蔡欣熹 

名人潮

周美鳳大女 蔡欣熹 登場  I want to be a model

Ads by Google

名人二代有屋企做最強後盾,當然贏在起跑線。
周美鳳大女蔡欣熹( Florence),將踏入 24歲,初出茅廬已經試過做拍賣行、畫廊。如她母親所講,女兒每步都有 short cut,可以快人一步。事業有人扶住上,自然平步青雲。
不過人人都有夢想,有時得到的未必是自己所想。自小見慣明星、名模的蔡欣熹,最希望入娛樂圈發展。最近她踏出第一步,為御用化妝師影造型靚相,一試上癮。「經過呢次之後,我諗我可以試吓做 model,我覺得自己都幾上鏡。」阿媽人脈廣,理應有條康莊大道入行,點知周美鳳唱反調︰「我唔會幫佢入行,影相玩吓就得!」

 


有指九十後搵工有「腌尖」特性,轉過三次工的蔡欣熹,亦戮力尋找自己所好。
蔡欣熹於美國哥倫比亞大學畢業,主修藝術歷史,回港後她去過拍賣行、畫廊打工,現於《 HONG KONG TATLER》任職社交版編輯。「之前兩間都唔係太適合,我唔鍾意坐定定做嘢,加上我中文又唔夠好。我較鍾意識新朋友,同其他人傾偈,依家份工做咗半年。」

周美鳳與大女蔡欣熹餅印一樣,連衫褲鞋襪都可以 share一齊着。

蔡欣熹早前替化妝師 Wing Wong影造型靚相,以性感打扮上陣。

身材惹火的蔡欣熹,平日衣着極保守,她指這次造型已是底線。

將踏入 24歲的蔡欣熹,樣子成熟,配合淡妝、斯文打扮,帶出另一感覺。
唔幫阿媽打工
蔡欣熹愛好創作工種,除了鍾意寫字亦愛與人溝通。既然媽咪是公關公司老闆,在社交圈人際網絡廣,應順理成章幫阿媽打工。「因為媽咪嘅工作,我會見好多人,有啲人見到 artist會好 shock,嘩!明星呀!我已經習慣咗,就冇呢個反應。試過有啲男仔朋友,話好鍾意周汶錡,話佢好靚,我話我都識佢㗎!佢哋聽到好驚訝。但我唔會入媽咪公司,我覺得做 PR好辛苦,因為要受氣,我應該做唔到,我都好 respect啲女仔做 PR。」

因媽咪關係,蔡欣熹與圈中人熟稔,當中包括名模周汶錡。

蔡欣熹與王曼喜老友鬼鬼,不時孖住周圍去,她更力讚對方有愛心,周圍幫人。

有 model父母的王曼喜,是兼職模特兒,蔡欣熹希望向她偷師。
入行做模特兒


做阿媽員工,蔡欣熹耍手擰頭,不過講到娛樂圈,她表現特別雀躍。「其實我覺得做 artist係一件好難嘅事,要時刻保持最 fit狀態,要好百變。」見得多明星、名模,她亦希望成為一分子。「我都有諗過入行,以前想試吓做演員,但我覺得我中文唔夠好。依家想試吓做 model,之前影咗幾輯相,覺得都可以試試,影相過程扮唔同造型,其實幾好玩,我覺得自己都幾上鏡。我讀大學嗰陣都行過兩次 catwalk,好想喺香港試吓。」
唔着衫 no way
在外國長大唔等於性格 open,蔡欣熹於國際學校讀書,開口滿是外國口音,外表極西化。不過鬼妹仔性格的她,衣着保守程度比阿媽更甚。訪問當日,蔡欣熹望住 deep V裙,雙手揞胸說︰「嘩!會唔會太低,會唔會太 sexy。」模特兒事業十劃都未有一撇,但她已定下底線:「最近見到 Jacqueline啲相,唔着衫咪咩都露晒,咁我就接受唔到, bikini都未必得。之前影嗰輯相都差唔多係底線,最好唔好太暴露。」
身旁媽咪周美鳳忍唔住插嘴,「佢思想好傳統,我覺得後生女,有時打扮性感少少都 ok啦!佢會話有啲衫太暴露,要加番塊布。」
愛女心郁入娛圈周美鳳︰你問我想唔想,我就話唔想。
周美鳳與大女蔡欣熹感情極好,雖則二人性格極端,但每次嘈交後,好快又做番老友,兩母女無所不談。「講佢真係又愛又恨,切肉不離皮,我梗係愛我個女。我成日都同佢兩姊弟講,無論發生多大嘅事,屋企都係 only place接受你。由細到大灌輸佢哋,好處係依家佢哋幾大秘密都話俾我聽,識咗男朋友點呀!同佢做啲咩呀!我覺得俾佢好大 support,但我都希望佢獨立啲。」周美鳳笑住回憶。

鏡頭前周美鳳力數囡囡大頭蝦,經常唔見嘢!不過提到愛女窩心事,她即冧爆,甜到不得了。

口裏說不,身體卻很誠實。周美鳳希望囡囡更獨立,不過訪問當日,她全程照顧十足,果然係廿四孝阿媽。

每個母親都會為女兒準備嫁妝,周美鳳亦買下不少,「我依家唔會俾佢住,佢太過失魂喇!」
唔想愛女入行

周美鳳就算工作有幾忙,都堅持帶仔女周圍去,真係錫到燶。

港姐出身的周美鳳,投身演藝事業,之後由幕前轉型從商,成為公關公司老闆,事業一帆風順。對於囡囡蔡欣熹有意做 model,她起初說︰「好似啲魚游水,係有魚要游出嚟,你都冇辦法喎!只要安全環境,鍾意點游就點游。依家趁後生,如果試吓唔同行業, why not?」
阿媽看似全力支持,不過講到若女兒全情投入,踏足娛樂圈,周美鳳則有意見,「你問我想唔想,我就話唔想,因為太辛苦,同香港都冇娛樂圈,冇電影,電視得一個台,劇集唔多,做嚟冇意思。我唔覺得佢會做得耐囉!因為咁辛苦,佢制咩!我覺得佢做完 model,拎啲衫會唔見幾件囉!佢咁失魂。我唔會幫佢入行,影相玩吓就得!」
阿媽着紅燈,蔡欣熹惟有轉口風,「可以試吓,攞經歷囉! Not long term囉!」
慈母寶物
媽咪心目中,仔女永遠排第一位。周美鳳指小朋友成長階段,有很多事值得回憶,所以她收藏了多箱有關仔女兒時物品。
cute爆學生證


蔡欣熹 4歲已經開始返興趣班,她的兒童證,周美鳳亦保留至今。
極罕牙仔


除了收藏衫仔鞋仔,周美鳳更儲埋仔女的牙仔,仲會記低每隻位置。

撰文:蔡靜雯
攝影:劉玉梅
錄像:蔡政峰
化妝: Wing Wong@ iMAKEUP WORKSHOP
髮型: Terrence Chan@ HAiR(蔡欣熹)、 Kelvin Koo@ HAiR(周美鳳)
服裝: Escade(周美鳳)
場地: Jean-Paul Hévin

全站熱搜

tvb4life 發表在 痞客邦 留言(0) 人氣()