方保僑每次外遊,都一定帶齊相入面的電子配件,以為好多?其實一半都未夠。 

CLOSE-UP

Gadget精華遊

Ads by Google

就快到農曆新年,請三日假就可以放足九日,實在是遠遊好時間。而且今年這種連假時機特別多,好似十一國慶請一放四、重陽請二放五,同事之間毋須再爭,大可輪流安排放長假!
去得旅行,當然要帶齊裝備,先可以放心用手機 update facebook、拎相機瘋狂亂拍。今期搵來 IT達人同旅遊專家,分享個人心得,實行開開心心去旅行。

睇地方揀上網 Plan

經常出席外地電子展的香港資訊科技商會會長方保僑,一年差不多要飛十次,而且每次都離港超過四日,要緊貼香港最新動態,自然要做到 24/7無間斷上網,「除了收發電郵,亦會將電話飛去 Skype賬戶慳錢。」無得上網,就會失去聯絡。
去不同國家,選擇的上網方法都不一樣,他說原因好簡單,「用國內服務上網,要翻牆先睇到 facebook及 Gmail,始終不及用香港 SIM插入 Pocket Wi-Fi漫遊上網方便。至於台灣、歐美等地,上網 SIM卡好易買,溝通又不似日、韓麻煩,不用怕買錯 SIM卡上不到網,可去到當地先買。」
方保僑說上網費用一定是買當地 SIM卡最平,但由於網絡商提供的服務眾多,為免買錯不可分享數據的 plan,「最好拎埋隻 Pocket Wi-Fi出來,對方就知你想點用。另外,亦要記得帶埋 SIM卡轉換套,因為 Pocket Wi-Fi一般都採用大 SIM卡,如對方只得細 SIM卡,就未必用到。」


提到在外國講電話,方保僑表示甚少用漫遊,「試過一次做了半個鐘電話訪問,用了幾百元;如果轉用 Skype,飛線月費加埋通話費,一百元有找,抵好多。」 

最意想不到又好用的配件,竟然是飛機專用的一出二耳機插頭,「機場都有得賣,可以用番自己耳筒聽歌,一定要帶。」 

各地主流使用的 SIM卡不盡相同,最好帶定 SIM卡轉換套,有備無患。

行街上網篇

即使同成班朋友去旅行,大家依然掛住各自上網,打卡、 post相呃 Like晒命。雖然此風不可長,但既然無法改變事實,唯有慳錢至上,去當地購買可分享數據的上網服務,再自備 Pocket Wi-Fi同朋友一齊用,慳好多。

15人共享

TP-Link  4G LTE-Advanced Mobile Wi-Fi
如果當地支援 4G上網,其實頻寬都足以俾好多人一齊上網睇 facebook或 WhatsApp,揀 Pocket Wi-Fi時,就要留意可連接的裝置數目,其中 TP-Link 4G LTE-Advanced Mobile Wi-Fi最多可連接十五部裝置上網,最大特色是採用 Dual-Band Wi-Fi,只要網絡速度夠快,最高可達 150Mbps下載速度。另外,內置電池可連續使用十個鐘,亦可更換電池,袋住兩嚿電,實夠用足一日。

規格

支援網絡: FDD-LTE 800/ 900/ 1800/ 2100/
2600、 WCDMA 900/ 2100
連接裝置數目: 15部
使用/備用時間: 10小時/ 600小時售價:$998
網址: http://www.tp-link.com 

中港通用

ZTE MF91S
想中港兩地都用到 4G上網,買 Pocket Wi-Fi時就要留意是否支援兩地制式。 ZTE的 MF91S就支援中國同香港的 4G頻道,最高下載速度高達 100Mbps,不過使用時間只得四個鐘,一定要另帶尿袋。

規格

支援網絡: FDD-LTE 1800/ 2600、 TD-LTE 1900/ 2300/ 2600、 WCDMA 850/ 1900/ 2100
連接裝置數目: 10部
使用/備用時間: 4小時/ 200小時
售價:$699
網址: http://www.ztedevice.com 

