爆壹爆

講多錯多

Ads by Google

誕聖參加各江湖 party,碰到唔少師爺和律師,大家話題都離唔開剛判刑嘅新地案,兩位大孖沙,一個有罪要入監倉,另一個則無罪釋放。點解兩兄弟各奔前程呢,班師爺就爭住教育班大哥法律通識,話呢個係歷史教訓,面對差人或者法庭,好多時講得愈多就愈蝕底。點解咁講呢,話說大家一聽到郭炳江選擇在庭上自辯,都搖晒頭,搵錢你就叻啫,上法庭都係俾律師講穩陣好多。

 

正所謂古語有云,多言多敗,個客一自辯,好多時又忍唔到口亂爆肚,例如郭炳江在庭上突然爆料,說董下台前中聯辦問過大佬郭炳湘點睇曾蔭權,「呢啲咪講多咗囉,你唔知陪審團點諗,可能陪審團覺得你仲有好多嘢收收埋埋唔信你。」師爺仲話,郭炳聯唔自辯,講少錯少,反而罪狀未必上到身。

報紙檔冇報紙賣

上個禮拜去尖沙咀鳩嗚,經過報紙檔,諗住買份報紙睇吓,點知行咗幾檔都話冇。
仲要檔檔都古靈精怪,大大個檔口,淨係得十分之一嘅面積,擺咗幾本雜誌,其他位就放滿中國政治書、涼果、卡通貼紙、飲品,甚至鎖匙釦紀念品,就係冇報紙。
爆哥於是搵報檔老友光仔問個清楚,佢好無奈咁話:「而家都冇人睇報紙,多數人都睇手機,而且報紙一份先賺到個幾銀錢,全日先賣得十幾份,唔賣其他嘢幫補真係死得。」隔籬檔阿 Nick附和說︰「晨咁早起身疊報紙好辛苦,唔啱我哋啲後生仔。」佢仲話為咗吸客,每份報紙都送一包紙巾,變相倒蝕一蚊。翻查之下,原來報紙檔愈來愈少,五年間由八百幾檔,減到而家得四百幾檔。



強國人最愛讀物 

老外下跪冧港女

正所謂外國月亮特別圓,做乞兒都高貴啲。前排佐敦出現咗一個滿頭白髮嘅老外,日日响佐敦跪地乞錢。
爆哥有日行過,見到個老外望落似五、六十歲,著住件粉紅色 T-shirt,揸住支柺杖,行到去港鐵站出口,見到人多,就即時跪低,攤大手板向途人乞錢。好多港女行過見到老外跪地,都會主動行埋去俾錢,十蚊、廿蚊甚至五十蚊都有,比起來自強國的乞丐,港女似乎疏爽好多,甚至有港女會跪低用英文關心佢幾句,然後一臉滿足咁笑住離開。
聽附近街坊講,老外每朝約十點開工,一路乞到黃昏先收工,粗略計算,佢每個鐘都乞到一百多元,每日都有七、八百蚊進賬。爆哥見佢乞到咁上下,會去附近便利店買嘢飲,又會去餐廳食飯,咁就使咗五十幾蚊,比起好多打工仔仲要豪爽。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

    全站熱搜

    tvb4life 發表在 痞客邦 留言(0) 人氣()