孩子的語音發展是有先後次序的,但通常五歲已經能完全掌握母語的發音,若孩子在這方面出現困難,應盡快尋求言語治療師的幫助。 

親壹親

發音不準 咪賴 BB話

Ads by Google

小寶寶牙牙學語,就算咬字不清,為人父母的,也樂在心頭。然而,當孩子去到三、四歲,如果仍然發音不正,又或者經常詞不達意,家長就應當心孩子是否有黐脷筋、發音困難,甚至是語言發展遲緩等問題,須盡快找專家評估。

 

訪問之先,郭太邀請女兒作自我介紹,小妹妹走到記者面前,靦覥地說︰「我叫郭雙瑜,今年四歲。」郭太笑着點頭稱讚雙瑜說得好,「換着係幾個月前,佢會叫自己做『郭鱆魚』!」

脷筋短 發音難


嚴重黐脷筋的患者,會呈現「心形脷」。 

唸幼稚園 K2的雙瑜,並非有心替自己改花名,而是她根本不能夠準確發音。郭太表示︰「雙瑜兩歲讀 N班時,已經識得講好多嘢,只係發音唔準。例如『呢度』會講成『 A度』;『的士』就講成『棘紙』。最初我以為呢啲係 BB音,大大吓就會無,加上返學亦無老師投訴,所以就一直無理。」
直至去年,雙瑜因傷風感冒看醫生,醫生奇怪她三歲多仍然咬字不清,於是替她檢查舌頭,方發現原來她有「舌繫帶縮短症」,俗稱黐脷筋。
牙周治療科專科醫生馮建裕指出,舌繫帶(脷筋)是舌頭下的一片薄膜,正常情況下,脷筋不會影響舌頭的活動,但若脷筋過短,舌頭的活動便會受限制,「患者條脷會被脷筋扯住,有啲嚴重個案,個口稍為張大,條脷已經頂唔到上顎,又或者條脷向前伸到盡,都只係掂到門牙、嘴唇邊,咁會好影響講說話,尤其係牽涉到條脷尖要頂上門牙嘅發音,例如 l音、 t音,佢哋會發得唔準。」

微創手術 解除束縛


手術前的雙瑜,舌頭頂多可觸及嘴唇,手術後差不多可觸及三分二的下巴。 

黐脷筋不一定要做手術,情況輕微者,如經言語治療後,能夠成功用張口的幅度去調節發音,可考慮不動手術,但如果患者的脷筋短得導致有「心形脷」,醫生就多數會建議做手術。
雙瑜正正有一條心形脷,考慮到女兒即將要應付小一面試,郭太遂於今年七月,安排她做手術,而郭太亦棄用傳統開刀的方法,選用了水激光切除手術。
馮建裕醫生解釋,水激光是激光的一種,創傷性較傳統開刀手術為低,「水激光其實係結合水同激光嘅優點,再配以合適嘅波長、合適嘅能量去進行切割手術,水激光尤其適合用於含水分嘅組織,例如口腔,亦由於切割面較細緻,深度亦較淺,所以手術傷口好細。」
記者問雙瑜做手術痛不痛?小妮子搖搖頭,郭太補充:「整個手術唔使一分鐘,傷口亦只係好似痱滋咁細,所以雙瑜都無驚無喊,離開診所後仲好開心去食雪糕。」
解除脷筋束縛後,雙瑜發音問題逐步得到改善,馮建裕醫生強調,年齡是重要關鍵。「最好喺四、五歲,未升小一時做,呢個年紀,既聽得明醫生指令,又可以坐定定。相反,如果拖得太耐,小朋友長大咗,自信心可能會受影響,而且舌頭肌肉長期缺乏適當刺激,係會退化、萎縮,到時即使做手術,發音嘅改善都未必會好理想,或者需要更長時間做訓練。」

咬字不清 發音障礙


儀器結合了激光和水的能量,可進行較細緻的切割手術。 

五歲半的恩恩,非黐脷筋一族,但一樣難以字正腔圓地說話。媽媽 Elaine憶述︰「其實喺恩恩幼稚園 K1上學期,我已經主動問老師,有無覺得佢嘅發音同其他小朋友差好遠?當時幼稚園老師認為佢仲細,話可以再觀察多一個學期先作定論,結果等到 K1下學期,恩恩情況都係無改善,我就帶佢去做評估。」
聖公會聖基道兒童院健苗軒高級言語治療師鄭文琦透露,恩恩首次做評估時大約是三歲半,當時她很多音都發得不準,「例如將 s音嘅『色』讀成『的』; t音嘅『跳』變成『釣』; p音嘅『跑』讀成『飽』; f音嘅『火』變做『頗』; k音嘅『咳』讀成『桔』。」
恩恩智力正常,語文表達和理解能力亦無問題,也沒有黐脷筋,最終被評定有「發音障礙」。 Elaine笑言,一直懷疑恩恩是受「竹昇仔」爸爸所累,「我老公喺加拿大長大,平日主要講英文,佢廣東話講得好差,唔知係咪咁,影響到個女發音都唔準。」

