呢架古董車靚就真係幾靚,但真係唔易揸,林雨陽都唔係好夠膽揸上斜。(江永健攝) 

八卦陣

袁彌明出嫁 連度三次蜜月

Ads by Google

人民力量主席袁彌明( Erica),上星期六同謎米新聞 CEO林雨陽拉埋天窗,當日朝早一對新人喺聖堂行禮之外,仲擺足兩晚婚宴。 Erica話星期六晚擺西式,主要邀請兩人嘅朋友同埋女家親戚,擺咗十九圍;星期一晚擺三十圍中式,招呼老爺嘅親戚朋友。

 


袁彌明同林雨陽嘅婚禮,連長毛議員都到場,仲吻賀佢兩公婆添!(李啟華攝) 

佢哋一早去咗法國同西班牙預支蜜月,所以婚禮之後無話特別去邊度蜜月,但 Erica話佢哋已經安排咗一、二、三月分別去東京、墨爾本同埋北海道玩,變相連度三次蜜月,認真開心。搞晒結婚啲嘢之後,差唔多就係政改第二階段諮詢喇, Erica就話會繼續抗爭,方式仲未諗定。
其實行禮嗰朝早都有啲好笑嘅事發生,話說佢哋租咗架古董 Benz俾新郎哥揸,車住 Erica影吓相,但呢架車實在太難揸、太易死火,所以佢只敢揸車落斜去影咗啲靚相,但之後就要交番俾車主揸番架車上嚟喇﹗

港鐵仿造優惠機 港鐵仿造優惠機

港鐵西港島線本週日正式啟用,列車服務總算運作正常,唔少人轉而關注港鐵嘅「貼心」服務,當中以新式售票機最為網民津津樂道。部機將售賣單程車飛、八達通增值同埋查詢餘額、交易記錄嘅功能集於一身,最抵死係可以用八達通買單程車飛,有市民寸港鐵呢項功能好似「太陽能電筒」咁無謂,有人話其實都方便幫無八達通嘅朋友買飛。
記者週日參觀香港大學站,發現另一「奇觀」,一部「自助優惠機」座落該站,唔少老、中、青市民都行埋去諗住嘟番兩蚊優惠,點知一嘟,先見到部機貼上「仿造」兩字。原來成個裝置係用嚟話俾乘客知嗰四部真嘅自助優惠機喺邊處,真係 fake晒成村人。


唔少市民拎定銀包,排隊「嘟」優惠,點知定睛一望,先知原來個裝置係仿造嘅自助優惠機,係用嚟教乘客搵真嗰部機。(羅國輝攝) 

咁多市民中招,係咪要讚個優惠機造得太真?(羅國輝攝) 

ATV剝削 廠巴接大陸客

亞視無糧出,連員工福利都剝削埋。行政部十二月中發出通告,話有兩日暫停穿梭巴士服務。呢架穿梭巴士主要接載員工由大埔火車站往返大埔工業邨廠房,暫停廠巴,就要靠小巴,出入好唔方便。
員工後來先知道,原來亞視當日要接待一批大陸演員宣傳外購劇集《四十九日•祭》,第二日仲要帶佢哋去觀光,公司為咗慳錢,唯有用廠巴招呼外人,員工嗰兩日就要搵其他交通工具。其實租架車招呼來賓都唔使好多錢,公司啲縮數愈來愈勁。
員工被拖糧咁耐,暫停廠巴呢啲小事已經見怪不怪,好彩公司餐廳係外判,唔受拖糧影響,員工總算有啖食。不過餐廳職員見到佢哋就講笑咁講:「我哋出咗糧喇。」搞到亞視員工酸溜溜。


ATV外購劇大陸演員嚟香港宣傳,究竟有幾多觀眾會睇? 

為咗接載一班大陸演員周圍觀光,亞視員工有兩日無得搭穿梭巴士。(羅國輝攝) 

董太最愛


董伯伯打藍呔,董太用黃頸巾,唔拖住手仲以為佢哋立場唔同而嗌交。(翁少陽攝) 

前特首董建華早排牽頭成立「團結香港基金會」,話要「打救」青年人,亦講到明堅決反對佔中。不過,董太好似喺衣著上就唔係好支持董伯伯咁喇!
十二月十八日中午,董氏伉儷喺 G4嘅保護之下,由屋企坐車去到中環嘅香港會食晏,記者喺香港會出面仲見到擔任基金會顧問嘅楊鐵樑架車,唔知佢哋係咪一齊食飯,邊食邊傾?
大概兩個鐘之後,董伯伯好 sweet咁拖住董太步出香港會。董伯伯打咗藍色呔,董太條頸巾係黃色嘅,仲用手揸住搞到成條黃絲帶咁,唔通佢同董伯伯唱反調,暗撐雨傘運動?


mailto:centipede@nextmedia.com

    全站熱搜

    tvb4life 發表在 痞客邦 留言(0) 人氣()