13日傍晚,本刊記者在尖沙嘴遇到羅霖,她力撐自己係新公司創健環美老闆,冇違反合約。 

滾熱辣

涉違約另接廣告 羅霖食兩家茶禮

Ads by Google

12年 10月,羅霖被周刊影到北京瘟花𡃁,翌年羅霖與劉坤銘疑涉家暴離婚,帶着細仔開始新生活,當時她曾自爆:「過去一年經歷人生低潮。」
為爭撫養權兼搵錢養仔,羅霖谷胸做詩琳醫學美容代言人。廣告出街後,人氣反彈,她更接拍陶傑的《愛•尋•迷》。
去年羅霖冧莊再為詩琳拍廣告,不過合約未完,羅霖竟替同類型的創健環美拍廣告,食兩家茶禮。據知詩琳老闆娘陳太得悉後震怒,更表明會追究到底,甚至訴諸法律。

踏入半百的羅霖,是圈中美魔女。 13年詩琳以百萬酬勞,找她做醫學美容的代言人,去年更加碼續約。不過與詩琳的合約未完,羅霖涉嫌食兩家茶禮,為另一間醫學中心創健環美拍廣告。
代言元朗分店

12日晚上,本刊在《衝上雲霄》的首映禮上,向詩琳老闆娘陳太詢問有關羅霖替另一間醫學美容中心拍廣告,陳太聽後迴避說:「哎吔!今日咁開心唔好講呢啲嘢啦!」說罷匆匆入場睇首映。

上個月,創健環美的元朗分店開幕,更將她、伍詠薇及肥媽的合照廣告,大大幅掛在舖頭外。近月來,羅霖不但頻頻出席該公司的宣傳活動,自稱是創健環美老闆之一的她,更在微博大力宣傳,明剃舊公司詩琳眼眉。據知詩琳老闆娘得悉後震怒,與友人呻爆。
「嗰時 Candy(羅霖洋名)搞離婚, Fanny(詩琳老闆娘)見佢一個女人,要湊 3個細路好陰功,咪幫吓佢搵佢做代言囉! Fanny仲成日煲啲靚湯俾佢飲㗎!不過有人咁反骨,食兩家茶禮, Fanny梗係嬲爆!」知情者說。
7月才約滿
2月 13日,本刊就食兩家茶禮一事求證羅霖,她笑言是一場誤會,更辯稱︰「我係老闆,唔係代言,其實仲有個大老闆嘅!我同詩琳七月至約滿,冇抵觸㗎!嗰個係代言人,呢個係老闆,所以係兩回事。同埋呢間公司主力唔係做生活美容,最重要係做健康中心,及 BB臍帶血庫呀!」
不過,羅霖最初提起創健環美時,雀躍地滔滔不絕向記者介紹該公司的醫學美容儀器如何先進,又強調駐場醫生由美國及瑞士名醫訓練出來,話題全部環繞醫學美容。
問到她為創健環美拍廣告前,有沒有通知詩琳,她說︰「梗有啦!詩琳老闆陳生陳太,叫我呢間公司大老闆做契仔㗎。」
本刊致電陳太,因她與老公出埠,由詩琳發言人馮小姐代覆,稱陳太最近才知悉羅霖替另一間公司做代言,「陳太梗係嬲!(羅霖份合約係咪 7月至完?)其實大家簽咗保密協議,唔可以透露合約內容,否則就唔專業。(佢違反咗合約?)只能講羅霖到呢一刻為止,仲係詩琳醫學美容嘅代言人。」
有冇違約 視乎防競爭性條款
記者就羅霖事件諮詢梁永鏗律師,他表示︰「有冇違約同兩個廣告有冇抵觸,要視乎合約條款,有冇寫明是唯一的代言人。不過一般做代言人合約,公司為了保障利益,都會寫明防競爭性條款,唔會俾代言人做另一間。當然,如果有防競爭性條款再接同類型廣告,就是違反合約精神。」