電量夠長

Huawei E5730
用 4G上網,最大問題是耗電量高,一般 Pocket Wi-Fi未必捱到半日,要帶多個外置充電器傍身。 Huawei推出的 E5730雖然只支援 3G網絡,但勝在使用時間夠長,可用足十六個鐘,電量有餘,更可反過來為其他電子裝置供電。另外,機身設有 LAN插頭,返到酒店就可將房間內的[頻服務,用無線方法分享,慳番流動網絡數據用量。

規格

支援網絡: WCDMA 900/ 2100
連接裝置數目: 10部
使用/備用時間: 16小時/ 500小時
售價:$699
網址: consumer.huawei.com

電量最重要


買外置充電池,李兆祥會揀有 2A輸出的型號,「有時相機無電,用 2A充一陣就用得番。」 

旅遊專欄作家李兆祥,每次出國最少帶兩部電話、兩部換鏡細機、一部 tablet及一部 notebook。器材多,自然特別關注充電裝備,「外出必定帶三個外置充電器,先可以同時為三部器材充電;返到酒店,就會轉用一出六的 USB火牛充電。」
雖然插頭有六個,但李兆祥說通常只會同時為四部器材充電,「駁六部機會充得好慢,試過多次後,發現駁四部最有效率,相信同晶片效能不足有關。」揀 USB火牛,一定要留意 A數,最好揀標明每個 USB插頭的電流輸出,因為好多 USB火牛的配電晶片差,未必分到足夠電流去指定裝置。「寫明 2A,好處是就算瞓覺前忘記為手機充電,朝早都可用一、兩個鐘補番一半電量。」另外,亦要留意充電線,「一般充電線質素比較差,充電時間慢,會揀價錢較貴、有快速充電能力的線材,可靠性高好多。」

必帶 LED燈

現時在鴨寮街熱賣的小型 USB LED燈,價錢由十元至數十元不等,而李兆祥視為必帶裝備,「試過去餐廳影食物,用閃燈影,結果侍應行過來話我影響其他食客。但改用 USB LED燈,就未試過俾人投訴,仲有人行過來問在哪裡有得賣。」加上 LED燈有不同色溫揀,想影靚食物相,一定要用。


部分 USB火牛有可更換插頭設計,亦可用延長電線,而李兆祥話延長電線一定要帶埋去,「部分酒店插蘇位未必用到直插式 USB火牛,帶定多條線去就一定用到。」 

不時都收到旅行用贈品,但最有用是這條多功能充電線,「一條線可以幫 Android、新舊 iPhone和 iPad充電,不怕帶漏線。」 

隨身帶三個外置充電器,除了因為手機、相機電量問題,低光時更可連插幾支 USB LED燈,一定夠光。 

(由李兆祥提供) 

電壓無關

現時市面大部分 USB火牛都支援 100V至 240V電壓,可在全球大部分地方使用。成日聽人講採用低電壓的地方例如日本( 110V),充電速度會較香港( 220V)慢,其實只是謬誤。因為 USB火牛內的電子變壓晶片,會自動將電壓調節並輸出至需要的電流值,並不會因為電壓較低令充電時間變長。龜速充電原因,最大可能是火牛內置的電子變壓晶片效能差,或同充電線質素有關。另外,去到寒冷地方,低溫亦會影響器材的充電速度。

電源篇

以前不同產品都用自家火牛,要執齊都幾煩。好在現今科技產品都用 USB充電,只要帶個 USB充電器去就搞掂,少好多甩漏。

智能配電

Anker 40W/8A 5 USB
買多出式 USB火牛,最緊要是輸出電流夠穩定,否則未必可以同時間為多部器材充電。這款由 Anker推出的 40W/8A 5 USB,設有五個 USB輸出,最高合共能輸出 8A。內置 PowerIQ系統,識得自動為每一個 USB輸出分配電流量,駁器材時就毋須理會邊種器材要駁 2A插頭。

規格

USB插頭: 5個
輸入: AC 100-240V
體積/重量: 91/ 58/ 26mm/ 130g
售價:$289
網址: http://www.ianker.com 

