每有空餘時間, Miki都會去金融投資公司學嘢,演藝事業外,開多條出路。 

探熱針

學做金融投資 楊愛瑾唔急嫁

Ads by Google

餅碎楊愛瑾( Miki)被指介入永安太子郭永淳及其妻子伍智恆( Constance)婚姻,孭住第三者罪名,七年情長期受壓;最近郭永淳忽然有動作,發聲明剖白與 Miki是離婚後才開始,並交代與前妻的關係。男友挺身為自己澄清,但 Miki並不急於嫁入豪門,反而投身金融投資公司,做 OL學嘢,自給自足。

兩年內不婚

十二月初,朝早上班時間,記者於金鐘寫字樓區發現 Miki一身 OL打扮,行色匆匆。經了解,原來她只要有時間,便會到一家金融投資公司上班,邊做邊學。
「做藝人冇保障,學多樣嘢當自我增值,除咗金融投資, Miki仲有學潛水、打拳、攝影、畫畫,至於幕前事業,佢嘅焦點始終放喺電影。」知情者說。
雖然近年不時傳出婚訊,但嚟緊二月便滿三十歲其實不急於嫁人之餘,還積極計劃北上發展。
「過去一年, Miki已經去咗北京兩次拍網劇同電影,出年會播,公司亦會安排佢再放多啲時間喺內地。」
對於有傳 Miki一五年會結婚,其經理人雯雯說:「冇聽 Miki講過,公司都有問過佢,但佢話呢兩年內都冇呢個打算。」


已習慣乘坐公共車輛的 Miki,很多時都會搭地鐵或小巴上班。 

郭永淳前妻 Constance在男方發聲明後,沒有像以往般在微博攻擊 Miki,反而上載一些生活逸事,給自己新的開始。 

男友發聲維護

Miki自○七年被指介入永安太子郭永淳的婚姻,長期受病魔折磨的前郭太 Constance不時在微博貼相自爆病況,又多次作出攻擊言論,進一步將 Miki定性為第三者。居中的郭永淳一直保持沉默,直至今個週日(十二月二十八日),他突然發聲明剖白與 Miki拍拖,是與前妻離婚後的事。
「咁耐以嚟,阿淳因為唔想刺激到 Constance,所以同 Miki好低調,但無論點做, Constance都唔會接受到。呢七年外界不停話 Miki做第三者,佢忍住冇出聲,係因為同阿淳有共識,但呢段時間所有報導都係一面倒,阿淳睇到都戥 Miki不值,所以講出事實。」郭永淳身邊人說。



因為形象受損, Miki在港的工作機會不多,幸好她得到公司的相助,今年先後兩度去了北京拍網劇及電影。 

Miki與郭永淳拍拖七年,在相戀期間,負面新聞不斷,令 Miki的形象大損。日前男方發聲明堅稱是離婚後才跟 Miki開始,維護女友。

蒲頭惹插

Miki去年簽約 M& M Artist Management後,原本打算專注演藝事業發展,但有關她是破壞別人婚姻第三者的報導卻一直冇停,令她的形象大受影響。
「簽咗新公司, Miki諗住重新開始,仲有晒部署,先喺書展出文字相集,然後公司會開戲,點知 Miki一行返出嚟,無端端又有好多插佢嘅報導,搞到形象好差,直接影響佢接 job;好彩公司信任佢,香港冇乜機會,就安排佢返內地拍戲拍網劇,又幫佢接啲登台 show,如果唔係,佢仲難過!」知情者說。


Miki明白機會是留給有準備的人,因此在冇工開的日子,她跑去學潛水、打拳等,自我增值。 


在過去的七年,就算被外界插爆, Miki也是沉默面對,幸好有父母及哥哥的支持及信任,才令她撐下去。 

去年簽約新公司的 Miki,在書展推出全新文字相集,希望有新開始,豈料被負面新聞追殺,前路難行。 

撰文、攝影:娛樂組
mailto:nextb@nextmedia.com

    全站熱搜

    tvb4life 發表在 痞客邦 留言(0) 人氣()