郭炳江入獄後手起刀落,一次過剁走十幾名律師,連一直落力嘅資深大律師駱應淦亦因失言慘被炒魷。插圖:祝健中 

八卦陣

衰多口惹禍 郭炳江炒駱應淦

Ads by Google

新鴻基地產前聯席主席郭炳江,因串謀公職人員行為失當,被判入獄五年,雖然佢已申請咗保釋等候上訴,但要等到三月十六日先開庭,惟有喺獄中過年。律師團隊同壹仔講,今次郭先行申請保釋,已經同其他三個被告許仕仁、陳鉅源同埋關雄生傾好咗,因為佢哋都覺得郭炳江最有機會甩身,如果佢申請成功,其他被告就會去馬。

 


審訊期間郭炳江律師團隊原本好「疊馬」,大狀同律師加埋十幾人,陣容可謂星光熠熠,除咗英國御用大狀 Clare Montgomery之外,仲包括資深大律師駱應淦、余承章、夏偉志等,訴訟費估計要五億元。但據聞郭炳江覺得使咗咁多錢都要坐監,決定只保留主帥 Montgomery、余承章、大狀蔡一鳴;連有刑事案「四大天王」之稱嘅駱應淦都慘被炒魷魚。
知情者話,駱應淦嘅死因仲有一樣,事緣佢喺郭炳江判刑後當住全港記者話,郭生唔會申請上訴減刑,因為「判刑唔係重,刑期公道」。說者無心,聽者有意,據聞呢番話令坐緊監嘅郭炳江「好唔開心」,所以怒炒大狀,今次駱應淦都可以話係老貓燒鬚!
好多律師又同壹仔投訴,自從呢班名人入冊,做咗陳振聰同楊家誠鄰居後,律師團隊經常出入赤柱,搞到「 Cat A」(甲級犯人)好難探監,原來嗰度得三個探訪室,懲教署熱線電話又長期打唔通,打得通已經 book唔到房,行家都要鬥早訂房,真係難買過演唱會飛。
歐耀佳擬帶隊選醫學會

蔡堅(右)曾經推史泰祖(左一)坐上醫學會會長個位,但政見不同面左左。蔡堅繼而打歐耀佳(左二)主意,邀請佢參加下屆醫學會選舉。(王偉洪攝)

呢輪流感大爆發,醫生忙到有氣冇定抖,不過一班有心醫生組成「杏林覺醒」,上週六開記者會講政改,有公立醫院醫生捱完通宵都嚟撐場。所謂長江後浪推前浪,出席記者會嘅醫學界立法會議員梁家騮、醫學會會長史泰祖、元老級蔡堅、佔中醫療隊負責人歐耀佳,同呢班新臉孔已經隔咗幾代。蔡堅睇中呢批醫學界新人類同佢一樣咁熱血,於是鼓勵歐耀佳帶啲新鮮人,參加下屆醫學會選舉。
蔡堅呢位醫學界教父,推史泰祖上位做會長,但兩師徒為咗做唔做政改民調出現拗撬。今勻蔡堅再做推手,似乎要改變一向保守嘅醫學會。咁被睇中嘅歐耀佳又點睇?歐醫生話社會環境唔同咗,都會考慮吓。除咗醫學會,呢個界別嘅兵家必爭之地仲有選委會,上屆醫學界三十席之中,只有兩名泛民成員郭家麒同歐耀佳跑出,據講今屆可能有多幾位泛民醫生出嚟爭。
周融 hea搞政改街站
聲稱佔中成功就會離開香港嘅周融第 N度復出,生命力比亞視更強,上星期四又開記者會,事先張揚「保普選反佔中大聯盟」會大搞政改宣傳活動,又會好似上次反佔中咁,大搞街站派傳單喎!不過對比起舊年八月反佔中,今次好明顯係 hea搞,記者會只有周融同埋吳秋北兩個「台柱」。
曾經「星光熠熠」嘅街站,今次不但唔出採訪通知,甚至左報收到採訪邀請,都要專登 mark住唔好外傳,我哋睇番第二日報紙,有報導「大聯盟」搞活動嘅只得《文匯》、《大公》同埋《商報》。阿爺放水維穩,理論上愈多傳媒講愈好,何解咁鬼祟呢?
答案原來好簡單,睇番「大聯盟」個網頁,佢哋真係有唔少街站,有啲仲同時派埋揮春,兼且可以登記拎年糕添!但係睇晒所有相片同咁多份左報,原來周融竟然笠咗水,完全無落過去啲街站,做臨時演員都要精神啲啦,咁樣 hea得滯囉。

