靚抽王

藝人點解齊齊做政協?

Ads by Google

有報道指星爺參加廣東政協時俾人圍,一向深居簡出嘅佢,點會捨得拋頭露面做啲唔等使嘅嘢吖?問題係,嗰啲同政治扯唔上關係嘅藝人,何故爭住做呢個政協?等我哋嚟考究一下個原因喺邊先:

 


冷知識:政協=中國人民政治協商會議=共產黨開會改善民生
原因 1 搵食啫,犯法呀?
曾經喺香港玩過一字馬同埋拍過三級片嘅彭丹,早年返大陸拍咗好多歌頌祖國嘅戲,再開埋電影公司,拍咗幾部歌頌祖國嘅戲,終於做到甘肅政協。喂,搞咁多嘢,唔通真係乜乜乜咩?唔通拍三級片又係為祖國?都係搵餐飯食啫!
原因 2 做政協乜都唔使做


影帝曾志偉都係江門市嘅政協,不過比其他藝人醒好多,佢已經請假四年,次次開會都唔見佢。係喎,有個朵,又唔使做,幾好呀!
原因 3 返鄉下威


陳小春轉戰強國拍劇,又做埋惠州政協,據說佢鄉下就係惠州。係囉,你唔記得你喺香港出道?唔緊要嘅,你家吓食強國住強國,仲做埋政協,可以返鄉下同啲鄉里威吓啦!
原因 4 禁毒


各人做政協都有唔同理由,但唔係人人都為咗私利嘅!好似成龍大哥咁,佢做政協,係想宣揚愛國思想,而身兼禁毒大使嘅佢,當然就要發揚禁毒思想啦!我相信佢係 100%真心……膠,因為佢自己個仔都未俾佢影響到,仲話要影響全中國?
原因 5 環保


星爺今次出席廣東政協時,聲稱今次會就環保問題提案。其實唔好話廣州,香港都有好多問題,極需要好似星爺呢啲有識之士出聲㗎。不過我哋得 700萬人,邊夠十三億人重要吖!
荒謬現象學
每期荒謬現象學為你解構娛圈嘅不尋常現象!

撰文:娛文樂

全站熱搜

tvb4life 發表在 痞客邦 留言(0) 人氣()