face.jpg


成班人打邊爐熱辣辣,齊昕無啦啦都攞咗李逸朗頂帽嚟戴,超貪玩。見到記者突然衝入嚟影相都唔算太驚訝,又幾淡定喎!《蘋果日報》圖片 

封面

冇錢搭的士 唔願返屋企 醉酒齊昕:帶我去邊度玩

Ads by Google

梁特首女齊昕你永遠估佢唔到,由喺 fb及 ig跟網民開火,到接下曾拍三級片導演的新戲,齊昕行為確係好難捉摸。
更估唔到係齊昕身為 689女兒,又喺倫敦政治經濟學院修讀法律系,原來表面風光,上週現身撐李逸朗音樂會,打的到場竟然要問阿 Don助手借錢找數。
而且特首女兒原來相當爛玩,當日睇騷再食宵夜加埋 5粒鐘,齊昕仲未玩夠,四圍問人仲有冇下場。咁唔想返屋企,為乜呢?

 


24歲梁齊昕夠晒難捉摸。上週一( 16日)突然現身李逸朗演唱會,打的到場的齊昕,忽然問接她入場的李逸朗助手阿端借兩蚊找的士錢,齊昕入場後大方露埋乳貼聽歌,完騷又同 Don直落慶功食雞煲打邊爐。當晚自稱一滴酒都冇飲兼鬧記者「黐孖筋」的齊昕,據在場人士透露,齊昕真係冇飲「一滴酒」,而係一到場便攞住支威士忌吹喇叭好豪氣。

梁齊昕以超 deep V撐阿 Don場,被記者追訪期間,連膠紙移位都唔知。

呢期阿 Don咁 hit,佢幾乎次次現身都戴呢種紳士帽,唔知會唔會帶領潮流呢?

齊昕專登嚟撐李逸朗,專心到連乳貼露咗都唔知。
慶功獨家絕密圖片 齊昕狂食內臟
齊昕原來都幾飲得,喺場內除咗狂食內臟,又飲 Jack Daniel,認真好酒量。

豬肺

雞子
新傷似𠝹手
齊昕左手臂有新傷痕,不過佢冇避忌用衫遮掩。

齊昕亦試過疑似割脈,更上載到 instagram。網上圖片
689全家馬代過年

《蘋果日報》圖片

梁齊昕嚟緊拍戲,老豆梁振英同大仔梁傳昕就被市民拍得喺馬爾代夫旅行散心,有指此行是一家五口到馬代過年,但齊昕蹤影就未被拍得!幾時再見到齊昕呀?
「我哋幾時對戲呀?」

梁齊昕唔只想做 model,下月 8日仲會正式為新片開工,曾執導過三級片的導演劉俊輝(右二)好有信心齊昕會順利拍完。女一齊昕戲中仲會同李逸朗談情添!

當晚除咗枱面有紅色萬寶路煙盒同 Jack Daniel威士忌外,半醉齊昕一見打邊爐亦相當興奮,一邊用筷子狂撩,一邊講:「我最鍾意食內臟。」又問 Don「雞子」究竟係乜,結果鬼妹仔齊昕勇敢試食人生第一粒雞子後即說:「 Oh,有汁嘅?」
齊昕唔只鍾意內臟,對於李逸朗亦顯得相當 like,除咗上台送公仔、賀卡外,宵夜期間仲坐喺阿 Don隔籬,失驚冇神攞埋阿 Don頂帽戴,更同阿 Don講:「我收到劇本喇!我哋幾時對戲呀?」不過阿 Don冇因為齊昕身份而特別遷就,講笑說:「你食雞子啦你!」對於呢位熱情特首千金,阿 Don回應本刊時就好維護:「佢話想對吓戲,大家排練吓好啲,但我最近真係冇時間,我覺得齊昕其實好大壓力,唔好用癲喪去形容佢,對佢嚟講唔公平,佢未至於係咁。」
黐住阿 Don坐


