理翔學會除咗有銀彈攻勢送機票,仲出動高登仔最受落嘅「靚女加黑絲」,可惜最尾都係輸咗俾對家! 

U Spy

恆管管理學會 豪送日本機票谷宣傳

Ads by Google

大專學會過百個,想突圍一定要諗吓計,最近 Spy個 ig,就比恆管一個候選管理學會洗版,很多學生企埋去理翔個攤位影相,原來係候選學會為吸引同學投票,竟然出銀彈攻勢,豪送兩張日本東京來回機票同中山豪華團套票,只要同學將合照放上 ig,最多人 like就可以得獎。

 

理翔豪送機票吸票,已令對家內閣非常不滿,於是對手送出大量 usb、充電器同水樽,希望以海量禮物抗衡。理翔委員同 SPY講,「其實我哋機票錢,都係贊助得來,我哋唔想又係每年例牌嘅 file、 usb、手帶交行貨,咪決定當大獎咁送出去囉。」雖然送機票夠晒吸引,但呃完機票係咪投票畀你又係另一回事,最終結果以 4票落敗,送機票都輸,下次可以諗吓送樓囉,一定贏硬。


理翔唔單止有靚女,原來仲有上屆 UStar校草最後二強「恆管王力宏」黃鍵安(Leo)坐鎮,靚仔之餘又有綽頭,梗係拎嚟做生招牌啦! 

對手送尿袋 

對家內閣見理翔連機票都送,即刻大派 usb、充電器(尿袋)同水樽等禮物,實行用人海戰術,「貴多不貴精」。

學界飛人 培正爆冷贏男拔

港九 D1學界田徑賽出晒名好氣氛兼緊張刺激,今年又點會例外呢?聽住廿幾間啦啦隊激情澎湃嘅打氣聲,令 Spy都燃起心中嗰團火,其中拔萃男、女書院更加坐正對住終點位,十足半個主場,比我係拔萃學生都搏老命跑。不過又點估到今年甲組男、女子 100米飛人,竟然大爆冷!
分別由嚟自培正嘅劉建希同聖保祿嘅楊鍩希跑出,賽後 2位飛人例牌話冇諗過可以脫穎而出,佢哋仲話能夠拎冠軍,全靠過去嘅努力同教練嘅幫助(指定對白),不過點都好恭喜晒啦!


培正嘅劉建希(中)上年 100米決賽原來只得第 6名,今年卻以 10秒 75成績奪得金牌,令在場人士刮目相看。 

女拔失金落淚 

喺女子 4× 100接力,大熱嘅女拔(藍衫),頭 3棒都領先德望(黃衫),但最後一棒比對方過頭,失落金牌,隊員賽後失望落淚,要同學安慰。

撰文:校園組
攝影:何榮亮

    全站熱搜

    tvb4life 發表在 痞客邦 留言(0) 人氣()