深田恭子前作《女性決不容許》,收視可用慘不忍睹來形容,結局後立即又有新劇《第二愛情》出街,做偷食 Miss,搏翻身。 

電視精

日劇開季 人妻鬥

Ads by Google

對電視精嚟講,年尾年頭特別忙碌,一來因為年尾好多特備節目,再加上年頭就係新一季日劇開鑼,要追晒真係黑眼圈都現形!
今季日劇最令人期待,一定要數兩位女神扮人妻,深田恭子做老師愛上年輕 dancer,柴咲幸做模範主婦卻暗藏秘密,雙雙展現陰暗面,故事耐人尋味。
嫌太重口味?仲有好多其他題材嘅日劇,總有一套啱心水!

《第二愛情》

演員:深田恭子、龜梨和也
開播日期: 1月中旬
可觀指數:★★★★★
有調查指,日本已婚女性中, 4個就有 1個有婚外情經驗,今年嘅潮語就有「晝顏妻」,即係指趁老公返咗工,喺下晝變身去偷情嘅女人。《第二愛情》搵嚟深田恭子做「晝顏妻」,飾演不甘寂寞嘅女教師,遇上充滿熱情嘅 dancer龜梨和也,發展出一段為世所不容的愛情。恭子同龜梨和也剛剛合作拍攝完電影《 Joker Game》,話咁快又再次合作,默契十足,加上呢套劇喺晚間 11點播出,尺度會較大膽,令人期待會有性感床上戲,賣肉始終有市場嘅。

《○○妻》

演員:柴咲幸、東山紀之、黑木瞳
開播日期: 1月 14日
可觀指數:★★★★★
2012年松嶋菜菜子主演《家政婦三田》,打破日劇近年收視紀錄,不過菜菜子一早話明見好就收,唔會拍續集,於是編劇唯有轉寫另外一套劇!《○○妻》個名充滿神秘感,○○嘅意思係留空,即係由觀眾去評價呢個太太。柴咲幸飾演一名盡心盡力為老公奉獻一切的太太,不過模範夫妻背後其實暗藏秘密。睇完故事簡介之後,都唔清楚講乜,非常符合編劇一貫的風格,即係唔到最後都唔會穿橋,吊吓癮先至可以推高收視吖嘛!

《無間雙龍》

演員:小栗旬、生田斗真、上野樹里
開播日期: 1月 16日
可觀指數:★★★★
小栗旬同生田斗真喺 2007年拍《花樣少男少女》,一躍成為一線男星,相隔 8年再次合作,唔係拍青春喜劇,而係改編漫畫的《無間雙龍》。原著漫畫累計銷售量突破 120萬部,講兩個男仔於孤兒院長大, 15年前親眼目擊老師被人殺死,令他們決意利用自己力量去維護正義,一個加入警隊,另一個加入黑社會,暗地合作,尋找證據解開當年謀殺案的真相。

《錢的戰爭》

演員:草弓剪剛、大島優子、渡部篤郎
開播日期: 1月 6日
可觀指數:★★★★
《錢的戰爭》改編自韓國漫畫,之前曾經拍成韓劇,創下 37%高收視,往績睇落幾穩陣。故事講述男主角本來係人生贏家,因為爸爸欠債令他一無所有,最後決定加入高利貸公司復仇。 SMAP成員一向擅長飾演有黑暗面的角色,今次應該會有好表現。值得一提係大島優子從 AKB48畢業後首次出演日劇,死忠 fans一定唔會錯過。

《純白》

演員:堀北真希、柳樂優彌、志田未來
開播日期: 1月 13日
可觀指數:★★★★
女人勾心鬥角永遠有捧場客,今季有呢套《純白》,講護士嘅黑暗面,個個護士各懷鬼胎,溝年輕醫生、濫用職權、私生活唔檢點等等。堀北真希做開純情乖乖女,今次要去耍手段爭上位,都幾新鮮。

《約會∼戀愛為何物∼》

演員:渡邊杏、長谷川博己
開播日期: 1月 19日
可觀指數:★★★
渡邊謙個女渡邊杏喺 2014年憑晨早劇上位,仲同戲中男主角東出昌大一拍即合,年尾拉埋天窗!事業愛情兩得意, 2015年終於登上月 9女主角寶座,喺《約會∼戀愛為何物∼》飾演讀死書嘅中女,古板沉悶無人追,不過好想結婚,遇上想食軟飯的男主角,透過約會摸索相處模式。月 9有兩季唔係愛情劇,今次算回歸傳統。

《有問題的餐廳》

演員:真木陽子、東出昌大、二階堂富美
開播日期: 1月 15日
可觀指數:★★★
渡邊杏嘅新婚丈夫東出昌大都有劇上,不過呢套《有問題的餐廳》係女人戲,講女主角真木陽子同一班女同事,喺飲食界中被男人睇低,於是另起爐灶。前年日劇《最棒的離婚》大收旺場,幕後班底再次打造劇集講兩性話題,應該會有捧場客!

2015年第一季日劇時間表 星期一

TBS 20:00《警部補•杉山真太郎∼吉祥寺署事件檔案》
演員:谷原章介、要潤
富士 21:00《約會∼戀愛為何物∼》
演員:渡邊杏、長谷川博己

星期二

富士 21:00《影子寫手》
演員:中谷美紀、水川麻美
富士 22:00《錢的戰爭》
演員:草弓剪剛、大島優子、渡部篤郎
TBS 22:00《純白》
演員:堀北真希、柳樂優彌、志田未來

星期三

日本 22:00《○○妻》
演員:柴崎幸、東山紀之、黑木瞳
富士 22:00《遺憾的丈夫》
演員:玉木宏、倉科佳奈

星期四

朝日 20:00《出入禁止之女∼事件記者黑金∼》
演員:觀月亞里莎
TBS 21:00《美麗陷阱∼殘花繚亂∼》
演員:田中麗奈
朝日 22:00《 DOCTORS 3最強的名醫》
演員:澤村一樹
富士 22:00《有問題的餐廳》
演員:真木陽子、東出昌大、二階堂富美

星期五

TBS 22:00《無間雙龍》
演員:生田斗真、小栗旬、上野樹里
朝日 23:00《第二愛情》
演員:深田恭子、龜梨和也

星期六

日本 21:00《學校的階梯》
演員:廣瀬玲、神木隆之介

星期日

TBS 21:00《流星旅行車》
演員:西島秀俊、香川照之


撰文:關錦雯

    全站熱搜

    tvb4life 發表在 痞客邦 留言(0) 人氣()