靚抽王

做完《愛•回家》,會做乜?

Ads by Google

《愛•回家》呢個大台處境劇,拍到 700集,劇情亦不斷輪迴,不過近幾個月收視不斷下跌,所以有傳將會於今年 5月完結。問題係,據說新一套處境長命劇,又係搵番相同班底,換湯不換藥……既然係咁,就等我哋預言吓,新劇會係點?

 


人樂無窮
合埋眼都知,劉丹會做一家之主,有少少執着但係心地善良;郭少芸會做辦公室女強人,外剛內柔;馬蹄露會做陰濕醜女;林漪琪會係其中一個角色嘅老婆;徐榮或者黎諾懿會係劉丹個仔……呵欠……喺腦海想像一下成個 picture,感覺就好似睇《魚樂無窮》啲魚咁,魚缸入面游來游去都係嗰幾條,極具催眠效果。
童話故事


好耐好耐以前~~有一個屋企,入面有一家人好鍾意一路開飯一路吹水;佢哋喺某間公司返工,辦公室入面有好多偷聽同誤會,辦公室附近又有間餐廳,入面啲員工同老細同間辦公室嘅人又鬼死咁熟,喺餐廳入面又發生好多偷聽同誤會……所謂大台處境劇,就係發生誤會最後化解所有誤會,然後王子同公主同劉丹就幸福快樂咁生活落去~~在世間不聲不語有一種愛啦啦啦~~
錢財如糞土


所謂處境劇,就係無論劇中人有幾多身家,佢哋間屋都非常光鮮亮麗,而且家族中一定有人係自己開公司或食店嘅,而無論佢哋幾窮,都係咁容光煥發,間唔中仲化住妝瞓覺㖭!據網民描述,喺《愛•回家》入面經常出現涉及數以百萬甚至上億元嘅劇情,乜鬼嘢買賣舖位、繼承鉅額遺產,無啦啦會多筆錢或者蝕一大筆錢。但係劇中嘅人物對於獲取或損失大額金錢,通常都好似 689面對市民質詢咁,霸氣地一笑置之。令人覺得錢財係糞土,香港啲地多到用唔晒,全部香港人都有屋有田又有地。劇入面嘅香港,係一個無窮人無社會問題嘅烏托邦,一個堅「離地」城。
結論:
下一套處境劇嘅處境,咪又係不斷輪迴?收視好就添食,間唔中加啲新角色入去,收視唔好就 cut,你想睇新嘢?夠鐘喇, BBQ喇,算罷啦!
公式王
眾所周知,創意係冇公式的,所以乜嘢係有公式?冇創意咪有公式囉!此欄目專為恥笑冇創意嘅公式所製造。

    全站熱搜

    tvb4life 發表在 痞客邦 留言(0) 人氣()