劉德威, 26歲,甜品店老闆,平凡青年,卻有股非凡上進心。 

年輕有夢 

Pheromone 地址:旺角白布街藝興大廈 8號地鋪 電話: 3998 3412

多快好省

Ads by Google

毛主席叫人做事要「多、快、好、省」。又要多又要快又要好又要慳,這是否緣木求魚的神話?
劉德威卻告訴你 mission possible。他的故事本來是陳腔濫調:中五學歷,甜品學徒變師傅,師傅升級做老闆。
但因不甘搵餐晏仔虛度人生,所以努力向上爬,付出比人多,手腳比人快,出品質素比人好,時間用得比人慳,粗活細幹,平凡工作用心做,終在千人一面的世間,留下讓人記着的獨特輪廓。

 

旺角開業兩月的 Pheromone,乍看,無異於一般西式甜品店:甜美裝潢,賣鮮果忌廉滿佈的甜品。
小老闆劉德威冷靜又不失自信地挑出幾款獨門創作:棉花堡,是雪糕球開出一團棉花;雪糕撈麵的麵條跟意大利寬麵幾可亂真;馬卡龍不用色素,優雅顏色及香甜味道來自食材本身。


Oreo法式撈麵,$52。撈麵看似意大利寬麵,散發蛋香。「以前看到師傅用水晶粉做甜品,啟發我諗出唔同質感的甜品。」 

 

這個年輕人諗頭很多,卻不怕別人學識他的功夫。他邊做甜品,員工邊探頭觀摩,一派閒定。他說:「你要學咪學,你學到你用到係你嘅事。只要肯問我就教,但我唔會專登講。問嘅人即係肯學嘅人,你唔問點解要教你?學到未必運作到,真係有心嘅人先運用到。」
對於有心人,他有份慷慨心靈。
因為昔日他也是個過來人。
劉德威在五兄弟姊妹中排行最小,各人自小習慣為自己籌謀張羅人生,「衣食住行,父母一定提供,但想要多啲,就要靠自己。」 15歲已四出做兼職,讀畢中五即投身職場。打過很多工,廚房學徒、售貨員、調酒師……
很快便發現獨愛做甜品,「喺餐廳水吧兼做埋甜品,整下芭菲、沙冰。
我感覺到,做得好啲,砌得靚啲,整出嚟嚿嘢好唔同喎,望到出面,見到啲客影下相,覺得好開心。」

18歲在中式甜品店當學徒。同輩但求搵夠三餐時,他已立志要做得「多快好省」。
學徒做的都是不起眼的雜務,但劉德威覺得只要做得比人快,已經大不同。「想學得快啲,就要將人地畀你嘅嘢做得快啲,唧到時間出嚟就可以偷師。」他最記得有個師傅勉勵他:「如果你做十個鐘先做到,試下愈做愈快,八個鐘做晒佢。咁你咪多咗兩個鐘,兩個鐘可以做好多其他嘢,你咪一直提升緊自己!」


朱古力慕絲棉花堡,$58。賣相可愛,頗受少女歡迎。 

士多啤梨窩夫配雪糕,$58。加入珍珠糖,窩夫芯比一般鬆脆。 

馬卡龍,味道包括藍莓、綠茶等,$88( 6件)。不加色素,淡雅顏色來自食材本身。

 


棉花糖製作簡單,但原來機器經劉德威改良,令出品更好。 

劉德威不怕蝕底,總是按師傅指示做好工作,「佢哋叫我,我唔會推。話洗多次嘢咪洗多次囉。」
甜品店凌晨打烊,他又請求老闆讓他獨自留下,鑽研各類食材,「好似研究吓魚膠粉有咩性質,睇下佢加入唔同材料有咩變化。」
雖然很多配方在網上也找到,但劉德威不甘模仿,「搵到條方唔代表你知道點解落咁多。
我想研究背後道理,然後做出屬於自己條方!」
有時更興奮忘形至徹夜未走。
結果一年間由學徒,升至助理,再升至師傅,月薪由五千加至萬二、三。
「好多人覺得做學徒,正常打份工,唔使要求得到啲咩,有錢就得。咁可能諗錯咗。點解我成日灀雪糕?點解佢可以做其他嘢?因為人地學得快過你,做得好過你。一個好嘅人先會被人重用。」

打後八年,劉德威想看更多,學更多,於是不停轉工,去過甜芽芽、五代同糖、松記等店工作,「唔只做甜品,而係學下人地管理模式、營運形式。」師傅職位有限,他往往減薪由學徒做起,可每次很快又升回師傅,「我係一個鍾意向上爬嘅人。好到咁上下,再做落去唔知等咩機會,不如嘗試跳去第二度,吸收多啲嘢。」

鼓足幹勁,力爭上游,讓劉德威得到賞識,四、五年前,有生意人找他創業,替人打理甜品店,很快有錢賺,但他卻萌退意,「老闆覺得唔好嘥,想加埋鹹食。我唔係唔識,係唔想做。我只係想做甜品。」這次經歷,讓他更認清自己只愛甜品,於是跟兩個拍檔經營起 Pheromone(費洛蒙),催情外激素是也。
他解釋:希望甜品催化出快樂的心。
可於他自身而言,又豈不是繼續催化多快好省的幹勁?

 


Pheromone裏外色彩甜美繽紛,果然有催化出快樂的心的作用。 

地址:旺角白布街藝興大廈 8號地鋪
電話: 3998 3412
營業時間: 3pm-1am


撰文:周燕
攝影:王嘉豪

    文章標籤

    Pheromone 電話: 3998 341

    全站熱搜

    tvb4life 發表在 痞客邦 留言(0) 人氣()