唔好講咁多,快啲 bookmark「 http://nextcar.next.hk」喺手機度!或者去「壹週 Plus」 app嘅 left menu, click入「壹車在手」。 

ILIKE

壹車在手 梗係要 like

Ads by Google

賣花當然要讚花香,賣橙實話個橙好甜,小弟同另外兩位同事,再加埋 Marketing同事,夾手夾腳搞出嚟嘅「壹車在手」專頁,你哋睇過未呢?

 


@劉定邦 

睇過嘅,多謝多謝!未睇過嘅,又或者冇車牌嘅,其實都可以照睇,因為入面有好多汽車冷知識,我哋用短片形式 present出嚟,深入淺出。另外,車價表、車展時地、油站位置呀咁,有時朋友想買車,搭朋友車要搵油站,「幫緊你幫緊你幫緊你」,打開「壹車在手」就得!

起格當有趣

記得細個玩紅白機嘅 RPG遊戲,雖然畫面起晒格,亦只得 8bit音樂配襯,但一樣玩得津津有味。如果用而家嘅標準,吸引力一定好低,但對於年過三十歲嘅玩家,都算係一種集體回憶。最近有隻日本 game《 Drancia》推出,正正就採用當年低像素風格製作,玩法係橫向卷軸式動作打怪,操作只係㩒畫面嘅左右鍵同跳高鍵,當然都有 Boss俾你打。老實講,要打爆呢隻 game,應該都冇可能,原因唔係難度太高,而係未必有心機玩咁耐,但作為一種集體回憶,玩吓都無妨。


見到《 Drancia》呢個畫面,仲有唔少熟口熟面嘅怪物,真係以為自己玩緊紅白機。 

@勞耀全 

洗腦音樂 game

一直都唔多明點解啲人會迷上虛擬偶像初音,把聲用電腦軟件合成出嚟,居然可以有咁多 fans,瘋狂到明知演唱會只係將初音嘅影像投射上舞台,都照樣撲飛入場。玩完 PS Vita隻《初音 Miku Project DIVA F2nd》音樂 game之後,終於開始有啲理解,雖然把聲係合成出嚟,但啲歌聽聽吓又幾特別幾好聽喎!間唔中仲會唔覺意「哼」埋出嚟,絕對可以稱得上係洗腦 game。講番隻 game,真係難玩到死,啲指令符號又多又難記,一開波揀「 Normal」難度,玩咗幾次都過唔到關,認真失禮,最終為咗聽多啲歌,唯有屈服揀「 Easy」先得。


玩嗰陣睇得初音嚟又睇唔切指令,好易死。 

@潘健文 

自拍小星球

鍾意行山嘅人,一定會鍾意用 Ricoh部全方位相機 Theta m15,皆因影出嚟啲相夠晒特別,好似上個禮拜帶咗上獅子山山頂睇日出,拎出嚟高舉一影,即刻炮製出 little planet效果相,將完成圖俾其他山友睇,真係睇到嘩嘩聲,爭住問係咪用手機 app影。其實的確有隻免費 app「 PlanetCamera」做到類似效果,原理係將幅相拉長㩒扁拗曲令到左右邊位駁埋一齊,做出小星球效果;不過,影嗰陣左右兩邊一定要一樣顏色,駁出嚟先唔會咁突兀,限制比較多,點都唔及 Theta m15方便,位都唔使度就影得。另一個好玩嘅地方係同山友影合照,成隊人圍個圈一影,又搞掂, upload上官網再 share條 link出嚟,之後大家鍾意點校角度都得,個個人都可以做 center。


部機神奇在影唔到自己,用手揸機嘅話,影出嚟隻手會變成揸住空氣,效果怪怪哋,配番條自拍棍會自然啲。 

@周群雄 

text:科技組

    全站熱搜

    tvb4life 發表在 痞客邦 留言(0) 人氣()