靚抽王

加入亞視,成為苦行僧一員!

Ads by Google

亞視嘅收視不嬲唔高,不過為大家帶嚟嘅歡笑係收視計算唔到嘅。另一方面,我哋反話王就認為,亞視嘅所作所為唔係大家諗得咁簡單,佢哋之所以逼啲員工「苦其心志,勞其筋骨,餓其體膚」,真正嘅目的係想佢哋能夠「成大器」!唔信?今期反話王就解釋你聽點解:

陪客為培訓演員真演技(苦其心志)

已經離開溫暖之家(即係亞視)嘅亞姐顏子菲,近日大爆喺亞視工作時竟然要出席奇怪飯局陪客食飯(仲要唔俾早走)。查實顏小姐係誤會咗,亞視此舉用心良苦,目的係令佢更加了解社會黑暗面,到日後拍劇做啲俾人壓迫嘅弱勢社群角色時,就能夠更掌握角色心理啦,係唔係先?

訓練以一敵百嘅人才過檔(勞其筋骨)

亞視員工就好似《戰狼 300》入面啲戰士,成日以一敵百。你睇亞視大姐大朱慧珊就知啦:主持係佢、拍劇係佢、唱歌係佢、慧珊時尚坊又係佢、新聞又係佢……亞視將旗下藝人訓練到能歌善舞、能屈能伸!你睇亞視前藝人張家輝、田蕊妮、杜汶澤有邊個唔係瓣瓣都掂?你睇過檔藝人田蕊妮、江美儀、萬綺雯幾多發揮機會?係喺亞視唔掂咋嘛!

訓練員工冇糧出都餓唔死(餓其體膚)

亞視公司裏面冇水飲、冇廁紙用, 11月嘅糧都冇得出,亞洲先生黃集鋒話自己戶口得番港幣 7個幾。正當大家深表同情之際,同為亞視人嘅袁潔儀竟然叫佢當買個教訓,話佢應該儲定錢。冇錯,喺亞視做嘢就好似進行緊野外生存鬥咁,你唔抱住冇糧出甚至餓死嘅覺悟你點會生存到?等於你喺野外生存,執到個蘋果都要分三次食呀我話你聽!不過亞視真係好體貼,網上盛傳佢雖然冇糧出,但係有糧借……雖然大家都唔明點解有錢借糧但係冇錢出糧(嘻!)。



結論:

據稱,亞視差 1500萬就出到糧啦…… 1500萬……哈哈,我都差 1000萬就買到 1000萬嘅豪宅啦……所以話,香港,真係需要亞視,就算世上最聰明嘅發明家都發明唔到一部可以出產咁多高質笑話嘅機器。

反話王

以反話普渡眾生,八盡天下娛樂事。


撰文:娛文樂

    全站熱搜

    tvb4life 發表在 痞客邦 留言(0) 人氣()