外太空

賀歲片 卡通最惡

Ads by Google

香港的長者不獲重視,香港的年輕人簡直被歧視,全個香港,小朋友最重要。
賀歲片黃金檔期,幾齣動畫正面硬撼。英美中日,你識揀的。

美國代表 《荒失失企鵝》

《史力加》( Shrek)受歡迎,於是有外傳《無敵貓劍俠》( Puss in Boots),夢工場的一貫策略,《荒失失企鵝》( Penguins of Madagascar)正正出自《荒失失奇兵》( Madagascar),配角變主角。
呢招,好使好用,暑假又有一齣《迷你兵團》( Minions),來自《壞蛋獎門人》( Despicable Me)。

劇情:四隻企鵝仔,唔肯跟大隊,覺得世界有其他地方可以去,竟然因此而踏上冒險之旅,保衞企鵝族群的生死存亡。
上畫日期: 2月 19日


呢個角色,有真人版的話,一定搵阿 Bob做啦。 

找來尊麥高維治為八爪魚配音,對於女性來說,搵來福爾摩斯班尼狄甘巴貝治配隻狼,更吸引吧。 

英國代表 《超級無敵羊咩咩之咩最勁》

《超級無敵獎門狗》( Wallace and Gromit)的班底, 07年推出電視卡通《超級無敵羊咩咩》,每集 7分鐘,無對白,齋公仔動作。竟然夠膽拍成電影《超級無敵羊咩咩之咩最勁》( Shaunt the Sheep)。
嚴格來說,《羊咩咩》都係外傳,本來只係《超級無敵獎門狗》其中一個角色,今時今日,一早青出於藍。電影撞正羊年面世,真邪。

劇情:羊咩咩阿爽將農夫送入城,只好帶住幾隻羊一齊離開農場救主人,卻遇上無比兇惡的獵羊人追捕……
上畫日期: 2月 19日


電視版已拍了四季,有成一百四十集,跟《愛•回家》還有一段距離,請努力。 

中國代表 《喜羊羊與灰太狼大電影 7:羊年喜羊羊》

每年一度,今年羊年,更加合理。仲搵埋馬浚偉配音,做灰太狼。真係好吸引。

劇情:懶羊羊同灰太狼交換身體,仲返到舊石器時代,喜羊羊返埋去,三個好朋友,對抗邪惡巨龍,拯救遠古時代的文明……
上畫日期: 2月 19日

日本代表 《 Stand by Me:多啦 A夢 3D》

劇情跟番原著,但首次採用 3D技術,本來為紀念藤子• F•不二雄誕生八十周年,在香港,變成悼念配音員林保全先生。

劇情:大雄遇見來自未來的曾孫同埋多啦 A夢,原來大雄日後生活好慘情,仲連累子孫,多啦 A夢只好留低幫手……
上畫日期: 2月 19日

情人節睇動作片

情人節同年初一相差五日,搞到今年啲應節愛情片失晒蹤,得番啲應節動作片。
《格雷的五十道色戒》明明係一男一女愛情片喎,錯了,電影主題講 SM,其實,都係動作片。

最佳拍檔復活

懷念昔日賀歲片嗎?《皇家特工:間諜密令》( Kingsman: The Secret Service)簡直是天造地設的選擇。講擁有新奇武器的特務保衞地球,仲唔係《最佳拍檔》?何況,同 007一樣, Kingsman都係英國產品,完全令你諗番起 97年之前的過年氣氛。

劇情:在英國,有個叫皇家特工的神秘特務組織,向來只會揀精英入隊,但哥連費夫( Colin Firth)飾演的特務首領,竟然選來恩人的反叛兒子來訓練,仲俾佢接手任務,大戰高科技天才發明家……
上畫日期: 2月 12日


導演 Matthew Vaughn再次改編《勁揪俠》漫畫家 Mark Miller的作品,單單呢兩個名,已經要睇啦。 

男性網購平台 Mr. Porter贊助電影服飾。時裝界的朋友,必睇! 

