靚抽王

樂壇四大頒獎典禮 VS真普選

Ads by Google

佔領行動喚醒咗政治冷感嘅香港人,大家異口同聲話要「真普選」。
但係樂壇每年都會舉行嘅四大頒獎典禮,有邊個真係反映到民意,抑或真係坊間所講嘅豬肉獎呢?
根據聯合國嘅人權公約,真普選代表嘅係每一個選民都能夠權力均等地參與選舉,
究竟呢啲所謂嘅頒獎禮能唔能達到呢個國際標準,定係只有強國標準?

十大中文金曲頒獎音樂會

舉辦單位:香港電台

特點: 1978年開始,歷史最悠久,其頒發嘅金針獎表示巨星地位。

評選準則:委託獨立機構進行市場意見調查,透過公眾投票選出至愛,並邀請我哋不認識亦冇得去揀嘅所謂專業樂評人作出評選……

反映民意嘅「真普選程度」:
雖然選舉過程有啲模糊,但係觀乎得獎結果,入面唔會有太荒謬嘅事發生,例如 Chok峯冇攞到最受歡迎男歌手之類,所以真普選程度係: Okay啦標準。

十大勁歌金曲頒獎典禮

舉辦單位: TVB

特點:頒獎禮成為親子活動。(啲獎頒晒俾親生仔。唔係親子活動係乜?)

評選準則:公眾投票( 20%)大會評審( 20%)無記音樂統籌委員會( 60%)……即係得 20%係真正民意,而大會評審及乜鬼嘢委員會入面都有樂小姐份,感覺好「一男子」。

反映民意嘅「真普選程度」:
鍾意頒俾邊個都得, CCTVB果然冇改錯名,真普選程度:強國標準!

新城勁爆頒獎禮

舉辦單位:新城電台

特點:好勵志。(獎項數目特別多,有 163個,人人有份,永不落空,極具鼓勵性!)

評選準則:以每星期新城電台的新城勁爆流行榜中各首上榜歌曲的流行程度作為依據。問題係,根據乜嘢標準去上呢個榜先?

反映民意嘅「真普選程度」:
人人都得獎,使乜評使乜選?真普選程度:太公分豬肉標準!

叱咤樂壇流行榜

舉辦單位:商業電台

特點:歌手喊豬度 100%。(因為啲獎比較公道)

評選準則:以「 903專業推介」,統計叱咤 903中文歌曲的播放率;再以「雷霆歌曲播放指數」統計全港 6個中文電台頻道,以呢兩大統計計算頒獎結果。

反映民意嘅「真普選程度」:
計算方式嚴謹,不愧係公認為評審透明度最高嘅頒獎禮。係囉,如果頒嘅係豬肉獎,啲歌手又使乜喊得咁慘呢?真普選程度:國際標準。


撰文:娛文樂

    全站熱搜

    tvb4life 發表在 痞客邦 留言(0) 人氣()