輸出夠高

Thecoopidea  Power Block 5 USB Charger
如果幾個朋友去旅行,個個都會帶 iPad,由於 iPad須用 2A電流先充到電,揀 USB火牛時,就要揀備有多個 2A輸出的款式。 Thecoopidea Power Block 5 USB Charger提供四個 2.4A及一個 1A輸出,可同時接駁四部平板及一部手機,不用排隊逐部充電。

規格

USB插頭: 5個
輸入: AC 100-240V
體積/重量: 88/ 75/ 33mm/ 210g
售價:$449
網址: http://www.thecoopidea.com 

酒店上網篇

不少酒店都為住客提供免費寬頻服務,為節省流動上網數據用量,返到酒店,自然用番房內的寬頻上網。不過,未必間間酒店都有 Wi-Fi服務,就算有,無線信號亦未必夠強。最好自備 Wi-Fi router,插上房內 LAN線,就可無線分享上網頻寬,信號一定最穩定。

體積夠細

TP-Link 150Mbps Wireless N Mini Pocket Router
體積只得手掌般大,攜帶非常容易。由於機身設有電源插頭,毋須再另駁火牛,直接插電掣再駁 LAN線就用得。速度方面,最高可達 150Mbps。支援 USB儲存裝置,可用手機、 tablet無線讀取檔案。

規格

支援制式: IEEE 802.11b/ g/ n
加密格式: WEP/ WPA/ WPA2
體積/重量: 81/ 71/ 28mm/ 125g售價:$159
網址: http://www.tp-link.com 

免過熱

AirMobi iTravel
除了可當旅行 router使用,內置 5200mAh充電池,亦可變身流動充電器,為其他手機充電。另外,內置防過熱晶片,可避免因機身過熱導致電量流失的問題,夠安全。

規格

支援制式: IEEE 802.11b/ g/ n
加密格式: WPA/ WPA2
體積/重量: 112/ 58/ 18mm/ 150g
售價:$328
網址: http://www.cctairmobi.com 

相即分享

同班嘩鬼去旅行,人人拎住相機狂拍,想用最快速度分享俾所有人,只須一個支援無線傳輸的媒體儲存裝置,例如 SanDisk最近推出的 SanDisk Connect(售價: 64G•$1,198),就可以將相機 SD卡內的相或影片 backup,更可同時無線連接五部手機或平板電腦,非常方便。



先在手機或平板電腦安裝 SanDisk Media Drive app,再將內藏相片或影片的 SD卡插入 SanDisk Connet,然後打開電源。之後開啟手機或平板電腦的 Wi-Fi功能,進行配對。 

啟動專用 app,就可無線讀取 SD卡內的多媒體檔案。 

用家可選擇備份 SD卡內的多媒體檔案入 SanDisk Connet,亦可無線將檔案抄入手機。 

手機傳雲

萬一途中遺失手機,或擔心拍下的相片無端失蹤,最好是每晚返到酒店,利用 Wi-Fi直接將相片上傳雲端儲存服務,做多個備份,今次就以最易用的 Dropbox示範。


先用手機下載及安裝 Dropbox app,選擇登入或建立賬戶。打開「設定」後,開啟「相機上傳」功能(紅圈),但要留意如果不想利用流動數據上傳,就要關掉「使用行動數據」(黃圈)選項。 

當手機處於 Wi-Fi狀態,打開 Dropbox app,就會自動將手機內的相片上傳雲端賬戶。 

iOS相片互傳

Android用家可用藍牙互傳相片, iOS用家又點?如果大家處於同一個 Wi-Fi網絡(如連接同一個 Wi-Fi router),可利用 AirDrop功能直接分享相片或影片,傳送過程非常快。


收相一方先於 control center啟動「 AirDrop」功能並選擇「所有人」。 

然後在要分享檔案的 iOS裝置上,揀好相片或影片,按左下方的輸出掣。 

AirDrop選欄上,就會出現可接收檔案的用家列表,點選名字後,對方就會即時收到相片。

text:科技組
photo:黃家活

    全站熱搜

    tvb4life 發表在 痞客邦 留言(0) 人氣()