喺大自然裏吃飯,綠樹林蔭,鳥語花香,空氣清新,好過幾多五星級酒店。 

四圍走

2日 1夜體驗營 反思生活

Ads by Google

香港人搵食大過天,無得返工慘過父母被殺。
但賺埋咁多咪又係買衫買鞋大吃大喝去旅行使鬼晒,營營役役最後聞棺材香,最慘係一生在製造垃圾破壞環境禍延下一代,到底咁嘅生活是否最好?人到底有無其他選擇?
做人最忌無思想,搵食之餘都好應該反思生活?乜話,你唔知點做?
介紹你去個體驗營,二日一夜離開這妖黑都市,深入大自然過簡樸生活,燒柴擔水做勞動吃簡用簡穿簡,你會發現人生活其實可以好簡單,唔一定要大吃大喝咁膚淺㗎!

 


營友用木方和石塊搭建桌椅,還認真試坐,細心又窩心。 

名為「簡樸生活營」喺西貢鹽田梓,由西貢坐船去約 10多分鐘。假日島上遊人多,但我們平日去無乜人,正好做體驗。
營在「簡樸居」,是樹林中一間遠離民居的小石屋。主人歐紀復在台灣亦搞同類的生活營,佢有一套生活準則,入營人士都要遵守。香港的體驗營最近才開始,非常之新。
我們一行廿多人包船上島,歐紀復先介紹島上歷史和環境,再沿山路入營。進簡樸居的小路口橫放一支竹,人人都要彎身穿過,是想進營人學會謙卑,亦是主人想傳達的做人道理。

劈下去成群蟻

放低行李只是早上 10點多,已經要開始準備午飯,因煮食要自己挑水執柴起火,連餐枱餐櫈都要即場砌。好彩我們人夠多,分 4組負責不同工作。
擔水唔難,因小路口有廁所,幾個女仔就搞掂,於是幫忙執柴劈柴。從未試過劈柴真有點難,尤其港女手無縛雞之力,劈極唔斷,又唔可以劈得太大塊否則好難燒。到劈得有點技巧,拿起條大木方打算用力劈落去,哇,無數大螞蟻四散爬出,嚇到個個尖聲大叫急忙後退,等蟻散晒才敢繼續劈,如果我女兒看到肯定大哭起來。
至於洗菜的營友,歐老師就教他們把洗菜和洗米的水留下,用得嘅就洗碗,唔用得嘅就淋花。甚至兩天的廚餘都留下,看看可否堆肥。


飯碗滿是油和芡汁,歐老師教用煮麵水倒進碗內沖一沖,再把水喝掉。發覺碗變乾淨,洗碗更連洗潔精都唔使用。亦有營友用碌柚皮清潔,同樣乾淨,仲有碌柚香。 

天氣悶熱加埋柴火,個個煮到標晒面油和汗水。 

食得唔好嘥,菠菜根、矮瓜皮都照食,仲話營養價值高又可防癌。 

煮到面油出埋

開始起爐。所謂的「爐」只是幾塊磚頭疊高加張鐵絲網。初時無從入手唔知點算,好彩有歐太教路,樹葉放下層上面疊幼枝再燒張紙助燃,估唔到好快搞掂。
只是用柴煮飯,煙大攻鼻;加上天氣悶熱,個個煮到出晒面油,而個煲就燻到黑晒,在城市生活開反覺幾好玩。花了個多小時終煮出六道菜,全是素菜另加麵條,且少油少鹽非常健康。用柴火煮,食落有陣木炭香味。
每餐飯餸分量唔多,有食肉獸話食唔飽,但我覺七分飽更精神,尤其下午不再昏昏欲睡,仲乘機可清下腸胃。吃飯前,歐紀復總要我們感恩,細味食物的色、香、味,不要浪費,就算餸汁都唔好嘥。而且邊吃邊要用心去感受周圍環境,聽聽大自然的聲音。突然覺得身處大自然中吃飯,感覺好寧靜平和,吃啖飯都特別滋味。


