電視精

終於有電視睇!!

Ads by Google

11月 19日,往年大家都會記得,要返屋企睇台慶,見到六叔喺港姐陪伴下出場,睇鬧劇……唔知有幾多年無睇了,不過今年 11月 19日,我一定坐定定喺電視前,因為香港電視( HKTV)同日開台!
HKTV開台之前搞咗公投,可以投票揀開台劇,睇完 16套劇嘅預告,水平之高令人期待。其實唔只劇集,仲有綜藝節目亦已 ready,隨時同大家見面,而家先做一個前瞻,做好功課溫定書,下個星期正式重懷電視懷抱!香港電視,已經不止於一間電視台,代表的,還包括打破舊框架,開創新天地的決心和慾望。

《選戰》


香港電視開台,將以《選戰》作為開台劇,係香港第一部政治寫實劇,揭開電視史新一頁。 

總導演:黃國強
編審:黃偉強
演員:李心潔、廖啟智、 王宗堯、郭鋒、李影

「香港人,係值得一人一票,去決定佢哋心目中嘅特首!」預告片以呢句台詞開始,已經贏咗一大半!適逢佔領運動及政改爭議鬧得熱哄哄,《選戰》夾盡天時地利人和,網上投票遙遙領先,誓必成為 HKTV開台劇。《選戰》以競選特首為背景,李心潔主演的女主角代替丈夫,以追求公平的理念參選特首,但遇上重重阻撓,廖啟智則飾演建制派代表,與心潔展開大鬥法。劇集拍到 10月尾先煞科,更加落到佔領區取景,緊貼時事,大家家陣最關心有無真普選, timing贏晒!

 

 


心潔嘅角色係以台灣民進黨主席蔡英文、南韓總統朴槿惠、緬甸政治家昂山素姬三人為藍本,無葉劉葡萄。 

智叔做建制派參選人,老奸巨滑,不甘多年來只做副手,於是拉下正選求上位。唔知影射邊一位政客呢? 

心潔走出老公出軌的陰霾,演活女政客的角色,喺劇中同奸到出汁的智叔角力。

《警界線》

總導演:蘇萬聰
創作總監:朱鏡褀
演員:廖啟智、林嘉華、唐寧、周俊偉、姜皓文、廖安麗

上年 HKTV為申請免費電視牌造勢,曾經於 6月喺 YouTube播出《警界線》第一集,點擊率超過 100萬,大獲好評,雖然最後發牌夢碎,不過不少電視迷心目中,都非常期待可以追落去。第一集劇情講述林嘉華與廖啟智係悍匪,不過智叔其實係無間道,亦正亦邪,兩位好戲之人過招耐人尋味。最好睇當然係駁火場面,拍攝媲美電影,加上緊湊劇情,留下不少伏線,網民梗係大讚,點都好過又睇《學警》系列。


《警界線》講警匪合作,題材好敏感,同時亦帶來新鮮感,林嘉華、周俊偉、姜皓文,邊個似忠邊個似奸? 

無論《選戰》定《警界線》,都係由智叔孭飛,不過兩個角色性格南轅北轍,一剛一柔,出色表現令人期待。 

HKTV嘅劇集最令人驚喜的,除咗高水準製作,仲可以見到好耐無見的好戲之人,小虎隊林利有無印象?

《來生不做香港人》

總導演:陸天華
創作總監:蔡淑賢
演員:張可頤、劉美君、潘燦良、曾偉權、林利

大台小生花旦急速逃亡,作為首批跳船嘅視后張可頤,過檔 HKTV第一炮係《來生不做香港人》,夥拍金馬影后劉美君飾演一對姊妹,家姐劉美君讓位俾妹妹張可頤來港定居,二人多年後重逢,親情卻承受不起中港文化差異的考驗,將大家經常掛在口邊的核心價值徹底呈現。


《來生不做香港人》講述中港兩地的文化差異,造型上都落足心思,一個身光頸靚,一個鄉下婆出城。 

劇集原名叫《客家女人》,去到東莞取景,要番鬼婆劉美君扮大陸人,佢自己都話係一大挑戰。 

劉美君與張可頤日對夜對成為好姊妹,戲裡戲外以「大小姐、二小姐」相稱,相處融洽。

《導火新聞線》

總導演:方俊華
創作總監:林少枝
演員:梁小冰、周家怡、楊淇、王宗堯

大台員工聯署支持自己新聞部的同事,最後落得秋後算賬的下場,可想而知一部關於新聞自由的電視劇,可能永遠都不會在 TVB看得到。《導火新聞線》由久違香港電視圈的梁小冰孭飛,飾演報紙總編輯,為求攞料不擇手段,在銷量及公義之間,到底有幾大空間角力?劇中有記者被斬嘅場面,不禁令人憶起劉進圖遇襲事件, TVB敢拍咩?


