So Comment

嘈過街市 

老巴剎 地址:灣仔道 207號地下 電話: 2893 3998(甲-) (蘇施黃)

Ads by Google

好嘈呀!!!
去嘅差不多 100%係熟客,仲要枱枱嘅枱上嘅紅酒樽好似打保齡球咁多。又唔知點解啲人飲咗酒,講嘢特別大聲,最重要係佢哋唔係傾偈,一人一句,佢哋大家一齊講,咁我又講你又講,固之然自己講緊嘢好難聽到對方講乜,於是大家就不停嘴,同一句說話可以講三、四次…… OMG!!!有啲熟客仲跨枱飲跨枱講,老巴剎又細,對唔飲酒嘅客人好似我咁,我覺得真係好嘈,好辛苦!!!

 

更好食,都要再諗過先至去!!!好似北角街市那間又係嘈到頭痛,真不能去。食物係「甲」變成「甲-」都係因為嘈同太逼了。

食物


醉酒鵝肝$188 

十分唔錯,鵝肝好滑,只係硬了一丁點,未能入口溶化,但好香花雕味,不過放在一片餅乾上面好似粗咗啲。

 


凍魷魚$368 

嘩!條魷魚成隻手臂咁大,但煮得好叻,啱啱熟!魷魚又新鮮,食落口係爽嘅!有三個汁跟,非常 refreshing。

 

原煲海南雞飯$388
飯好味,雞好滑,葱好正!



 


薑葱炒豬潤澤$128 

必食!超正!
豬膶望落去好似中式牛柳咁大片,亦厚厚哋!幾難煮得好呀,喺自己屋企就算我用煤氣公司嘅 turbo都無可能!豬膶面有少許燶,內裏剛熟,食落口又係仍然爽嘅,薑又香,葱更香,少了一點啫!!!呢碟餸顯出好功夫!

 


麥皮蝦$368 

唔好食,蝦又冇蝦味。
先鹹蛋黃再用麥皮 coat面,又唔脆,又太甜。

 


葱油羊腩$300 

朋友個個都話正!只係啲葱鹹咗少少!

 


油浸筍殼$875 

嘩!咁貴㗎!
我哋當年係無錢就食油浸筍殼。不過條魚好大,朋友話多啲人㖭,條魚大啲㖭,仲滑仲好食,呢條都已經好好食了。

 


浸花蟹$988 

全晚最貴,}對可以唔叫!

 


炖獅子頭$328 

獅子頭保齡球咁大,中間有啲豆腐,紹菜好甜,湯亦好鮮甜,值得一試。

 

5人食了$3,931,以坐得咁唔舒服就貴咗啲。但如果唔叫蟹同蝦,條單係$2,575又好好多噃!所以叫餸都要聰明些!

老巴剎

地址:灣仔道 207號地下
電話: 2893 3998

蘇施黃

資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。


攝影:蘇施黃

    tvb4life 發表在 痞客邦 留言(0) 人氣()