有營友本打算在碼頭搭營過夜,最後因下大雨不能成事。 

晚上在街燈下吃晚飯,夠晒浪漫。 

營友幫忙搬木頭。

瞓到腳都痹

入營不收費,但要幫忙勞動,因屋內設施好多都是歐紀復兩夫婦和一班義工幫忙搭製。最近他們打算起間廚房,營友便幫忙四出搜刮別人唔要的石塊和木頭。平時沒勞動的都幾辛苦,尤其推石塊上斜路仲要被狗吠,但出身汗,人又再醒神晒。
勞動不久又要準備喺太陽落山前煮晚餐,因全屋係無電燈供應。這次我們手腳慢,最後要搬到碼頭街燈下進食。
到晚上突然下起滂沱大雨,放戶外的帳幕都濕了。但室內蚊好多如轟炸機嘈住晒,我們決定濕營都照睡。攝影師雖用充氣地蓆,但因石屎地實太硬,還是睡到腳痹。而我就好習慣,連平時瞓厲頸的情況都冇出現。
晚上想沖涼要自己燒柴煲水,但太麻煩大家寧願唔沖,又或用條濕毛巾抹抹身算數。去廁所就可以去路口公廁,不過我們沒學歐老師唔用廁紙,只用少啲。


歐紀復話市區亦可「信靠單行」。「慢步走在街上,不要跟別人講話,用心感受周圍的環境,留心周圍的人和事。有別於平日急忙的步伐,你會有不同的體會。」 

有朋友分享山區居民珍惜用水的故事,歐紀復於是把方法用在體驗營。在廢棄膠樽上開個小洞,流出一線水來洗手,話試過幾十人洗都無問題。記者試過,真係得。 

信靠單行

經過一晚大雨,早上起來發覺空氣變得非常清新,個肺貪婪地不停地索,話晒出返市區肯定再冇咁嘅機會。歐老師建議我們一齊做運動。醒起我上次早起做運動已是三年前了。
吃過早餐,老師教我們進行「信靠單行」。一個個營友輪流出發,前後慢行環島走一圈。其間不准講話,用心去感受世界,會發現島上花朵好美,樹上果實好大,仲有不同的飛鳥,甚至聽到野豬在叫。跟大自然融為一體,十分自在,亦發現世界原來唔係只得人類。
行到半山,見前後同伴不在,遇分岔路我都不怕,之前經過的同伴早已用乾草做了標記,教後來者點行,才領略「信靠」的原意:縱使對方不在,只要有信念,大家的心還是緊靠在一起。


經過竹枝要彎身,明白做人都要懂謙卑。 

營友 Clement在這裏感覺人跟大自然好親密,人不是高高在上。而且無手機、電腦,生活原來都可以,反思生活可否再放下多一點。 

營友 Maggie有些瓜菜是我們特登揀老闆想扔的來買,發現佢哋只係少少壞仲食得,就知我們平日幾咁浪費。

 

體驗後回家,真的學歐老師逐少撕開紙巾來用;開水洗手只開一條線,吃少啲清淡啲,更不再吃零食。發覺原來你想做,其實都能做到。

歐紀復的自主生活


別以為歐紀復外表異於常人,近距離訪問佢,發覺非常整潔無異味,牙齒又白仲無口氣。 

體驗營創辦人歐紀復,曾在台灣從事化工業。發現工作帶來嚴重污染,毅然放棄高薪厚職,到不同地方參考環保生活經驗。 5年後回台成立「鹽寮淨土」,推動環保之餘,更鼓勵簡樸生活。
以他自己為例, 30年沒買新衫。不用廁紙用水、不用牙膏改用鹽。全屋用品均是撿回來,或別人送。全素,但吃的是從批發市場撿回來。沒工作,靠寫書、開講座賺取少許生活費。
法國同學覺得他在自虐,他卻說:「我覺得好快樂。我今年七十歲,身體好好,我朋友卻有三高,老來還要為口奔馳。我對生活有自主權,我願意過低消費生活,不被商家、工業家牽住走。
「我無迫人跟我一樣過活,因離開簡樸居亦不可能燒柴。但你回到現實生活,希望你有自覺性,反思自己的生活,是否樣樣都要買?若然真的需要,可否先執或跟別人要;要不了便借;借不了自己動手造;到最後都不成才買。
「高質素的生活唔一定物質,而是有智慧地活着。」

Info

體驗簡樸生活,費用全免,條件是要跟歐老師的生活方式過活。日期長短任揀,一天唔過夜都得。但要自己帶露營用品及食物,最好能素食、生食或禁食。逢周六、日入營,其他日子要預約。
電話: 9457 4457


撰文:馮淑玲 
攝影:李梓軒
錄像:李梓軒

    全站熱搜

    tvb4life 發表在 痞客邦 留言(0) 人氣()