逼自拍打卡報到黃翠如十大規條鎖蕭正楠

因拍劇而撻着的蕭正楠和黃翠如，自上年五月被踢爆拍拖後，打得火熱，女方不時送上門到男方家過夜外，又齊齊出埠預支度蜜月。

Ads by Google

二人睇落好恩愛，去邊都孖到實，實則由「小三」升呢坐正的翠如BB，話晒過來人，為阻其他女埋男友身，要蕭正楠嚴守十大規條，除禁同女性合照、不准接載女藝人、拍親熱戲要事先申報外，還逼對方所到之處打卡自拍報到及上繳所有手機電郵密碼等。

近日她更變本加厲，索性箍埋男友搬到大埔築愛巢，實行全天候廿四小時貼身監察。看來在情場打滾多年的蕭正楠，今趟終於要收心養性，焗做「好男友」。

日前二人歎下午茶，黃翠如要蕭正楠主動分享手機短訊內容，睇畢後的她一臉得戚。

收工拍拖

「翠蕭戀」拍拖快一年，仍處於熱戀階段，早前有傳吳若希硬搶蕭正楠失敗後，二人愈愛愈高調。上周五為撻着的定情劇《師奶Madam》宣傳時，蕭正楠和黃翠如也當眾摸手仔兼打情罵俏，一於肉麻當有趣。

當日工作後，他倆爭取時間拍拖，駕車到新蒲崗的Mikiki商場，在泊車後因見有記者追訪，跟蕭老友的曹永廉也趕來會合。初時二人都表現尷尬，行到離行離列，曹永廉抵死謂︰「我係咪要彈開？」最後黃翠如一個箭步帶隊到薄餅店開餐。入到店內，二人不見有記者，又黐到實孖住坐，黃翠如為要跟曹吹水，便叫蕭正楠替她點菜，男方亦聽話就範，但食到一半，「電燈膽」曹永廉有事先走，得番二人，港女上身的她即話晒事，既收起笑容，又對男友指指點點，蕭正楠不停點頭唯唯諾諾。