電視精

2015過年最紅 超人三胞胎

Ads by Google

韓國親子綜藝節目《超人回來了》自 2013年開播大受歡迎,一班星二代嘅人氣直逼韓星,最受歡迎的,一定要數演員宋一國的三胞胎囝囝,三個小朋友喺節目入面好可愛,俘虜唔少姐姐嘅心, 2015年曝光率有升無跌,收視長紅,難怪被視為韓國最有潛質嘅小明星呀!

 

宋一國嘅三胞胎(左起)大韓、民國、萬歲喺《超人回來了》入面贏盡觀眾歡心,月曆以不同身份慶祝節日,新年梗係著韓服拜年啦!

童心救爸爸

三胞胎嘅爸爸宋一國,曾經主演《朱蒙》、《被稱為神的男人》,形象 man到不得了,不過都唔使將囝囝個名改成「大韓民國萬歲」咁老土啩?其實宋一國來自政治世家,太公及阿公分別係韓國抗日名將金佐鎮及金斗漢,媽媽係國會議員兼演員金乙東,老婆係法官鄭升妍。 2012年三胞胎出生,嫲嫲就將佢哋分別取名大韓、民國同萬歲,真係夠晒愛國!宋一國自己嘅民族觀念都非常重,喺 2012年曾經參加游水登獨島嘅宣示主權運動,引起好大回響,令佢有份演出嘅劇集被日本禁播,事業陷入低潮。反而多咗時間和三胞胎相處,間接造就佢今日翻身。宋一國帶住囝囝喺上年 7月加入《超人回來了》,一個男人要對住三個百厭仔 48小時,實在好崩潰,見到佢束手無策,但依然循循善誘嘅情形,好多觀眾俾佢嘅慈父形象吸引,更加有男觀眾向佢請教湊仔心得,將對面台嘅《爸爸去哪兒?》完全比下去,成為新一代好爸爸典範!


湊一個小朋友已經忙到頭昏腦脹,同一時間要湊三個,真係諗到都驚,好彩三胞胎唔似港童咁煩。 

三兄弟一齊長大,梗係好感情,有一個喊,另一個即刻走過嚟錫番,真係 sweet! 

人細鬼大

講到尾,人都係膚淺嘅,都要三胞胎得意先有人睇。大韓、民國同萬歲雖然係同一條腸出,不過每個樣都唔一樣,性格都完全唔同,哥哥大韓有大將之風,比較穩重,二仔民國最靚仔,又鍾意撒嬌,細路萬歲最活潑,成隻甩繩馬騮!三胞胎就嚟 3歲,人仔細細不過好多計,由牙牙學語到而家講嘢有紋有路,三兄弟相親相愛,一時玩到糖黐豆,一時鬧交水溝油,觀眾就好似陪住佢哋成長,收視當然節節上升,幾乎每集都有 15%以上。隨即而來就梗係豐厚嘅廣告收入,三胞胎做小 model不在話下,就連爸爸宋一國嘅代言都接踵而來,銀行、手提電話、飲品等等,財源滾滾來。不過宋一國都好識得回饋社會,每年佢都會幫三胞胎印月曆,派俾親戚朋友,今年佢就同慈善團體合作,將月曆義賣,結果賣超過 30萬本,銷售額高達 10億韓圜( 900萬港元),而家喺韓國斷晒貨,可見佢哋嘅人氣有幾高!


宋一國同三胞胎嘅廣告而家喺韓國幾乎無處不在,呢個係銀行 sell儲蓄,好有說服力。 

上年仁川亞運被揀中傳聖火,爸爸將三個揹晒上身,兩歲已經係聖火手,大韓、民國、萬歲,好嘢! 

宋一國多數飾演好有霸氣嘅角色,喺戲入面幾型都好,返到屋企對住三個仔一樣無晒符。

撰文:關錦雯
mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()