「鳩嗚」 hit到連袋、旅行團旗和革命都有,就知市民幾支持!(《蘋果日報》圖片) 

熱到爆

2014至搞笑潮語

Ads by Google

2014年快過,卻只剩下傷心:年初被迫無免費電視睇,年中又無真普選,仲嚟 87枚催淚彈、胡椒噴霧、暗角打鑊、警棍亂舞……寫到呢度都快想喊。阿媽教落:「做人咁苦,不如多諗開心嘢。」搵嚟年度好笑潮語,激發下快樂細胞,讓「籮毛」生活有番得笑。最緊要係毋忘初衷,開心感覺要延續至 2015年㗎!

潮語 鳩嗚

潮釋:普通話「購物」嘅廣東話諧音,亦指「說非成是」嘅態度。

潮源:電視台訪問反佔中女子為何遊行,佢答「過嚟玩」,仲話要「購物」。最後該女子被人拉走,但佢留下嘅「購物」一詞,旋即被改為「鳩嗚」以作紀念。
潮因:梁特首振英居功至偉,唔係佢叫人落旺角「購物」振興經濟,全港市民又點會天天「鳩嗚」,連名醫朋友都話:「喺尖沙嘴鳩嗚聽唔到你電話。」連高級知識分子、專業人士都用,可見「鳩嗚」真係潮語嚟㗎!




市民愛「鳩嗚」。(《蘋果日報》圖片) 

就係佢令「購物(鳩嗚)」潮爆香江。(《有線電視》畫面) 

潮語 你厚多士

潮釋:你好多事。

潮源:愛子深切嘅媽媽不忍女乘客阻住愛子喺車廂內進食,及想兩人霸三個位,出言指女乘客多事。可能愛子情急語言頻道未轉好,結果「你好多事」卻以廣東大陸口音講成「你厚多士」。
潮因:該媽媽喺近 10分鐘片段中,不停講咗「你厚多士」 10多次,懷疑達到洗腦作用,令全港市民深受影響,一有不滿就鬧人「厚多士」。


能喺短短幾分鐘講 10幾次同一句話,就知母愛的偉大。(互聯網圖片) 

「厚多士」幾得民心,有茶餐廳特別出套餐支持。(《蘋果日報》圖片) 

潮語 你係佢心入面條蟲


記者學嘢快,即時喺新聞中用了這句潮語。(《有線電視》畫面) 

潮釋:清楚對方幾時出拳、幾時出腳,咁私隱嘅嘢都知,真係肚裏條蟲先做到。

潮源: TVB新聞部居然有人清楚知道七警暗角裏嘅一舉一動係「拳打腳踢」,結果被新聞部萬人之上嘅總監袁志偉鬧有專業記者唔做,去做七警心入面條蟲。
潮因:袁志偉係大台新聞部總監,當然最有公信力最權威,佢講一句就係全行典範,所以連有線記者仔報道新聞都即時起用,否則老行尊嘅話都唔聽,會被罵:「依家做記者大晒啊!」

潮語 倒抽一口涼氣

潮釋:因驚恐過度,不禁擘大個口深呼吸而吸入一口涼氣。

潮源:因中大高級講師蔡子強多管閒事評論特首女齊昕手部流血事件,驚動賢良淑德大方得體小鳥依人嘅特首夫人梁唐青儀出嚟護女,瞪眉瞪眼七情上面做出激烈回應。當中夫人更因受驚過度不禁倒抽一口涼氣。
潮因:連男神黃子華喺棟篤笑中都要觀眾一同抽一口涼氣,就知呢句話幾有江湖地位,唔講唔潮囉!


無呃你㗎,特首夫人平時含羞答答(左),做乜係都要激到人哋嬲豬豬,要抽口涼氣啫!(右)(《蘋果日報》圖片) 

潮語 乜乜乜

潮釋:等等、之類。

潮源:喺旺角熱心幫忙清場嘅男子突然亮刀,被問為何帶刀出街,佢答話:「嗰把刀我到全世界都帶住,因為我鍾意食水果,每個國家都要食榴槤乜乜乜。」
潮因:大佬,佢去到邊都帶住把刀,把刀仲可以開榴槤,咁佢講乜你都要學啦!

潮語 一場誤會

潮釋:用嚟化解業餘造成嘅衝突。

潮源:講開男神子華,佢喺棟篤笑中更為政府化解催淚彈危機,想出潮語「一場誤會」:「好簡單,當你警隊係專業嘅,但係掟催淚彈佢哋係比較業餘嘅。……等如抗議班人都係業餘……所以業餘對業餘……『一場誤會!一場誤會!』咁咪搞掂。」
潮因:男神黃子華講嘅就係好笑就係潮,要解釋嘅咩?

潮語 鍾樹根

潮釋:「鍾樹根」唔係潮語,更加唔好笑,但佢講嘅任何說話都有機會成為好笑潮語,而且太多,不能盡錄。

舉例: 13年有「主(立)法會」、「子烏虛有」。今年代表作係:質疑港鐵洋高層韋達誠時講嘅「 You are尖明( dreaming) on your office?」「 I don’ t think so囉!」「 Same( shame)! Same( shame) on you!」中文更上一層樓,推出「雞毛鴨蒜」、「明張目膽」。
潮因: IT人=潮人;樹根=IT人,邏輯推論樹根=潮人,佢講嘅就係潮語。所以抵佢月薪近十萬,就算無嘢做到出嚟,講幾句潮語都值俾囉呵!


封咗 Treegun做「潮語男」,希望佢 15年再接再厲,別令港人失望,加油啊!(《蘋果日報》圖片) 

(互聯網圖片) 

潮語  Hehe


唔解釋咁多, Hehe。(《蘋果日報》圖片) 

潮釋:兩個「 he(他)」,用嚟回應有關男同性戀話題。女嘅就用兩個「 she(她)」。

潮源: 13年底興起,卻因「學民思潮」黃之鋒今年幫學聯嘅周永康和岑敖暉,喺 FB成立「捍衞 lester alex佔領巫山 HeHe團」而發揚光大,連 c9嘅我都知唔係解「嘻嘻」,而係跟男同性戀有關。
潮因:任何跟 alexster有關嘅都係潮。

潮語 我覺得咁樣好唔 organic囉!


(《中新社》圖片) 

潮釋:話人浪費唔環保。

潮源:《老表,你好 hea!》中,郭晉安經常講嘅一句話。
潮因: TVB喎,啲劇咁受歡迎,自然多人跟。據聞喺學界,尤其初中生間好流行,啲中學生開口埋口就話人:「你好唔 organic囉!」

潮語 一男子

潮釋:「一名男子」的意思。

潮源:年初,商務及經濟發展局局長蘇錦樑解釋,唔發牌俾香港電視係有「一籃子」原因,但網民唔信,認為係「一男子」的原因。
潮因:港人梗係撐港視,尤其一男子搞到全港無好節目睇,仲唔一世記住佢。

潮語 你會唔會一直陪我行落去

潮釋:跟字面解。

潮源:港視《選戰》第 3集中,李心潔問助手王宗堯如果佢參選,對方會唔會陪佢行落去。
潮因:絕對能打進無數港女深心處,尤其想到自己男友或老公,都想咁樣問下佢。似乎唔多好笑喎?點會令你失望啫!這詞有個搞笑用法,就係每次「鳩嗚」時都問老公或男友:「你會唔會一直陪我行落去,嗯?」


呢句潮語受歡迎,亦因場景拍得美,好有電影感。 



撰文:馮淑玲 
攝影:資料圖片

    全站熱搜

    tvb4life 發表在 痞客邦 留言(0) 人氣()