除咗哥連費夫,新仔 Taron Egerton佔戲更重,飾演奸角的則是森姆積遜。又係佢。

吸血新世紀翻版

又關英國事,今次係改編英國作家的全球暢銷小說《格雷的五十道色戒》( Fifty shades of Grey),賣點係性虐待。引到我三本書由頭到尾睇晒,然後發現被搵笨,根本就係《吸血新世紀》( Twilight)條方程式。男主角又係有錢靚仔有品味仲異常專一,呃到班女士個個當睇《來自星星的你》般代入晒。情人節,我係男人就不會帶女朋友入場。你一早想分手就另作別論。

劇情:校報記者訪問企業鉅子,立即被搞到失晒控,點知有錢佬原來喜歡 SM,個女仔就係處女,咁都可以一齊?
上畫日期: 2月 12日


老實講,本小說,真係好一般,第一集算最好睇,但如果拍埋第二第三集,會變成 TVB師奶劇。 

原著中,男主角格雷係完美的化身,找來占美杜倫扮演,你唔認得唔出奇,一來作品不多,二來佢之前係留鬚的。 

女主角狄高達莊遜之前拍過《社交網絡》,做二打六,今次有機一脫成名,不用似袁嘉敏搞咁多是非的。

文藝金馬得獎片

近幾年,港產華語片好似無乜邊套好睇,只有胡鬧。如果,你喜歡文文藝藝地過年,有兩齣金馬獎得獎片竟然揀喺賀歲檔上畫咁另類,包括最佳劇情片《推拿》,同埋令陳湘琪揮低鞏俐做影后的《迴光奏鳴曲》,大年初一,都可以做文藝人的。


《推拿》 

《迴光奏鳴曲》 

香港出品古天樂玩晒

去年的港產賀歲片是災難,《賭城風雲》跟《大鬧天宮》被彈到一文不值,黃百鳴的《六福喜事》毫無新意,結果,無咁難睇的《金雞 sss》成為香港之冠。
今年,王晶、黃百鳴、吳君如依舊,最有新鮮感要數《衝上雲霄》電影版,古天樂一人佔三齣,唔睇佢唔得。

《賭城風雲 2》

有王晶,好多人唔想睇;但係有發哥,仲要加埋張家輝。不過,上一年的《賭城風雲》已經浪費過一次好演員……

劇情:洗黑錢集團的會計師偷了百五億美金,著草去泰國,澳門賭俠石一堅又要重出江湖,務求找出集團的幕後黑手……
上畫日期: 2月 19日

《 12金鴨》

你可以不佩服吳君如的演技,但一定要佩服她的社交網絡,又一次大大大堆頭,今集的亮點是謝霆鋒加埋梁洛施。

劇情:一代鴨王由泰國回流香港,發現十年人事幾番新,經過苦苦掙扎,終於有機會帶領一班下屬出人頭地,他卻白白放過機會……
上畫日期: 2月 19日

《衝上雲霄》

Sam哥同 Cool魔由電視鬥到上電影,但係無咗陳法拉,加入古天樂與鄭秀文與佘詩曼,電影變成跟電視劇無關的三個單元,純睇靚人加歐洲靚景,希望有賀歲片經典《縱橫四海》的影子。

劇情:三個機師,古天樂重遇舊女友佘詩曼,吳鎮宇搭上天王巨星鄭秀文,張智霖俾絕症少女力溝……
上畫日期: 2月 19日

《浮華宴》

終於唔係乜乜乜喜事系列,仲玩一屍兩命兇殺案,玩華麗靚衫玩英式造型,都幾挑戰高難度。

劇情:富翁請客,警察帶件少女兇殺案來調查,揭出大宅內六個人的真面目,與死者有莫大關係……
上畫日期: 2月 19日


mailto:hotpot@nextmedia.com

    全站熱搜

    tvb4life 發表在 痞客邦 留言(0) 人氣()