明星合照盛品儒夫婦被「安排」與汪阿姐合照,經理人隨即叫記者埋位影相。 

是非男女

盛品儒夫婦 自捧做明星

Ads by Google

亞視前執董盛品儒去年中因偷啜𡃁模事件,與當時仲係女友的蔡一鳳人氣急升,最終二人和氣收場更結埋婚。兩公婆其實襯到絕同樣愛高調,事後頻頻應邀夫妻檔出席活動、做訪問,變身派對動物,據知每次訪問一出街,二人都肉緊𥄫實 hit rate,睇吓自己的「新聞價值」。
為令「人氣」更上一層樓,更簽埋何超瓊天機公關公司的高層鄭紹康當經理人,與他早前簽約的徐濠縈同黃偉文做同門師兄妹,名正言順有人搭橋鋪路做名人中的明星。

簽經理人

朝中有人好辦事,尤其經理人是社交界打滾十多年有人際網絡的鄭紹康( Francis),每次大家姐(何超瓊)公關公司搞的活動,盛品儒夫婦自然係鐵腳,就如兩週前在時代廣場舉行的黃貴權相展,鄭紹康落力地介紹各界名人給盛品儒夫婦認識,又主動安排他們與當晚嘉賓汪明荃影合照,拉攏傳媒替他們做訪問,再即時放上微博、 facebook,非常有效率兼 hard sell;上週一,盛生盛太又出席經理人任職的公關公司有份協力的貿發局花生騷。
據知今次合作,是有人睇中公關的人際網絡,能協助出席不同範疇類別的活動,增加知名度,更重要是對方在兩本雜誌上有訪問地盤,「佢哋見過啲名人有負面新聞, Francis都會在自己專欄為對方護航補鑊。」知情人仲話,兩公婆每次做完訪問,都特別留意自己的新聞幾時見報,「男嘅就睇吓自己個單有幾多 hit rate,女嘅就睇吓個樣靚唔靚。」然後在自己 facebook鋪出訪問替自己做宣傳。


派片識人經理人又發功,引薦二人認識九倉置業執行董事凌緣庭(左),互派卡片。 

傳媒訪問旗下「明星」做傳媒訪問,鄭紹康(左一)即時拍照傳上網,之後又再拉住「仔女」周圍識人。 

鄭紹康每天在微博上發「公關照」,去年底三人跟薛芷倫聚餐後,一拍即合做二人的經理人。

男人都貪靚

蔡一鳳每次現身必化行妝,襯到絕,但貪靚嘅又豈止係佢?盛品儒亦不遑多讓,每次出門必戴大眼仔,「佢試過無戴 cons出門,事後走去買,佢試過大眼仔後一試難忘。」為了在鏡頭前笑得大方自然,蔡一鳳又找了名模陳嘉容惡補儀態,知情者說:「 Eunis(陳嘉容)教佢影相點擺甫士同笑得靚。」
其實盛品儒夫婦想出名又無可厚非,事關二人都是生意人,男的目前搞網絡遊戲生意,女的賣珠寶手袋,賺人氣當宣傳。對於新簽經理人,盛品儒直認不諱,「我同太太成日出 event,想有個人管理吓,有個平台認識多啲人,睇吓有無其他合作機會,識多幾個朋友。」問到經理人收費,他即耍太極,九唔搭八話:「呢啲經理人自己控制,我去吓 event就算,我對 fashion有興趣,叫佢俾吓意見。」


自認是亞視靚仔前高層的盛品儒,深明宣傳功效,密密把傳媒為他做的訪問,或自己有份搞、有出席的活動照片放上微博。 


集郵二人經常出席富二代搞的親中活動,自然要向重量級名人集郵,包括劉嘉玲、郭晶晶和四太等,然後在 facebook晒命。



撰文:名人組
mailto:nextb@nextmedia.com

    全站熱搜

    tvb4life 發表在 痞客邦 留言(0) 人氣()