妮歌呢身裝扮,係重演番 1959年,嘉麗絲王妃陪雷尼爾親王面見法國總統戴高樂一幕(圖)。妮歌同王妃頸上戴嘅,都係 Cartier,好認真㗎! 

歐洋風

優雅傳說

Ads by Google

有啲女人,總係特別幸運。已故摩納哥王妃嘉麗絲姬莉出身富貴,入荷里活 6年,就賺咗 1個奧斯卡金像獎,加 1個王子做老公!仲成為潮流先驅、優雅經典。所以睇新片《摩納哥王妃》( 11月 27日上映),齋睇女主角妮歌潔曼嘅一身造型,已經令人非常滾動。一入侯門深似海?呃人嘅。啲衫靚到咁!係女人,點會唔冧?

 

嘉麗絲姬莉同戴安娜一樣,係一代至潮王妃,連 Hermè s都以佢個名 Kelly去命名旗下手袋,依家仲長賣長有!
呢位王妃咁有影響力,所以拍呢套《摩納哥王妃》嗰時都一波三折,首先摩納哥皇室已經唔多 like荷里活翻拍,怕你亂寫劇本嘛!卒之,拍完出嚟,就話套戲唔忠於史實(無詳細解釋㗎。唔通係嫌戲中嘅雷尼爾親王煙不離手?),所以皇室成員都唔會出席首映。跟住又傳出美國發行商嫌戲中講王妃婚後生活同國家危機多,少講佢喺荷里活嘅生活,要剪過套戲喎。
唉,查實呢啲傳記片一向唔易拍!之前嗰套《戴安娜》就仆到直一直。好彩,呢套有金像影后妮歌潔曼撐,唔打得都睇得!雖然 47歲嘅佢近年有啲膠化,個胸仲忽然 B變 D,但相比同輩女星都算 keep得好!着起啲靚衫,真係有王妃氣質。
未試過自己生仔嘅妮歌( 4個仔女都係收養或者搵代母生)早排仲話:「如果有日我真係有咗!我諗我會興奮到彈起!我嫲嫲喺 49歲生最後一胎㗎。」嘩,咁搏命!呢位「王妃」果然夠霸氣。


除咗 Hermè s,絲巾都係王妃嘅標誌。依家仲有唔少網頁教大家王妃式嘅絲巾縛法。咁樣睇,妮歌同王妃嘅輪廓又幾似喎! 


嫁入皇室嘅嘉麗絲,仲有好多人搵佢拍戲,但佢為咗忠於丈夫同皇室家聲,最終放棄。妮歌呢條金色裙,就係 1963年王妃陪丈夫(添羅夫飾演)出席宴會嘅造型。


欠了 Hermè s1956年,新婚無耐嘅王妃,攞 Hermè s嘅 Hight Bag遮肚。於是個個爭住買個袋,連 Hermè s都將個袋改名 Kelly Bag。但 Nicole轉咗揸 file,睇嚟傾唔掂贊助噃。 


《後窗》重現嘉麗絲係驚慄大師希治閣愛將,佢喺《後窗》嘅花裙造型,妮歌當然有抄啦。 


青春影后25歲嘅嘉麗絲喺 1955年就憑《蓬門淑女》喺奧斯卡封后,當年影帝係馬龍白蘭度。佢着緊呢條裙出自名師 Edith Head之手㗎!

星之王妃

生於 1929年 11月 12日嘅嘉麗絲姬莉,阿爸係美國費城建築富商, 51年入荷里活, 55年就攞影后,同年喺康城影展識咗摩納哥嘅雷尼爾王子。 56年,兩人閃婚,嘉麗絲全面退出影壇,生咗一子兩女,陪老公出席公開活動,鞏固摩納哥皇室地位,以免被法國吞併。直至 1982年 8月,佢揸車同細女史提芬妮公主外出嗰陣,懷疑心臟病發,引致車禍不治,享年 52歲咋。唉,同戴妃一樣,如流星閃過。


撰文:李綺雯

    全站熱搜

    tvb4life 發表在 痞客邦 留言(0) 人氣()