何東花園賣得好價,何勉君真係印印腳咯!(《蘋果日報》圖片) 

中環人語

何東後人 舔埋最後一筆

Ads by Google

何東花園以五十一億元天價成交,創下香港歷年最貴屋地紀錄。計埋呢件,何東家族喺香港嘅物業已賣得九九十十。二十年前起,佢哋賣走深水灣道三十五號、布力徑六至十號、及講明「三不賣」的承業大廈及東英大廈,咁多年加埋套現超過七十三億,數目驚人!小宗翻查土地註冊處資料,何東花園由何東孫女何勉君一個人持有,雖然佢係美國籍要交重稅,但剩低嘅都夠印印腳唔使憂咯!

 

至於何東其他後人,當中孫仔何鴻毅退休後定居溫哥華,專注佛學,另一孫何鴻章,幾年前同舊情人「十姑娘」及兒子對簿公堂,現已甚少公開露面。最活躍反而係何東曾孫何彪,佢被影到同翁靜晶喺中環甜蜜繑手。現時何東家族淡出香港,諗落令人唏噓。想當年英國佬歧視華人,曾通過法例不准華人在山頂居住。因地產致富嘅何東多次挑戰,最終喺一九○六年買入山頂,成為首個入住山頂區嘅華人,後更發展何東花園。而家何東花園地皮最終由「重慶李嘉誠」張松橋買入,見證住香港嘅揸弗人又再轉庄。


室內設計富中西特色。(《蘋果日報》圖片) 

昔日居高臨下嘅景致,已成過去。 

踢竇 港大生中環私竇

作為全球數一數二嘅名牌學府,香港大學同中文大學,向來都鬥到難分難解。不過港大校友有樣嘢比中大校友幸福,就係唯獨佢哋喺中環有間私竇方便食飯,兼夾聯誼感情。
港大校友會呢間飯堂,位於蘭桂坊附近嘅德己立街業豐大廈一樓。上星期股評人陳永陸搞傳媒飯聚,都喺呢度開局。陸叔話幾乎所有港大校友都知晒定,「我哋話去舊生會或者話去業豐食飯,大家都知係去呢間。」港大校友會早喺一九二○年成立,陸叔回憶,以前入會要俾一百元會費,但舊年校友會主席謝錫恩為咗谷吓會員數目,暫時免費俾舊生入會。
唔少著名港大校友都有來幫襯,例如同陸叔同期、一九七三年畢業嘅梁錦松、前財經事務及庫務局長馬時亨、前經勞局長葉澍堃等,「因為餐廳近中環,好多校友平時都會喺度打躉,飲番壺靚茶吹吓水。」大廚是過檔而來的原陸羽二廚,質素有番咁上下,菜式亦同陸羽相似。陸叔就最鍾意食佢嘅招牌菜杏汁豬肺湯同鳳尾蝦多士。小宗試過,豬肺湯杏汁味濃,蝦多士則脆口且保留條炸過嘅蝦尾,比坊間嘅有特色。
陸叔話曾經喺餐廳開講座,以及同校友講股市,不過間餐廳經常爆滿,要訂枱必須係會友至得。但咁樣點都好過中大舊生,想約埋班校友敍吓舊?返中大行上山囉!


港大校友入會只係一百元,最近 promotion仲免費添!(關永浩攝) 

一碟鳳尾蝦,留有脆口嘅蝦尾,較坊間有特色。 

「家暴律師」多情史


插圖:詹震寰 

最近有位「家暴律師」出晒位,有關佢嘅傳聞小宗都聽唔少。行內人話,「家暴律師」打官司唔係叻,只係英文嘞嘞聲,拋得吓人。佢最出名係風流成性,行內有少少姿色嘅都被佢撩過,而且連 intern都唔會放過。佢間 firm嘅職員,都會提醒初入職嘅後生女提防提防。想當年,佢原來曾追過「民主女大狀」;雖然死命狂追,但「民主女大狀」對佢鮮都唔鮮,結果有人懷恨在心,後來喺公職上打埋對台。其實「家暴律師」有咁多負評, check一 check就知,佢身邊人都要諗吓自己有無帶眼識人咯!

世姪女,你邊位呀?

最近前特首董建華嘅舅母過身,呢個造船大家族,上週登訃文。嘩,真係後代繁多,老懵董大家固然識,仲有佢妹夫係「公司醫生」金樂琦,表妹係幫緊誠哥打工嘅周凱旋好友張培薇。睇真啲,曾活躍娛樂圈嘅女藝員水明琪同水明璐,原來係老董舅母嘅姪女。兩人分別喺○一及○三年參選港姐,最終落選,水明琪仲同陳復生前夫何東舜銘傳過緋聞。董生親戚真係何其多,不過佢咁善忘,喺街撞到,下一秒可能係問:「世姪,你乜水話?」


(《蘋果日報》圖片) 

老董見到水明琪(左)及水明璐(右)姊妹,都要講聲:乜水話?(《蘋果日報》圖片) 

金牙大狀講嘢 人心唔回歸


香港人何以對國家欠缺認同,照吓鏡啦,董生!插圖:祝健中 

司馬燕魂歸天國,據報遺體將「運返溫哥華」,入葬肥姐沈殿霞、五億探長呂樂等名人之同一墓園。睇到呢段新聞,唔知北大人以至董建華同埋佢嘅愛徒 689有何感想。
北大人不斷鞭撻香港人,鬧我哋「到現在還找不到國的感覺,不知身在何方」,對國家、中央政府「欠缺認同」。中國人鄉土觀念重,都有個葉落歸根嘅情意結。然則肥姐、司馬燕大去,都選擇落葬他鄉。佢哋顯然都並非藉此作政治表態,佢哋嘅行動究竟講緊乜,則又清楚不過。
過渡十八年,人心何以唔回歸?照吓鏡啦,你!

中環人語迷你版

“白武士已在不遠處。”

估中邊個中環人講呢句說話,送你 JWATCH J-33藍寶石鏡面限定版手錶一隻有意參加者,請於一月二十八日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉答案

“(選特首)回答唔到你呀,等我諗諗!”

周凱旋
得獎者: Lee King Nam
中獎時間: 1:00pm 21/1/15

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!

爆料熱線/whatsapp: 6829 5929

    全站熱搜

    tvb4life 發表在 痞客邦 留言(0) 人氣()