「偉哥之父」穆拉德聯同廣藥子公司白雲山,炮製「偉哥石榴汁」。但似乎藥力不夠,股價一度升了近百分之五後,回軟至今。插圖:王健威 

中環人語

超人拍檔 炮製「偉哥石榴汁」

Ads by Google

男士恩物「偉哥」,又有新搞作啦!早前內企白雲山(874),同誠哥旗下的和黃(13)合作,研製中藥版偉哥「鐵瑪」;最近佢竟然同有「偉哥之父」稱號嘅穆拉德,計劃研發「王老吉穆拉德石榴汁」。

 

當年穆拉德曾經以發明偉哥「一氣化氮理論」,拿了諾貝爾獎,早已走進內地賺人仔,並加入白雲山母公司廣藥集團,擔任研究總院院長。
這款新產品「王老吉穆拉德石榴汁」,小宗即管簡稱為「偉哥石榴汁」,即係喺石榴汁中,加入類似偉哥的藥物機制,可以保健人體的泌尿系統。白雲山話,當中的「技術含量非常高」,通過石榴抗氧化的作用,幫助人體產生更多的一氧化氮,達至保健腦神經、心血管和泌尿系統的效果,甚至有抗陽痿作用添!不過小宗擔心石榴汁太好飲,飲得多會「當眾出醜」啫!產品雖然推出未有期,但上月公布這款新產品後,白云山股價就好似飲咗「偉哥石榴汁」咁,連升幾日,不過藥力似乎未夠強,過多幾日,股價又「回軟」番晒。

本週轉凍 保暖富豪外賣檔

「工廈王子」楊國佳近日又再出動,四圍覓食。
《中環寸嘴》工廈小王子楊國佳除了富豪飯堂,亦涉足不少私竇,其中跑馬地彭慶記食家屬其中之一,呢間小店家鄉菜一流。上週五立冬,小王子整咗碗蛇羮、臘味煲仔飯,原來賭王三太、四太都好鍾意喺呢度叫外賣,叫司機攞返屋企在家享用。寸嘴楊話:「有好多有錢佬唔好意思踎喺入面食,咪叫司機來攞走外賣。」又係嘅,唔係個個富豪學得小王子咁,踎得大牌檔,又上得福臨門㗎。




臘味煲仔飯嘅臘味多到要分碟上。

飛甩「薑融」 山雞變鳳凰


當年任職行政總裁的周融(中)及其太太,兩人所收取的報酬,一年有六百萬元,薪金算相當高,但可惜表現未如理想。 

呢排傳媒股炒得㷫烚烚,謝霆鋒入主漢傳媒( 491),股價狂升,讓散戶都能嘗到他炮製的「十二道鋒味」。另外有間叫先傳媒( 550)嘅,亦宣布賣盤,大炒特炒。呢間先傳媒,經營大家熟悉的《 Recruit》。想當年,《 Recruit》就係由反佔中大聯盟發起人周融創辦,仲搵到老闆鷹君( 41)主席羅嘉瑞入股。
不過咁喎,《 Recruit》喺周融手上,業務每況愈下,公司資金不足,股價由上市初期嘅一元七毫,暴跌九成至一毫九仙,害死唔少人。唯有搵來現任主席劉竹堅做白武士,周融持股被稀釋,同年更走埋。此後劉竹堅進軍內地,股價先至由當年低位,爬番上現在一元七毫,更多次有息派添。無咗「薑融」,山雞變番鳳凰,香港都得㗎。

疾風知勁草 習總有潛台詞


CY以為習總讚佢,仲唔沾沾自喜咩。 

國家主席習近平近日以「疾風知勁草」贈梁振英,這句源於唐太宗李世民的五言絕句《贈蕭瑀》,上一句「疾風知勁草」,下一句是「板蕩識誠臣」。表面上看,讚緊 CY夠勁揪喎。但事實係咪咁呢?睇埋最後嗰兩句先,係:「勇夫安知義,智者必懷仁」。仁、義就似乎唔係講緊 CY喇;而古時獲贈金句嘅蕭瑀,雖然被唐太宗讚過,但由於佢份人太強硬,好鬥,最終下場係被罷爵貶官,最後仲鬱鬱而終死埋添!所以 CY,你都唔好開心得咁早!

壹週圖片 信置「筍盤」登場


「信和三子」黃永耀、黃永光及黃永龍(左至右)上場,青靚白淨,「殺死」不少 OL。 

唔係講緊信置( 83)近日賣緊嘅玖瓏山,而係主席黃志祥嘅三位公子呀。可惜,長子黃永光已結咗婚,仲已經有一子一女;所以各位 OL,可以將焦點放喺二仔同細仔身上。今年二十六歲嘅黃永龍,係哥倫比亞大學歷史系畢業,身上多了一份書卷味,依家負責集團管理及租務工作。而黃永耀,則一樣係 Columbia U畢業,加入集團不久,做緊項目助理。雖然兩位公子仲未進身董事局,但來日方長。識揀,梗係揀呢類潛力盤啦!

金牙大狀講嘢 有種嘅就公投


老董咁尊重民意,咁不如就八•三一框架嚟趟公投吖,笨! 

董建華老驥伏櫪,成立「團結香港基金會」再次對特區指指點點,當然唔少得講佔中。佢話民主係少數服從多數,而最近有民調指超過七成人反對佔中,故此佔中應該結束云云。小圈子選出來嘅老董尊重民意,真係一百歲唔死都有新聞聽。
好啦,聽你老董支笛,佔中收兵,咁其他民調又使唔使聽呢?民調長期顯示 689嘅支持度係負數,咁佢係咪老早就應該鞠躬下台以謝港人?可以肯定,如果 689依照民調指示辦事,唔使等到老董出聲,佔中已經解決咗啦。
仲有,民調局限性大,未必作得準。學得老董咁講,實現少數服從多數嘅民主,咁不如嚟真嘅,由全港市民就 831框架嚟趟公投,睇吓點?老董, your move。

中環人語迷你版

“親手建造沒高牆的世界”

估中邊個中環人講呢句說話,送你 JWATCH J-33藍寶石鏡面限定版手錶一隻有意參加者,請於十一月十二日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉答案

“美國解放黑奴 100年,黑人才有平等投票權。”

查史美倫
得獎者: Yeung Po Chun
中獎時間: 1:00pm 5/11/14

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!

爆料熱線/whatsapp: 6829 5929

 

全站熱搜

tvb4life 發表在 痞客邦 留言(0) 人氣()