玩得第一身射擊遊戲,一對質素高嘅耳機好重要,真係做到聽聲認敵人方位,贏在起跑線。 

ILIKE

戰場裝備

Ads by Google

等咗成年, PS4今個禮拜終於推出全新《 Call of Duty: Advanced Warfare》,鍾意戰場射擊類遊戲嘅我,當然第一時間入手。為咗玩得更投入,特登買埋 Steelseries Siberia Elite Prism Headset($1,999),皆因新耳機對應 Dolby Headphone同埋 Dolby Pro Logic IIx技術,上到戰場就可以聽清楚四方八面嘅槍林彈雨音效,提升臨場感!最重要係支收音咪好清晰,唔驚隊友聽錯我嘅指令,二千蚊有找都算抵玩。

 


林勇 

 

不可能的玩具

今期 Close-Up講網購,其中一 part提到喺日本網站買中古玩具,好自然令我諗番唔少細個好想買,但又無錢買嘅玩具,如果要數,隨時幾日幾夜都數唔完。當中印象最深,就係 1999年由 Studio Half Eye推出嘅完全變形版三一萬能俠(當年定價 66,150日圓)。動畫早喺 1974年播,由三部戰機互換位置,合體成三個唔同形態嘅機械人打怪,但以前嘅機設(機械設定)冇而家咁仔細,變形合體過程都係馬虎帶過,所以當年出得成合體玩具,生產商認真抵讚。雖然好多人話變完身企唔穩、關節好易散,但見到都好想買,可惜財力不足,都係得個睇字。


勞耀全 

其實之後有好多完全變形版三一萬能俠出過,但對第一隻始終情有獨鍾。最近 Studio Half Eye話下年三月會出復刻版(售價: 73,440日圓),有興趣不妨去(網址: http://www.studio-halfeye.com)睇吓。 

潮戴運動錶

適合山賽嘅運動錶,顏色其實都幾悶棍,好似 Garmin 910XT、 Polar V800、 Suunto Ambit3,非黑即白,簡直同啲鮮色跑衫跑褲跑鞋脫晒節。最近終於有起色,好似 Suunto隻 Ambit3 Sport有藍色錶身($4,100,落鋪買通常有八至九折),淨係睇色已夠晒吸睛,功能方面亦齊全,除咗一般嘅運動數據記錄、訓練計劃外,亦支援無線將運動數據傳上手機、防水深 50米,而攞 GPS速度頗快,整體嚟講都幾滿意。其實下年一月仲會出玫瑰金版($5,630),啱晒女士戴。


周群雄 

同期除咗藍色嘅 Sport,銀黑色嘅 Ambit3 Peak Sapphire HR($6,330)賣相就略嫌穩陣得滯,但防水深效能達 100米,潛水都用得着。 

網上模型雜誌

「 1:144獅子山+真普選+高達」模型令人精神為之一振!背後嘅製作人,原來係舊同事。阿 Ray除咗開班授徒教砌模型之外,喺 2012年,仲搞咗份網上模型雜誌( http://www.imodel.hk ;愛模型),砌高達(科幻)為主嘅,多靚相嘅,免費嘅,截至今日,出咗 7期,第 8期(睇預告話係「 Z高達 30周年」特輯)都相信就快見街。追番咁多期,無可否認,好有「早期」《 Hobby Japan》嘅 style,冇所謂,內容 100% Made In Hong Kong就得啦!


劉定邦 

美國有 Star Wars、 Star Trek,日本有 Gundam、 Macross,相關電影、卡通、模型長出長有,貫通世代! 

text:科技組

    全站熱搜

    tvb4life 發表在 痞客邦 留言(0) 人氣()