位於新宿旁神樂阪站的 la kagu,由舊倉庫改建而成,外形殺食,主打生活雜貨,你可以理解是一間再高檔次少少的大型無印良品。 

登機證

 

旅行 旅遊 六折 東京

Ads by Google

2014年底最近一次到東京,跟 1999年暑假首次到東京,有點一樣,有點不一樣。
一樣,因為日圓貶值,回復到十幾年前的水平,跟十算時代相比,現在去東京,似打了個六折,以前不捨得的,現在通通變得不可不捨得。

不一樣,因為站在新宿街頭,少聽了親切的廣東話,聽多了國語。以前,香港人的高聲喧嘩亂打亂撞,令日本人難以容忍;今日,香港人感同身受。我們開始學懂優雅。
於是,我選擇來到新開的幾個商場,趁未成旅行團必到之地,避開人潮,寧寧靜靜的鳩嗚。在這裡鳩嗚,很安全。

大師級改裝倉庫

去東京,第一時間,衝去新宿最多人的地方,行藥房、行 0101、行 Big Camera。我懂的。
如果,你已經厭倦了;或者,還有空閒;又可能,想在附近找個稍為新奇的地方去等待;建議你從新宿西口上車,乘搭都營大江戶線,五個站後,在飯田橋站落車,行幾分鐘,就會見到 la kagu。
la kagu的前身是出版社的書籍倉庫,建於 1965年,現由名建築師隅研吾的工作室改裝,保留了倉庫原貌,最難得在門外興建了由地面通往二樓的巨型木樓梯。採訪當日,該處空間就放了攤檔,放售日本自家出產的農作物收成,不假外求,符合講求在地的潮流趨勢。
你最關心有冇嘢買?係有嘅,由男女裝到家居雜物到傢俬都有。當然,你不要拿來跟十層高的百貨公司來比較。問心,只為購物的話,無大減價又無懂國語售貨員的 la kagu不是最佳選擇,但這裡有一個佔地接近半層面積的咖啡廳。在二樓,更有一個擺滿名人推介書籍的演講廳,你喜歡的話,大可在這裡歇一歇息而無人騷擾,也符合講求進身偽文青的潮流趨勢。


二樓話就話係傢俬部同男裝部(左圖)的區域,但其實比較似一個藝術品的展區(上圖)。 

 

 


不定期會有不同攤檔在門外擺設(中圖),多數在週末,這個星期,是農作物日,主要目的是推廣食自己……種的食物,例如埼玉番茄,及京都蘿蔔(右圖),標明不含農藥。 

 

 


採訪期間正值聖誕前夕,店內放了很多類似福袋般的聖誕禮物盒,有平有貴,買中有呢隻企鵝擺設的,發達。 

Macaron造型的蠟燭。 



成個演講廳,店鋪會不定期搞作家演講會,隔籬就係一大列書架,真奢侈。 

誰是隅研吾?

日本有名建築師,不只一個安藤忠雄,至少還有隅研吾。擅長把自然景觀融合在建築物內,創造外表流露出禪意但耐震度高的作品,被稱為「弱建築」或「負建築」。
著名作品包括位於那須町的石之美術宮(圖),亦著有多本有關建築的書籍。

 

咖啡廳設有兩張小梳化,但搶眼的是兩張長木枱,客人可悠閒地坐低閒聊,尤其當你老婆或阿媽還在購物。點菜好簡單,餐牌上有手繪圖案(上右),唔識日文就算唔識英文都唔會搞錯,必點自家製醬汁熱狗$38(上左),一來幾好食,二來係無乜其他選擇。


 

la kagu
地址:東京都新宿區矢來町 67
營業時間: 11:00-22:00(咖啡廳 08:00-22:00)
交通:神樂阪站或飯田橋站
網頁: http://www.lakagu.com 

四百年風光再生

la kagu是將幾十年歷史的倉庫活化,位於銀座旁的 COREDO室町,目標是將整個日本橋區再生。
日本橋一帶在四百年前是繁盛市鎮,至今該區仍保留了很多有成三百幾年歷史的老店。跟港島西不同,這裡的老店沒有被趕盡殺絕,反而被重新包裝變成賣點。在 2010年率先開業的「 COREDO室町 1」是先鋒,剛開幕的「 COREDO室町 2」及「 COREDO室町 3」接力主打,精選接近一百間老店進駐,但係又加入開通宵的戲院,務求將古老與年輕聯成一線。
得唔得?如果你依然對啲精美得過分的漆器無興趣,或者唔想研究得日本人有感情的傳統擺設,行半粒鐘可能都嫌多。放入口的,是另一回事,百年老味,真係唔講得笑,求其入間餐廳,都保證食到有個性有特色嘅味道。關於食物,果然愈老土愈吸引。


