駐港解放軍總部設於金鐘特首辦及政府總部旁,去年佔領運動期間,士兵在操場加操,邊跑邊咆哮,向佔領者施下馬威。(王偉洪攝) 

坦白講

解放軍借歪

Ads by Google

解放軍駐港部隊大廈,回歸前屬駐港英軍,威嚇殖民地人民。香港回歸,中國政府仲使唔使威嚇香港市民?

薛國強 六十歲 退休政府規劃師


退休後的薛國強回復自由身,向城規會及駐港解放軍挑機,挑戰不可能的任務。(郭永強攝) 


去年八月入紙城規會申請將中環軍營改建成酒店,挑機味甚濃。城規會上月才公布有關申請。訪問時相當錫身,聲稱不是針對解放軍,強調中環是商業區,只由土地用途出發,跟足《城市規劃條例》,將難題交給城規會。

 

(係咪想同政府總部、特首辦、立法會大樓並列?)咁更加唔應該擺喺度!插手香港嘅管治呀?中聯辦都擺到西環啦。咁講法不如派兩支軍隊喺特首辦,仲方便。香港由頭到尾講本地治安,唔係外國侵略,你咁問都嘥氣,你懷疑香港警察嘅能力?
石崗、昂船洲都有軍營,中環只係象徵式嘅總部,香港人習慣咗,冇人諗過呢個問題。(可能解放軍想欣賞海景?)搵佢嚟欣賞海景㗎?佢唔可以好似平民一樣,去碼頭睇海景㗎咩?
改做酒店,符合中環商業用途,外判出去俾人做,瓜分利潤當軍費。駐港解放軍作為業主,同普通人一樣,可向城規會提出反對。即使城規會通過申請,業主都有權唔改,直至重建。解放軍聽命於黨,擺唔擺喺度,真正話事係中國國務院。
我仲入咗兩個計劃,一個係申請吐露港填海,填出一千五百公頃土地,連埋非郊野公園範圍取泥區,有二千六百公頃,足夠香港未來三十年土地供應。唔好問我郊野公園可唔可以起樓,你唔好設陷阱俾我啦!總之填海就夠地用。另一計劃係申請中環嘅商廈地下放寬加高一層,好似滙豐總行,通風又好行,點解唔得?

 

呢啲計劃,政府後生嘅規劃師都諗到,但過唔到高層嗰關。入呢啲嘢,要成個部門配合、署長首肯,唔只規劃署,仲要地政署、運輸署各部門同意,先上到城規會,呢個係制度問題。
我入行,唔係因為我鍾意規劃,只係好彩又要搵食。我細個好窮,一家八口住百二呎都唔夠嘅徙置區,十五歲出嚟做錶廠、返夜校。二十歲,地政署請人,好彩入到,兩年後轉去規劃署做見習測量主任,幾年間升職至高級測量主任。之後問家姐借錢去澳洲讀書一年,返嚟再升職,直至○四年五十歲退休,做到規劃師。退休後冇嘢做,前年成立一間一人公司(智仕顧問),入紙搞吓呢啲規劃囉。我識做,我又有時間做,我又有咁嘅心情做,得唔得先?

由你開講

一切好人好事,壞人壞事,先吐為快。你敢坦白,我敢講。
電郵: mailto:voice@nextmedia.com


撰文:袁慧妍
mailto:news@nextmedia.com

全站熱搜

tvb4life 發表在 痞客邦 留言(0) 人氣()