詩琳
羅霖喺詩琳(上)同創健環美都係推銷 Ultraformer美容機,屬同類型產品,明眼人都睇到有問題。

創健環美 微博落力宣傳
去年 7、 8月開始,羅霖的微博,不時上載創健環美的活動,落力宣傳,但並非她口中的臍帶血,而是美容機。

百分一股份
羅霖自稱係創健環美老闆之一。元朗分店開張,羅霖大大個廣告牌做宣傳。

羅霖連深圳分店都出席宣傳,自己生意係唔同啲。

根據公司註冊處資料,創健環美的大老闆姓陳,他於去年 7月,將 1,000股份內的 10股( 1%)轉讓給羅霖。
循法律途徑處理
談到羅霖自稱是創健環美的老闆,所以冇抵觸。馮小姐說︰「或者大家對宣傳嘅定義有唔一樣嘅演繹。不論係咩身份都好,做咗宣傳效果就係宣傳,呢個道理好簡單,最緊要係清晰個定位同角色。(會否循法律途徑去追討?)有待研究,因為都係啱啱知,好多嘢未清楚。如果有人違反咗合約精神,當然會處理啦!作咗最壞打算,會由法律途徑去追究。」
另外問到陳太與創健環美老闆是契媽契仔關係,馮小姐說:「生意就是生意,公還公,私還私。」
詩琳企硬要追究,羅霖的態度亦寸爆:「冇喎(收律師信)!一場誤會啫!(之前你離婚詩琳幫你翻身,怕唔怕人哋話你反骨?)其實佢唔係第一個(幫我)囉!有好多人囉!所以我好感恩,覺得合作同識朋友都要講緣份啦,陶生(陶傑)都幫過我啦!唔好話邊個幫邊個,合作嘅嘢,最緊要可以幫到大家囉!」
呢頭話感恩嗰頭就寸嘴,看來羅霖與詩琳隨時爆合約官司,大家不妨擔定櫈仔!

去年 8月,羅霖為詩琳拍廣告時,陳太帶埋燕窩去探班。當時羅霖勁冧。

當日羅霖主動冧陳太,更熱情攬住對方錫面。原來當時私底下,羅霖已暗中幫創健環美做宣傳。

羅霖計劃多多,本月 14日出席活動時,表示下月會到韓國拍寫真。

拍詩琳廣告令羅霖人氣反彈,之後她接拍電影《愛•尋•迷》,但票房失利,五日僅收 53萬。
羅霖得罪人多
羅霖近年活躍娛圈,自離婚後,她要自力更生,不過,她對事對人卻沒有因此而圓滑,反而常常得罪人,是非纏身。


李彩華 因財失義
2010年李彩華在前寰宇老闆娘趙雪英介紹下,試用羅霖作經理人。不過李彩華與羅霖合作三個月後便反目。有指李彩華不滿羅霖沒有為自己接過任何工作,即使是趙雪英介紹拍的內地劇,佣金也落入羅霖手中。


黎燕珊 互當透明
黎燕珊與羅霖分別為「仁美清敍」的會長及主席, 2012年尾有傳黎燕珊不滿羅霖「夾」師妹北上出席活動後陪政協,兩人出席活動時更分開企互當透明。最終要「亞姐之父」葉家寶拉她們才可勉強合照。其後羅霖辭退主席一職。


黎淑賢 姊妹反目
羅霖與黎燕珊傳不和時,黎淑賢公開指「仁美清敍」混亂藉以撐羅霖,兩人本是好姊妹。不過, 2013年中傳出黎淑賢婚變,羅霖出席活動時,指介紹律師予黎淑賢搞離婚,黎淑賢當場拉羅霖向記者否認婚變,死撐搵律師改名而已,事件令兩人反目。


張慧儀 被寸小三
羅霖與張慧儀早在拍處境劇《真情》時已傳不和,去年兩人同場拍「詩琳」廣告時,羅霖與男主張國強講:「我係正室,佢(指張慧儀)係小三。」明寸張慧儀昔日在《真情》時飾演小三。

採訪、撰文:娛樂組
攝影:攝影組

    全站熱搜

    tvb4life 發表在 痞客邦 留言(0) 人氣()