香港青少年軍總會喺雨傘革命之後急急成立,講到係威係勢,原來只係「雜牌軍」,被踢爆三百個「成員」係臨場「被加入」及「被宣誓」。 

八卦陣

西環 hea搞青少年軍 陳振彬求助董太

Ads by Google

由青年事務委員會陳振彬擔任主席嘅「香港青少年軍總會」,本月十八日喺昂船洲軍營舉行成立典禮,不過有曾經參加過羣力資源中心軍事夏令營嘅學生爆料,青少年軍成立得好急,搵唔切人宣誓做騷,結果佢哋臨場慘被「踢入會」。

 


有羣力軍事夏令營學生爆料,話羣力叫佢哋參與步操儀式,點知最後變成宣誓「報效祖國」。 

當日有份「被加入」嘅學生同我哋講,唔知道青少年軍總司令、 689夫人講嘅「籌備超過一年」點計出嚟,皆因十二月三十日、佔領運動之後佢先知有青少年軍。羣力職員喺私人 facebook群組邀請佢哋參加成立儀式步操禮,只要一月份出席三次彩排就得。
政界中人拆解,其實西環早早已經攞咗一筆維穩費搞呢壇嘢,但一直 hea住做。佔領運動後,阿爺驚覺香港新一代愈來愈抗拒祖國,有西環官員怕阿爺怪罪辦事不力,臨急臨忙做嘢,結果要搵大紅人陳振彬啃咗呢個 project,但由於籌備時間實在太短,只能向董建華夫人趙洪娉搞嘅羣力「借將」。
有人更懷疑,當日有深圳布心中學學生南下參加典禮。記者週一致電該校校長、黨支部書記曾小理查詢,曾校長聽完之後靜咗兩秒,然後話記者阻住佢午睡好冇禮貌,跟住就收線喇!

任建峰重出江湖


(左起)梁允信、任建峰、文浩正喺政改山雨欲來嘅時候挺身捍衞法治,成立組織「法正匯思」,未來會就法治問題發表意見。(羅國輝攝) 

成功踢走律師會前會長林新強嘅律師任建峰,最近辭任律師會人權憲制事務委員會委員,聯同四十幾個年輕律師及大律師搞咗檔新嘢「法正匯思」,頭炮活動係星期二搶先發表政改意見書,以法律觀點分析八三一人大決定違反《基本法》,又提出如無真普選,必須重啟政改五部曲。
法正匯思召集人除咗任建峰,仲有律師文浩正以及大律師梁允信。三十八歲嘅文浩正,就係佔領運動期間被捕支援熱線嗰位「文律師」,相信好多佔領者都應該聽過佢個名。○七年抗議灣仔利東街重建嘅示威者被剝光豬搜身,文浩正首次協助示威者,自此成為社運人「御用」義務律師。
三十二歲嘅梁允信更加係明日之星,佢係霍家爭產案中霍震霆嘅代表大律師,亦係 Temple Chambers嘅成員,呢間 Chambers喺行內響噹噹,其他成員包括前律政司長黃仁龍、政府御用大狀翟紹唐等。
三人異口同聲話新組織唔係同律師會、大律師公會或者建制派打對台,文浩正認為近年「法治」被醜化,希望年輕法律從業員有渠道發聲,將民主理念薪火相傳,「唔好做做吓做咗袁國強」,嚟緊仲會搞一系列嘅社區及學校講座,亦會就法治或法律問題發表意見。

689主禮渣馬疑雲

星期日舉行嘅渣打馬拉松,除林鄭做主禮嘉賓外,大會一月初俾傳媒嘅「採訪指引」入面,寫明晒各項賽事起跑嘅主禮嘉賓,唯獨喺灣仔運動場起步嘅「領袖盃」寫住「由特別嘉賓主禮」。由於參加領袖盃嘅都係一班名人,包括食衞局局長高永文、港大校長馬斐森等等,加上起跑地點係灣仔運動場,普通市民入唔到去,好多人都諗會唔會係 689驚俾人噓,鬼祟出席主禮領袖盃呢?
當日臨到起跑時間,司儀先介紹咁多位參賽者,之後就邀請啦啦隊打氣,然後司儀就自己倒數埋起步。在場苦候嘅記者即刻 O晒嘴,說好了的特別嘉賓去咗邊呢?我哋後來問番公關,佢哋話主禮嘉賓就係嗰隊啦啦隊,仲話佢哋得過獎,非常特別,咁都得?
講番領袖盃,雖然只係一點八公里長,終點係維園,但現場所見只有高永文落力熱身,當大部分嘉賓吹緊水嘅時候,高醫生自己走埋一邊拉筋同慢跑,點知佢跑完之後,竟然喘晒氣咁同記者講要扶住佢,認真大跌眼鏡。


司儀倒數起步之後,一班嘉賓向維園進發,不過大家都仍然唔知主禮嘉賓係邊個,就連在場嘅公關都唔清楚。(王偉洪攝) 

高永文局長一到場就行埋一邊拉筋,拉完呢條拉嗰條,點知跑完後氣勞氣喘,仲叫記者扶住佢。(王偉洪攝) 

大會發俾傳媒嘅指引入面,唯一係「領袖盃」無寫明係由邊個人主禮,真係會令人以為係 689鬼祟主禮囉!

成立創科局好戲連場

創新及科技局由 689未正式上任講到而家,就嚟已經三年,而家去到財委會臨門一腳隨時撻 Q,據聞 689激到彈起,有政界八卦友拆解, 689已經洗濕個頭騎虎難下,皆因內定新局長楊偉雄遞咗信辭任理工大學副校長,如果創科局成立無期,疑似局長當然唔會再等,此後亦無人再信現屆政府。
另外,前年 iProA(互聯網專業協會)成立咗信息共融基金會,因推行「上網學習支援計劃」賬目混亂俾警方調查,原來警方近排亦巧合地通知相關人士,單案已經 close咗,楊偉雄同疑似副局長中大工程學院副院長黃錦輝,正正就係基金會嘅董事,而家消毒成功,就只欠議員神聖一票,所以 689不惜抽起四項民生議程,都要俾創科局打尖。而黃錦輝更加未上任就披甲上陣,上星期不避嫌用中大工程學院教授名義寫信俾財委會,狂鬧拉布議員外,仲叫財委會主席張宇人果斷剪布喎。為咗成立創科局可以去到幾盡?消息人士話,情人節前仲有好戲連場。


梁振英 

黃錦輝 

mailto:centipede@nextmedia.com

    全站熱搜

    tvb4life 發表在 痞客邦 留言(0) 人氣()