海皇龍蝦燜鍋$398,一大隻龍蝦加幾粒帶子加幾嚿石斑肉加幾件翡翠螺,可惜,我點了海鮮醬,破壞好事。超後悔,早知揀麻辣汁。 

試食王

$400包海鮮 包表演 包一身藥味

Ads by Google

好有懷疑地打從心底問一句,十大乜乜,有幾大呢?例如十大金曲,有幾多首,你聽過一次,或以上?

 

開在銅鑼灣摩利臣山道的「黃記煌三汁燜鍋」,話自己係「中國十大火鍋」之一,嘩,好似好勁,但要你數出十款不同的火鍋,可能數到五或者六,已經要苦苦思考。在這個局面之下,吳若希也可宣稱自己是最受歡迎女歌手吧。總部位於北京,全國分店有幾百間,首次登陸香港,吃厭了雞煲,不妨看看這個燜鍋能否成為下一個熱潮。
一上到去,未見到環境未聽到人聲,率先聞到濃烈藥材味。不出所料,食完,返屋企,沖完涼洗埋衫都仲保留同一種藥材味,勁過小肥羊。跟餐牌推介,我們點了一個「海皇龍蝦燜鍋」,又龍蝦又帶子又翡翠螺又石斑,只係賣$398?唔單只咁,仲有表演睇,戴上透明口罩的侍應將食材以一個一個膠盒裝住,整整齊齊拎出來,好似好衞生咁喎,令人暫時忘記了自己正在進食中國品牌的出品,然後,慢慢地將食材放在熱鍋內,一滴水都無加。「食物嘅營養可以得到保存,咁樣嘅烹調手法,最健康。」侍應慢慢解釋。唔知點解,嗰一刻,我聯想起《真的戀愛了》入面嘅戇豆先生。


地方算闊落,但女廁勁污糟,污糟到你想幾急都要衝去時代廣場解決。 

用屋企必備的食物盒將未煮過的食物上枱,幾新穎,未見過。 

侍應在攪醬,睇到客人目瞪口呆。

 

好啦,個表演係乜呢,表演就係侍應先生出盡力將海鮮醬汁狂攪,圖片文字無法清楚說明,請各位上「壹週 Plus」看短片看整個過程,你會慚愧,去一般火鍋店,點麻醬點辣醬就算當你點埋麥樂雞醬,原來係幾咁膚淺。三個人食完個鍋,其實,只係得到視覺滿足,飽肚度大概只有百分之三十。味道方面,係鮮嘅,只可惜海鮮醬成兜隊晒落個鍋度,係北京口味,即係太濃,遮晒海鮮嘅真味。之後加湯再打邊爐,平平無奇啦,跟一般火鍋店分別不大,仲愈吃愈鹹。根據《食神》理論,呢個時候,正正係賣汽水時間,未有酒牌,好在有提供蜂蜜生薑茶之類的自製飲品。不過,更重要的,可能不是自製飲品,而是一件包住外衣的椅背套,否則,食飯錢可能要計埋乾衣費用。


大陸菜式,不求賣相。 

美國安格斯肥牛$198,細碟又唔新鮮,失望。 

冷盤方面,我點了酸辣魚皮$58(後)同涼拌海蜇$58(前),魚皮的賣相夠特別,調味也出色,相比起來,海蜇似一般燒味鋪的貨色。

雙拼蚌$128,即是桂花蚌加珊瑚蚌,無特別。 

柑桔話梅雪碧$23,我本來飲緊熱的蜂蜜生薑茶,但食食吓,人發熱,忍不住叫了這杯汽水,好細杯,一啖飲完,跟一般鹹檸七比,加了話梅,但分別不大,反而杯生薑茶其實勁重薑味,有心得多。 

評分

食物:★★★
服務:★★★★★
環境:★★
抵食:★★★

黃記煌三汁燜鍋

地址:摩利臣山道 9號天樂廣場 1樓
電話: 2110 4043
營業時間:上午 11:30至下午 11:30

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。

抵食矜貴泰菜 brunch

Mango Tree進駐香港之後,即成城中高檔泰菜推介。菜式好吃、賣相精緻,不過定價比其他泰國館貴一截,近期銅鑼灣店推出週末 brunch,九款招牌頭盤,如柚子大蝦沙律等任點任食,主菜如泰北炒海鮮等,八款選一,每位另送椰王燉翅和黃咖喱龍蝦,最後還有多款自助甜品,兩三個人根本試唔晒咁多款,$388食足三小時,抵。

Mango Tree Cubus
地址:銅鑼灣開平道一號 Cubus 5樓
電話: 2577 0828
供應時間:星期六及日 12nn-3pm
價錢︰成人$388、小童$228
加$30任飲泰國紅白餐酒、果汁和汽水

澳門任食海鮮火鍋

有冇試食去金沙打邊爐?金沙閣最近增設更多海鮮缸,同時推出任食海鮮火鍋,除了必備的美國牛、餃類、蔬菜之外,連貴價材料如波士頓龍蝦、基圍蝦、肉蟹、象拔蚌仔、鮑魚等,超過十款海鮮無限量供應,並非一般任食火鍋可比。湯底有冬陰功、人參豬骨雞湯、番茄魚頭湯等特色選擇,雖然其他配料款式不特別,每位$488,值得一試。

金沙閣
地址:澳門金沙酒店 3樓
電話:+853 8983 8222
供應時間: 5:30pm-11pm


撰文、攝影:試食王

    全站熱搜

    tvb4life 發表在 痞客邦 留言(0) 人氣()