鍛鍊口肌 重複練習


Elaine喜見女兒受訓後發音有所改善,但平日仍然「聽到實」,一發現恩恩發錯音便即時糾正。 

鄭姑娘稱,家庭語境複雜確有影響,但很多時有發音障礙的小朋友,都是受先天因素影響居多,其中包括腦部和口部肌肉(如嘴唇、舌頭)的協調能力欠佳等,惟透過後天訓練,是可以得到改善的。
恩恩四歲起開始正式接受言語治療,課堂內,言語治療師透過不同的遊戲和圖卡,糾正恩恩錯誤的發音,「發唔同音時,嘴形係點、條脷點配合,都要好仔細咁話俾小朋友知,要佢哋不斷重複練習。另外,言語治療亦有一個過程,最先係由單字學起,之後係詞語,跟住係句子,之後就要融入生活層面。」
恩恩受訓一年,掌握到大部分的基本功,言語治療師批准她畢業,但 Elaine就繼續𥄫到實,不敢鬆懈,「耐無見嘅親戚朋友,都發覺恩恩而家發音清晰咗好多,而事實上,佢八、九成時間都係講得準確嘅,只係一心急,又會發錯音。遇到呢啲情況,我唔會俾佢過關,一定會扮聽唔明,要佢慢慢重新再講一次,通常佢都可以做得到。」

三歲大 BB 只曉講單字


恩恩有發音障礙,言語治療師教她用吹泡泡的遊戲鍛鍊口部肌肉。 

同樣五歲半的謙謙,在媽媽李太和協康會言語治療師張嘉怡陪伴下,跟記者和攝影師見面。謙謙起初有點怕醜,經常依偎在媽媽身邊,張姑娘先替他打開話匣子,「謙謙,你睇吓呢間房有幾多個人?」謙謙認真地數一遍,然後回答︰「五個。」張姑娘提議他問問「陌生人」的名字,謙謙於是來到記者和攝影師面前說︰「請問你哋叫乜嘢名呀?」一輪介紹後,張姑娘把話題一轉,詢問謙謙今日怎樣來中心?謙謙答道︰「我今日坐單層巴士!」
以上的對答,看似簡單,但卻是謙謙花了整整一年零三個月的時間學回來的。據李太形容,謙謙一年多前,只是一個僅懂得用單字或尖叫來表達自己的「大 BB」,「謙謙差不多三歲時,都只係識講好簡單嘅詞彙,例如爸爸、媽媽、車車,而佢想要乜嘢,亦都只係會指住尖叫,從來唔識得講出嚟。」
但這一切,在李太看來,都屬正常,「因為人人都話男仔係遲啲先識講嘢嘛!」直至一二年夏天,滿了三歲的謙謙仍然「口水流流」要繫着口水肩上遊戲班時,導師發覺有不妥,建議李太帶他去檢查一下,經評估後,謙謙證實是「語言發展遲緩」。

語言發展遲緩 特訓後吱吱喳


有語言發展遲緩的謙謙,正在玩醫生遊戲,最初他不曉得怎形容打針的部位,經言語治療師提示後,他很快能說出完整句子︰「你有敏感,我要幫你打針、打手臂。」 

張姑娘解釋,語言發展遲緩是指小朋友在母語上的發展,比同齡小朋友有明顯差異,「語言發展遲緩包含言語理解能力、言語表達能力及發音準繩度。我哋接手謙謙呢個個案時,佢四歲四個月,當時佢發音係清晰、無問題嘅,但言語理解及言語表達能力,就只係好似一個兩歲幾至三歲嘅小朋友,只能夠接收好簡單嘅指令,而佢亦只識得運用好短嘅句子,例如只講到『搭車』、『放喺度』等等。」
她續稱,導致孩子語言發展遲緩的原因很多,外在因素包括語言環境刺激不夠、家庭夾雜太多種語文令孩子出現混亂等;內在因素則包括聽力、智力、口肌活動能力出問題等。
謙謙聽力和智力也是正常,今年唸幼稚園 K3的他,認字、寫字、運算各方面都應付得到,於是,張姑娘便嘗試透過他感興趣的活動和遊戲,並由淺入深,由具體到抽象,加插更多謙謙需要掌握的詞彙,以及引導他運用完整句子去表達。
經過一年零三個月的特訓,李太終於聽到兒子「學是學非」,既開心又感動,「以前佢完全話唔到俾我知學校發生乜嘢事,但最近,佢竟然識得同我講,某某同學做咗壞事、某某同學點樣曳曳,我睇見佢真係進步咗好多。」謙謙現時的語言發展比同齡小朋友只稍微落後半年至九個月,對於謙謙終有一日能「收復失地」,張姑娘感到樂觀。

話你知

由於咀嚼和說話均需要口部肌肉的良好配合,故咀嚼能力欠佳的孩子亦有可能會有發音不準確的問題。咀嚼能力是要訓練的,因此專家建議家長在孩子一歲半後,不要把食物切得太細,以免令孩子失去練習咀嚼的機會。

求助門路

家長如發現孩子有發音障礙,就不應耽誤,並盡快循下列途徑接受專業評估,再尋求合適的治療方案。

蛛絲馬跡

若小朋友有語言發展遲緩,其實早在一歲已有跡可尋,只要家長細心留意,便可發現到蛛絲馬跡。

話你知

家長如懷疑子女有語言發展遲緩,可往母嬰健康院接受初步檢查,如有需要,健康院會安排小朋友到兒童體能智力測驗中心作進一步評估。


撰文:沈雅詩
攝影:潘樂文
mailto:features@nextmedia.com

    全站熱搜

    tvb4life 發表在 痞客邦 留言(0) 人氣()