四樓成層都係無印良品,都要符合商場的特色,特設 Found Muji專區,售賣從不同地方引入的精品,喺第二處的無印良品都搵唔到,像這款瓷杯,賣$128。

咪以為真係得漆器、筷子、織布之類的老店,其實,商場內也有不少賣少女風精品的鋪頭,例如這間 IDEE shop。 

商場內,有好多獨沽一味只賣一樣嘢的專門店,例如這一間,賣筷子的。商場的店鋪門口全部掛上招牌布,為懷舊。

眾多餐廳中,名氣最響,叫日本橋 Dashi Bar,賣老日本的家常便飯風味,勁清淡,但確實食得出跟其他餐廳的味道截然不同,一個午餐賣$70。 

iPhone殼$320@漆器山田平安堂嫌一般漆器老土的話,整番個漆器 iPhone殼夠勁喇啩,仲要與時並進係 iPhone 6殼。 

木板手染陣屋福貓擺設$100@COREDO室町+在 COREDO室町 3的三樓,有間 COREDO+的 pop up store,專門給商戶作短期租用,現在是飛驒高山真工藝,陣屋即係江戶時代的政府總部,傳說福貓可作為護身符之用。信吓囉。

和菓子,這款叫寒椿,根本是一件藝術品,$83@鶴屋吉信,一啖食完,但可以近距離欣賞到師傅手造的製作過程,上「壹週 Plus」睇啦! 

COREDO室町由日本名發展商三井不動產籌劃,其實只屬整個日本橋再生計劃的一部分。人家搞舊區翻新,人人也開開心心。 

Peggy先生話你知:買化妝品記得退稅!

今次行程,在 YouTube設個人旅遊頻道( http://www.youtube.com/peggysensei )的日本通 Peggy先生也有同行,在「壹週 Plus」的短片做現場報導,去過涉谷的 Snoopy Cafe,又試過出海睇彩虹橋。 Peggy先生特別提醒各位,以前,要去百貨商場或者名牌店,買衫買鞋買電器買滿 10,000円先有得退稅;不過自從 2014年 10月 1日起,去東京的大藥房買藥買化妝品,買滿 5,000円都有得退稅。搵到上面呢個 logo,記得帶埋護照去掃貨。想知申請退稅的流程?留意「壹週 Plus」啦!

 

COREDO室町 2、 3
地址:東京都中央區日木橋室町
營業時間: 10:00-21:00(商店)/ 11:00-23:00(餐廳)
交通:三越前站或新日本橋站
網頁: mi-mo.jp/special/coredo

東京站一百歲 必掃手信

地鐵,真係好多人好鍾意。你睇港島西環通車,幾多人晨咁早仆起身出去搶搭頭班車就知。東京站仲勁,一百周年紀念,引來無數強國人搶購限量 Suica卡,仲搞到要腰斬臨場唔賣。 Oh! Sorry,原來強國人瘋狂搶購是為了搏炒賣,不是建基於情感上的支持。
為慶祝東京站開業一百周年,站內除咗有開到 1月 12號嘅「 Tokyo Box」售賣限量精品外,站內商店亦一齊響應,齊齊推出紀念產品,特別推介係一系列手信,尤其成田機場商店現正改建,無乜手信賣,不妨先去東京站買啲特別版來孝敬親友同事。做人,都係有誠意啲好啲。

 

 


雞蛋布甸$70/4個@COCORO NO AKARI在東京站九の內大樓的超市內,找到這個賣相無敵的手信推介,非香港的 copy cat可比較,味道略甜,但難得在可雪藏三日,足夠時間帶返香港。 

木市葉壽司$10/1個@東京站 KITTE平宗壽司都可以用嚟做手信?就係,喺奈良有百幾年歷史的老店,來到東京站開分店,用 g葉包住壽司,以腌魚代替魚生,可以保鮮三日,仲有多款口味選擇。 

松杭物語朱古力條$70/14條@東京站 Tokyo Box象徵車站底下的松杭,作防震用,兩年前被抽出換上新的水泥杭。呢款手信的意義深長,但味道平平。

限定版東京香蕉蛋糕$70/8件@東京站東京香蕉八重州南口站仲買香蕉蛋糕,有冇搞錯呀?香港人最鍾意的日本手信,為慶祝東京站一百周年,出個特別版,除咗原味,仲有小花圖案香蕉奶昔味,死未? 

蜂蜜華夫餅 Honey Sugar$70/8件@東京站東京銘品店乜都唔使講,呢款 Honey Sugar被選為東京站手信的第一位,至好食,建議買來俾自己食嗰類。 

Beams製作的 Tee$264

tote bag$139 

手巾$70 

有用資料

簽證:持特區護照及 BN( O)均毋須簽證
機票:乘坐國泰航空前往東京成田機場,票價未連稅$4,020起
交通:在東京市內搭地鐵,購買 Tokyo Subway Ticket最抵,可以無限次任搭東京 Metro九條線及都營地下鐵全線。票價分一日($52)、兩日($77)及三日票($97),在成田及羽田機場限量發售。
貨幣: 100日圓約兌港幣$6.4
鳴謝: JP Rental


撰文:方俊傑
攝影:劉家銘
mailto:nextb@nextmedia.com

tvb4life 發表在 痞客邦 留言(0) 人氣()