講

伍生你至叻 伍家謙

Ads by Google

伍家謙,前無綫體育記者,三十五歲,已婚。○二年畢業於珠海書院新聞及傳播學系、○八年獲中大新聞與傳播碩士。做過《新報》及亞視體育記者,○三年加入無綫至去年底離職,師承已故「香港人至愛體育記者」伍晃榮。伍晃榮離世七年,他到今天終於明白,伍晃榮嗰句「波係圓嘅」原來有好深的處世哲學。

 


伍家謙(右)與伍晃榮(左)這對「雙伍」,關係亦師亦友。伍晃榮離世七年,伍家謙與師傅的家人仍有聯絡,每年清明都一同拜祭。 

呢排人人講緊港視套劇集《導火新聞線》,其實體育記者都係記者,只不過,咁多年來都無乜人講我哋。
有前輩話,鍾意做體育記者嘅人,一坐低瞓身做,轉眼就十幾年。我入行初時都唔知佢講乜,直到近年先明白,呢份工真係咁好玩,令我嘅廿幾歲過得好快活。
記得畢業之前我喺珠海書院打籃球,有個師兄走來問我有無興趣做體育記者,我怕搵唔到工即管試吓,就係咁入行,○三年由馮堅成(現無綫體育主播)介紹入 TVB。最後一關見伍生(伍晃榮),嘩,偶像啊,我好鍾意睇佢報體育,突然就變咗學生見輔導主任咁,佢決定請我之前同我講:「你唔好做幾個月就走,起碼要四年,經歷過奧運、亞運、世界盃,先至係一個學滿師嘅體育記者。」
第一日返工,我好醒神咁行到伍生面前大嗌:「伍生,我嚟返工啦。」點知佢好寸咁話:「你做乜咁大聲,嚇死我,坐低做嘢啦。」你唔好睇佢出鏡講波好搞笑,就以為我跟呢個上司相處得好輕鬆。我話你知,佢其實好惡,而我就成日俾佢鬧爆。
鬧乜?伍生話喎,乒乓就係乒乓,唔係乒乓球、乒乓波;係哥爾夫,唔係哥爾夫球。我嗰時覺得,佢份人又煩又固執,使唔使認真到咁呀。
伍生仲成日話我寫稿長篇大論,完全唔顧畫面。又話呀,我喺報館工作過應該有好多人脈,但無好好利用,收到料都唔識追新聞再包裝出街。最頂住條氣係佢鬧我講波完全吸引唔到觀眾,咁我就通宵寫好條稿啦,點知第日佢就話:「唔得,再改。」喂大佬次次都係咁,我真係超嬲,心諗你個老鬼妒忌我咋啩。
有一段時間,我覺得對住佢好大壓力,你知嘛,好多人因為我姓伍,以為我係伍生個仔,到我離開 TVB之前都仲有人問。於是我就不下 N次同人講:「我都想係,但我唔係伍生個仔。」

行前少少


在無綫十載,伍家謙(右二)採訪過大大小小的國際體育賽事,時常瞓身「扑咪」。二○一二年李慧詩(左)在倫敦奧運女子單車賽奪銅牌,伍家謙搏盡攞料。 

我記得,佢有一段好長嘅時間都在教我寫稿,佢同我講,好嘅電視體育新聞,鋪排要快、爽,有時候更要適當地留白,等觀眾能靜心欣賞體育動態。伍生最為人記得係佢啲金句,好似:「十二碼一係入一係唔入」、「波係圓嘅」,佢嘅經典自家出品我當然唔會抄,但佢啲金句,令我明白講波要過癮之餘,亦都真係要講清講楚。好似曼城阿古路成日搏十二碼,我就點都要講番句:「阿古路,十二碼;阿古路,十二碼,……」估唔到,網民一聽就明我講乜,係咁話我好波。
伍生○五年退休之後,我哋仲成日聯絡。有次我報導乒乓孖寶李靜、高禮澤出賽,出完鏡返到自己個位就收到佢電話,我話:「點呀伍生,又有咩想鬧?」點知佢笑笑口話:「謙仔,你終於可以同人講,話你識得我啦。」嘩,我發夢都無諗過佢會讚我。
伍生話過,有前輩曾鼓勵佢:「除非你喺迫於無奈的情況下要跟隨大隊去行,否則,你應該比大隊行前少少,少少就夠,呢少少,足以令你突出。」
以前佢成日同班編輯吵大鑊,要為體育新聞爭更多時間,唔想得嗰兩、三分鐘。佢唔係為自己出鏡,而係想爭香港運動員得到更多關注。我跑前線知道好多運動員喺鏡頭後嘅辛酸,好想報導佢哋嘅故事,但無啦。

波係圓嘅


伍家謙離開無綫後做自由人,接到的第一份工作,是為名錶做男模。此外,又為香港設計中心做公關、幫網台講波,乜都撈。他承認,名氣,是 TVB賦予他的。(《蘋果日報》圖片) 

我十一年體記生涯,最開心係○九年採訪東亞運動會見到香港足球隊攞金牌,我出道做記者就識得呢班球員,睇住佢哋吐氣揚眉,就好似見到親生仔爭番啖氣。我真係好鍾意做體育記者,係伍生令我深信,我哋都係專業記者:講人性、講公義、講理念、講趣味。
伍生成日講嗰句:「波係圓嘅。」其實有好深嘅處世意思:世事無絕對、體育精神、靈活變通。你問我,既然咁鍾意做記者又點解走? OK你哋成日話 CCTVB,我就話,喺一間機構做咗十一年,話無唔開心就絕對呃你。離開 TVB,我發現有好多平台,可以俾我無拘束限制報導運動員嘅故事,決定就係咁簡單。我會喺東方足球隊、 Hong Kong Online TV報體育,又會用自由身做公關和男模,都要搵食呀。
出鏡十一年,我最記得二○○八年四月十七日,伍生因血癌離世,佢走嗰日,我本來諗住做完嘢去醫院探佢,準備緊六點半新聞嗰陣,突然有同事話我知,佢走咗啦,要準備一則伍晃榮生平出街。我嗰吓真係好難頂,但我知道呢個係伍生俾我嘅考驗,能夠好專業咁報導伍晃榮嘅人生,係呀,伍生,係我呀。

    全站熱搜

    tvb4life 發表在 痞客邦 留言(0) 人氣()