爆壹爆

港女收錢自拍 AV

Ads by Google

聽聞最近有個秘密鹹片 facebook戶口,有好多麻甩佬加入觀賞,入邊有幾十個港女自拍,有見樣亦有唔見樣的,片入面嘅少女自摸淫亂程度爆燈。有人爆料,原來要睇片要每月科水二百蚊,個主持人就會响一個特定嘅 facebook賬戶,加你做朋友,成為朋友後,就可以睇片,仲話會每月更新添。主持人又在討論區上,以二千蚊作招徠,徵男女自拍十分鐘淫片。自稱 Pinky嘅接頭人在 WhatsApp表示,話見樣可收二千元,唔見樣就一千二百元,收到片之後就即刻過數出糧。

 

爆哥一聽就知係犯法,真係唔明依家啲少女,為咗錢就乜都肯,隨時拍完淫片俾人擺上網,咁就一世,唔知係咪受呢幾年女明星自拍淫片風氣影響呢?



水房坐館百日宴

上月三日晚上黑社會打爆旺角,古惑仔吹雞圍攻旺角警署,平靜咗一個月,以為班古惑仔會低調,唔會搞搞震。點知本月六日,又再喺旺角見到其中一個有份打人嘅勝和小頭目出現,佢當日一身 MK打扮,爆哥最記得打爆旺角當晚,佢曾經聯同五十多名口罩男,喺旺角見人就打,仲以粗口揚言︰「×你老母唔好走!我一個鐘返嚟打一次!」佢仲同反黑總督察講數,聲稱︰「我哋唔係搞嘢,阿 sir唔好勞氣。」
以為佢當日又落來旺角打人,點知佢最終去了太子聯合廣場參加飲宴,當晚大批古惑仔雲集,原來水房坐館大孖喺度幫個仔舉辦百日宴,筵開五十席,大批江湖中人到賀,包括久未露面嘅 14K鬍鬚勇、搞事雄、立章,同埋勝和元老雞腳黑等人, O記都有到場監視,但未有拘捕任何人。


勝和仔(中)上週再現旺角酒樓內。 

勝和仔當日拉隊落旺角打人。 

林兆鑫個女做了法官

法律界有人話,區域法院暫委法官篩選,雖然要求資歷唔太高,但就要身家清白查三代,任期一般由三星期至兩年不等,更有人一直暫委下去至多過兩年,之前有位靚女當上區域法院暫委法官,早輪先任職期滿,返回龍頭律師行繼續其大律師工作。呢個靚女法官傳聞係香港大學醫學院前院長林兆鑫個細女林定韻,林兆鑫於○九年因私吞港大四百萬捐款及診金而被重判入獄廿五個月,但這位富豪御醫只服刑短短十一個月,便提早「出冊」。爆哥求證過林定韻大律師,佢透過秘書回覆,承認之前做了近兩個月區域法院暫委法官,但對於林兆鑫是否她父親,她以私人事務不便作答為由拒覆。林兆鑫都算教子有方,兩女一子,大女係醫生、細女係大律師,而兒子係工程師。

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!


mailto:news@nextmedia.com

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()