家燕姐已經成為大台新年嘅標記,年年都一定要播佢啲劇。 

娛樂講呢啲

年年喜相逢

Ads by Google

年頭是為電視劇集淡季,視帝視后又頒完,冇嘢好爭,惟有是是但但開開心心。有時都幾佩服大台班編劇,《倩女喜相逢》角色名照抄,造型照抄,配樂照抄,加幾個人物講幾句花開富貴又玩十五集,呢招拜年認真慳水慳力。


原本只打算開着部電視過吓眼神,目標其實係等睇下一檔蘇師傅講羊年運程,但當見到薛家燕由破廟地下爬出嚟,都真係忍唔住笑咗。「聶小倩」可謂港產電影史上最經典女鬼品牌,以清純美艷見稱,絕對是我見猶憐。撞鬼你咩,冇見一排王祖賢走晒樣已經好難接受,現竟由家燕媽媽接棒,芳齡明明六十有四但夠薑自稱十六,都咪話唔攞膽。這個「小倩」為了報恩日日囉囉攣,令人不期然想起《真情》裏的好姨要生要死又要刀仔拮大髀;玩完情深款款,轉個頭彷彿又見《皆大歡喜》裏豪邁奔放的慈姑在載歌載舞……係好低能,但我真係覺得家燕媽媽好勁。

去年賀歲劇叫《新抱喜相逢》,今年就叫《倩女喜相逢》(前名:《倩女失魂》),連改名都要抄番以前。


藝人總有一些節日角色設定,正如鬼節會見到羅蘭,中秋會見到曾志偉,過年過節,首選一定係薛家燕。她近年多做主持,已甚少拍劇了,去年這個時候也有套《新抱喜相逢》。對,又係「乜乜喜相逢」,即係說明這條拜年橋行得通,今年照辦煮碗,個名係咁意改少少就算。薛家燕也的確有種能人所不能的親和力,即使表情動作永遠誇張,但只要她那雙腰果眼一出現,觀眾像吃了靜心口服液,無論幾唔順超都立刻戾氣全消。看她樣貌,會感受到快樂;看她身形,會感受到福氣。就算你不特別喜歡她那套笑口噬噬,肯定你不會討厭她的苦口婆心;可能你會嫌佢煩,但諗深一層,又知佢冇惡意兼其實為你好……情況一如自己阿媽。
能凝聚細路到阿婆的藝人,香港冇幾多個。家燕媽媽的入屋程度若然認了第二,相信冇人敢認第一。民間特首既有劉華,那薛家燕就算做唔到政務司司長,點都有資格撈番個行政會議成員。見到佢你已嬲唔落,到時拍套《高官喜相逢》,試問邊個仲會話班友 X街?

家燕姐嘅小倩造型,同王祖賢(右)嘅經典造型比起上嚟,擺明就係搞笑版啦。


撰文:林蕾

    全站熱搜

    tvb4life 發表在 痞客邦 留言(0) 人氣()