靚抽王

識做,梗係做熒幕情侶啦!

Ads by Google

熒幕情侶呢家嘢,真係古已有之,粵劇時代已經有。粵劇太遠唔講,淨係講以前劉德華同陳玉蓮呢一對,已經係非常深入民心。到後來嘅劉華+鄭秀文,一齊拍咗好多部電影,票房加加埋埋,相信連佢哋自己都唔識計!不過最令觀眾疑惑嘅,係一啲難分真假嘅情侶檔,例如係「翠如 BB+洪永城」、「翠如 BB+蕭正楠」呢兩對咁。究竟情侶檔呢家嘢,傳出嚟嘅緋聞孰真孰假?今次就等我哋分析吓:

 


電視界熒幕情侶:收視保證
講到熒幕情侶,點會可以唔數到「汪明荃+鄭少秋」呢一對?由 1976年《書劍恩仇錄》開始,到《楚留香》,甚至到咗 2011年嘅演唱會,都仲用緊「情侶檔」呢招嚟吸引大眾。點解?根據知情人士透露,對電視製作單位嚟講,「情侶檔」係一種收視保證,今次拍一套《書劍恩仇錄》,呢孖熒幕情侶受落,拍第二套,就可以保證收視。而既然大家拍住上咁好,多啲合作又有乜所謂?講開又係,睇番其他經典情侶檔:陳慧珊+羅嘉良、陳秀雯+馬景濤、張智霖+佘詩曼,有邊一對唔係拍完一套又一套?你睇吓《十月初五的月光》仲要翻拍埋電影㖭!有着我又有着你,真係好賺好多~~

 

電影界熒幕情侶:票房保證+導演指名


電視講收視,熒幕情侶當然都幫到電影嘅票房啦!好似劉德華+鄭秀文呢一對,明知佢哋喺現實生活中唔係情侶,都一樣咁受歡迎。另一方面,你都知拍電影唔同拍電視,電影導演嘅權力大好多,尤其是杜 Sir呢啲大導,好講啲演員夾唔夾(即係聽唔聽話),佢同「鄭秀文+劉華」呢對組合咁有默契,亦係電影裏面出現熒幕情侶嘅原因。
歌手界熒幕情侶:增加廣告收入/登台機會
近日唱〈傻女〉嘅李逸朗,有報道指首歌係唱俾剛剛新婚嘅蔣雅文聽。查實佢哋以前都係英皇娛樂嘅歌手,組成情侶組合「 Don& Mandy」,除咗一齊出席大小場合,仲有幾首合唱歌。點解要搞情侶歌手組合?據唱片界人士透露,呢種情侶組合可以增加見報率,有感情先有是非,有是非先會見報上雜誌。而只要見報率增加,歌手嘅廣告收入,同登台機會先會提升,講咗咁耐,都係錢啫!通常呢啲同一間唱片公司組合嘅師兄妹,都係唱片公司做新聞做出嚟,就算傳聞滿天飛,都唔好以為佢哋真係情侶咁天真豬呀。

難分真與假情侶


嗱,熒幕情侶有分兩類,第一種,就係劉華同 Sammi呢種,即係明知冇嘢,但係鍾意睇佢哋一齊做戲,呢啲冇乜好講;第二種,就係不斷傳緋聞,甚至係默認緋聞嘅,例如係「黃翠如+洪永城」同「黃翠如+蕭正楠」呢兩個組合咁啦。黃翠如連續兩次都係同工作上嘅伙伴傳緋聞,而且,佢又真係喺呢兩段戀情發展時期都撈得幾掂喎,咁你話係真定假嘞?
疑似擦出愛火花情侶


嗱,講咗咁多欺騙觀眾嘅假情侶,係時候講啲堅嘢。不過學志雲大師話齋,真作假時假亦真,有啲熒幕情侶都真係會擦出愛火花嘅。好似方力申+鄧麗欣呢一孖人咁,一齊喺金牌大風度做歌手,一齊唱咗幾首合唱歌,拍咗幾套乜乜愛、愛乜乜咁 MK系愛情電影,得閒傳吓緋聞。當大家以為佢哋又係玩嘢一齊搵銀,點知原來係真!最終喺 2010年同遊馬爾代夫,承認戀情,極有可能係一齊唱歌拍戲代入感太強,終於愛上對方。恭喜晒!
XX進化屎
冇乜點嘅,同大家研究吓娛樂圈裏面嘅進化血淚屎咁啫。

文:娛文樂

    全站熱搜

    tvb4life 發表在 痞客邦 留言(0) 人氣()