So Comment

老鋪再生 

牛記茶室 地址:柴灣道 111號高威閣高威廣場 1樓 A2鋪 電話: 2546 2584(乙) (蘇施黃)

Ads by Google

結果搵到地方搬嘞!
兩年多前「牛記茶室」麥老闆話畀我聽大業主要收返間鋪要走了。當時大業主喺歌賦街有好多鋪,隔籬有一間日本拉麵新租金過十萬!儍嘅都會叫你走啦,可以租 double有多嘅錢,業主都算客氣,諗個籍口話你知全條歌賦街要改 image都算係咁囉。
搬走咗,麥老闆一路都搵唔到鋪……唉!咁易咩!當知道「牛記」搬咗去柴灣,我都好高興。

全家總動員……

麥老闆一路都係買手,喺歌賦街時搭巴士去買餸,重到不得了嘅餸菜,落咗巴士仲要行條長斜路,賺你一個幾毫真不容易。
好彩麥老闆有三個仔,大仔本來做西餐嘅,今次都乖乖返去柴灣幫老竇睇住盤數。二仔就一向都好有興趣煮嘢,啲牛腩都係佢切呀,煮呀!而家喺新店仲時常喺自己嘅小天地研究燒鵝呀……而細仔,又有另一個天份,無師自通,所有電器,店內嘅維修,佢都識做,大哥同麥老闆都話好彩自己有自己嘅崗位,如果唔係要請人做,根本就冇錢賺。你話做生意幾難呢!
唯一一個可以嘆番吓就係麥太,老闆話老婆一世都未嘆過,為咗睇住啲細路,連香港都未離開過,而家係時候四圍去玩吓咯!


我和麥老闆 

日間仲有自己做嘅點心,一間小店都有 4個點心師傅。 

食物

係碗白飯,真係好少有小店咁闊佬肯用啲咁靚嘅米,碗飯仲好食過我屋企嗰碗。麥老闆話平均每人消費$100,街坊價,只有密食當三番啦!

 

清湯蘿蔔牛腩煲$168
我的最愛,坑腩,最鍾意食嗰片筋膜。不過老實講句,好似以前喺歌賦街時好食啲噃。

 

脆皮肉餅$87
其實係肉餅,不過炸咗佢。味道唔錯,亦唔係好乾。

 

椒鹽鮮魷$98
舊時好正㗎,而家普通。

 

蝦仁炒蛋$98
其中一碟最鍾意嘅小菜。

 

紅燒豆腐$75
好食

 

例湯$12
好正!不過全餐飯最正,你估係乜?

 

牛記茶室
地址:柴灣道 111號高威閣高威廣場 1樓 A2鋪
電話: 2546 2584

 

蘇施黃
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。


攝影:蘇施黃

tvb4life 發表在 痞客邦 留言(0) 人氣()