上星期四公布政改宣傳活動嘅記者會,只有周融同吳秋北兩大台柱,比起反佔中時個陣容真係失色不少。(王偉洪攝)

星期日報導「大聯盟」派傳單活動只得「文大商」三份左報,原來周融連街站都懶得落,唔怪之得連採訪通知都唔出啦。
《文匯報》老屈法律界男神
作為傳媒,無論係左中右立場,確保刊登資料無誤可以話係普世價值,不過官媒《文匯報》就當然例外。繼佔領時期話黃之鋒接受過美軍海軍陸戰隊格鬥訓練之後,上週六一篇有關「法政匯思乃公民黨 B隊」嘅評論文章,真係錯到離晒譜。
例如評論提到,法政匯思召集人任建鋒曾受聘港大法律系,已經大錯特錯,文章又話佢哋邀請港大法律學者張達明做嘉賓,仲話張達明係公民黨成員,實情當然無啲咁嘅事,人物背景錯到亂晒龍,認真創意無限。
最好笑係評論話法政匯思另一召集人、被稱為法律界男神嘅梁允信係「反對派御用律師」,不過只要上網查吓,就會知道男神係霍家爭產案霍震霆嘅代表大律師,最近又受到律政司司長委託,介入醫管局訴訟案件,唔通官媒想曲線話霍震霆同袁國強都係反對派?

法律界男神梁允信無端白事變反對派御用律師,其實佢做過乜嘢 case,上網查吓就知,不過官媒作者可能身處極權國家上唔到 Google。(羅國輝攝)

王征月花十萬 住超豪套房
亞視員工被拖糧咁耐,大股東黃炳均同主要投資者王征就隱形咁耐,但我哋收到風,原來王征一直身在香港,住喺九龍站上蓋嘅服務式住宅港景匯,每月租金十萬起,而且仲係住頂層單位,認真識歎。
港景匯由新鴻基地產管理,孖住 W酒店,樓下係酒店房,五十至七十樓就係服務式住宅,大部分屬開放間隔嘅 studio,其次係一房單位,而兩房同三房單位就更加少。曾經去過王征私宅嘅人話,佢好鍾意帶朋友上去參觀,單位有幾間房,頂樓加海景,景觀無得彈。
九龍站係強國富豪至愛,單位租金當然有番咁上下,兩房同三房單位月租由十萬至十四萬元,包水電雜費,但每月五百蚊上網費要額外俾,除開呎租八十八蚊起,仲高過呎租七十五元起嘅西半山豪宅天匯。據講港景匯租客可免費使用健身室同 W酒店嘅泳池,啱晒鍾意睇亞洲先生嘅王征。至於食方面,九龍站雖然有好多食肆,不過據聞王征至愛隔籬嘅 Ritz-Carlton餐廳。

王征

港景匯的兩房同三房單位最搶手,已經出租晒,只剩番一房的示範單位。(江彥林攝)

王征投資亞視二十億元,每月十幾萬租金濕濕碎,但對等出糧的員工嚟講,就已經可以打救唔少家庭。(江彥林攝)
浸大發指引惹噤聲疑雲

邵家臻喺浸大 office受訪,可以安心大講佢本月尾出嘅新書《佔中,我識條鐵》,版稅會捐俾團體「撐傘落區」,資助有意參選區議會嘅年輕人。
(郭永強攝)

大學本來係自由嘅堡壘,傳媒向來都可以自由喺校內進行採訪。不過浸會大學社工系講師兼佔中死士邵家臻就話,上星期四該系教職員開會,系主任突然手揸一份指引,話浸大要求教職員在任何拍攝錄影嘅場合,包括喺自己 office做訪問,都要向傳訊部申請,而且拍攝嘅內容只准同教學用途有關,並會喺星期五生效。教職員都覺得咁做法唔妥,質疑校方係咪想收窄校內言論空間。
無獨有偶,本刊記者星期五到浸大採訪學生會活動,無幾耐就有戴口罩嘅職員要求記者停止拍攝,即使記者表明身份,職員亦要求要先向傳訊部申請,做法前所未見。後來公關現身調停,先至話場地由學生會 book咗,唔需要申請。
本刊當晚向各大院校查詢,有冇要求教職員受訪或記者採訪前要事先申請嘅相關指引,各院校都話冇,浸大亦回覆話尊重言論及新聞自由,事件係「一場誤會」,可能係新同事搞錯咗,校方只有指引針對「商業拍攝」,如拍電影或廣告等就要事先申請。咁就一天都光晒,有校方白紙黑字承諾,浸大師生可以繼續暢所欲言喇!

centipede@nextmedia.com

全站熱搜

tvb4life 發表在 痞客邦 留言(1) 人氣()