上週一( 16日) Don開完音樂會,拉大隊去西環食豬肚雞煲,期間齊昕不斷撩阿 Don吹水飲酒,就算 Don過枱同其他工作人員慶祝,齊昕都會急呼 Don歸位。除 Don外,齊昕亦跟同屬基督教徒的 Kitty媽好好傾,至於同枱的應昌佑,則以身體不適為由早走。
唔使靠師傅指點
除了現場飲得豪氣外,齊昕亦多次問 Don宵夜後「帶我去邊度玩?」,可惜 Don飲飽食醉後決定返屋企。周圍撩玩失敗,齊昕臨離開仍扁扁嘴眼濕濕說:「個個都走晒喇?」千不情萬不願才返回禮賓府。
至於當晚比齊昕更早走的李逸朗,近排可謂風頭人物!憑〈傻女〉翻 hit工作不斷,嚟緊仲有兩部電影拍,不過有指最近翻 hit,全因有奇門遁甲師傅張芯熏指點。
對於此事,張芯熏師傅透過助手話不便回應,而身為基督徒的李逸朗亦否認此事,他說:「我係識張師傅,係幾年前經朋友介紹,當時搵過佢幫我擺貔貅陣,後來我信咗主啦,我覺得靠自己好啲,呢次〈傻女〉哭腔係藝術創作,絕對冇請求堪輿師傅。如果請教師傅都唱成咁,咁呢位師傅都好有問題。」 Don咁風趣,難怪齊昕咁 like你啦!
有傳奇門遁門師傅張芯熏,教阿 Don擺陣谷旺事業兼唱哭腔〈傻女〉,不過阿 Don就否認說:「幾年前搵過佢擺貔貅陣。」而張芯熏則透過助手表示不回應。

張芯熏師傅

李逸朗擺貔貅陣翻 hit?
梁齊昕好明顯對李逸朗印象唔錯,除咗撐場外,仲成日撩對方對戲,可惜阿 Don話冇時間喎。

李逸朗開騷唔夠 15分鐘,梁齊昕突然現身,幾乎搶鏡過當事人。

〈傻女〉導演版有超過 40萬點擊,不過新歌〈夜機〉暫時只得過千,阿 Don要諗吓計谷吓喇! YouTube畫面

有傳齊昕為男友 Michael而停學回港,齊昕亦因遭本刊踢爆而大發雷霆。網上圖片

李逸朗憑〈傻女〉彈起,即有機會上大台,早前《超級巨聲 4畢業演唱會》,阿 Don仲可以個人表演,人紅待遇係唔同啲。電視畫面
齊昕咁爛玩 去邊度蒲先啱?


齊昕當晚蒲到凌晨兩點都唔想返屋企,不過當晚冇人陪佢癲所以被迫返歸,但即使有人陪,其實咁夜都唔知有咩地方好去,以下幾個地點希望幫到齊昕解悶啦!
旺角黑夜

《蘋果日報》圖片

齊昕咁親民又玩得,最啱落 MK感受下旺角黑夜嘅熱鬧,雖然咁夜冇得鳩嗚,但可能仲有子夜場睇吓,包佢唔會悶。
酒吧睇波


齊昕喺英國留學,自然對足球文化好有認識,落到酒吧齊齊捧皇馬,再大聲爆粗啱晒佢!
大東山捕發哥
凌晨兩點冇嘢做,齊昕又可以行上大東山睇日出,以齊昕步程,兩點開始,上到山應該啱啱好,仲可以隨時捕獲發哥,影張相 po上 fb呃 like!

Come on CY!設計對白
政總靜坐


雖然「雨傘運動」結束,不過齊昕都不妨去門口草地坐吓,感受吓點解咁多人憎佢老豆。
墳場鬼故


齊昕咁大膽,夜媽媽悶悶哋不妨去墳場坐吓,思考吓人生意義,話唔埋諗到新戲嘅演出方法,分分鐘攞埋影后。

採訪、撰文、攝影:娛樂組

    全站熱搜

    tvb4life 發表在 痞客邦 留言(0) 人氣()