梁小冰多年前離開無綫後,主力北上拍劇,今次回流返港擔正做《導火新聞線》,係入行第一次做奸角。 

新劇以捍衞新聞自由為題材,加入很多具爭議性新聞作為情節,有啲似係香港版《 Newsroom》。 

《歲月樓情》

總導演:黃國強
創作總監:梁敏華
演員:夏雨、鮑起靜、黃日華、唐寧

除咗《警界線》,上年已經率先有片花的《歲月樓情》,由夏雨及鮑起靜主演,內容圍繞公共屋邨內的鄰里逸事,間接道出 30年來香港的歷史變遷,見證獅子山下的拼搏精神。劇集以全實景拍攝,令觀眾代入感更強。視帝夏雨及影后鮑姐嘅演技毋庸置疑,加上黃日華及唐寧兩個形象入屋的演員,最好用嚟吸引師奶觀眾。


夏雨演活過不少小人物角色,今次飾演睇相佬,同鄰居鮑姐互相扶持,以演技較量擦出火花。 

黃日華飾演於屋邨長大的警察,由後生演到老,仲同做得佢個女嘅唐寧有感情線。 

鮑姐做好媽媽角色,當然難佢唔到,仲大讚劇本溫馨感動,拍喊劇特別容易投入情緒。

《三面形醫》

總導演:關樹明
創作總監:蔡婷婷
演員:林文龍、姜大衞、艾威、楊淇

醫療劇一向不乏捧場客,《三面形醫》以醫學美容為主題,透過不同的病人帶出不同故事。劇集製作成本高達 100萬元一集,包括聘請醫療團隊擔任顧問、使用高清攝影器材,令手術場面更逼真,拍得住美劇。唔使一味睇假血漿、廠景手術室、穿崩護士,同埋一大班醫生去酒吧飲酒囉。


林文龍演過唔少醫生的角色,今次喺《三面形醫》入面飾演整形外科醫生,試過一場手術戲份拍咗 10個鐘,製作非常認真。 

發牌一波三折  HKTV網上播開先河

王維基上年申請免費電視牌照落空,本來想以流動電視形式翻生,可惜被搬龍門而令計劃胎死腹中。不過打不死的魔童繼續諗計,終於宣布 11月 17日 HKTV以 Over-The-Top( OTT)形式免費播放電視節目,即係指棄用大氣電波,改由經互聯網以串流方式收睇,可以喺電腦、手機、平板電腦等等播出,如果想喺電視睇,透過智能電視或者電視盒上網就可以睇。用 app或電腦瀏覽器睇都完全免費,每小時節目會加插 90秒廣告,就係收入來源。
HKTV初期每日播 2小時劇集,並打算每朝 6時開始播,打破晚上煲劇的傳統,另外會有綜藝節目及外購劇,推出電子購物頻道,開拓一邊購物一邊睇戲的新消費模式,增加收入。


王維基 2011年成立香港電視,當時大手筆招兵買馬及開拍劇集,可惜發牌受阻,要到今年才可以正式開台。 

免費電視無份,流動電視又話唔合規格,最後終於轉攻人人都有的智能電話及平板電腦,顛覆大家睇電視的概念。 

綜藝節目擺脫胡鬧

除咗劇集之外, HKTV嘅綜藝節目雖然唔係開台主打,不過一樣製作認真。如果你同我一樣,受夠了那些無聊又低質素的扮嘢騷及遊戲節目,絕對不容錯過。

 

《挑戰》
台前幕後走遍世界各地挑戰不可能的任務,展開各種不同形式的挑戰之旅。第一輯有周俊偉、劉玉翠及艾威去到世界最大洞穴——越南韓松洞冒險。

 

《飄》
走訪多個國家,以紀錄片形式,訪問世界上為別人無私奉獻的智者,最令人期待係到訪緬甸,尋找為人民被囚禁大半生的反對派領袖昂山素姬。

 

《爆 TALK》
以「爆」為主題,每集請來一至兩位嘉賓與三位主持人進行訪談,嘉賓自爆秘密,最想梗係聽佢哋數大台衰嘢啦。

 

開台日期: 11月 19日
網址: http://www.hktv.com.hk 


撰文:關錦雯

    全站熱搜

    tvb4life 發表在 痞客邦 留言(0) 人氣()