劉迺強(右)言之鑿鑿話港美中心係佔中基地,唔知手握教育撥款大權、曾向中心批出公帑嘅教育局局長吳克儉係咪暗撐佔中?插圖:祝健中 

八卦陣

教資會 教育局 暗撐雨傘革命?

Ads by Google

最近中國勢力上綱上線攻擊佔領運動有外國勢力參與,基本法委員會成員劉迺強更曾喺論壇「爆料」,話中文大學香港美國中心( The Hong Kong-America Center)由美國情報部門老將 Morton Holbrook III擔任行政總裁,係美國駐港總領事夏千福「老上司」,又質疑佢同夏千福、壹傳媒主席肥佬黎「匯聚香江」,有可能做出損害國家嘅行為。

 


被指係外國勢力嘅港美中心網頁顯示,合作伙伴包括教資會研資局、教育局。唔知藍絲帶會唔會去呢啲機構抗議呢?(港美中心網頁圖片) 

有左報講到似層層,話港美中心今年三月搞咗個兩日一夜工作坊,「培訓」學生佔中。冇幾耐就有謠傳呢個中心買咗十幾部 iPhone 6送俾學生領袖同佔中三子,呢種抹黑嚟得好巧合。
本刊翻查網頁資料,港美中心同教資會研究資助局合作「富布賴特」獎學金計劃,資助香港學者到美國進行學術研究,八大院校亦有向教育局申請撥款,邀請美國「富布賴特」學者嚟香港進行通識教育。按劉迺強邏輯,即係吳克儉將公帑撥俾美國佬損害祖國。其他同港美中心有聯繫嘅機構包括以愛國商人為首嘅「香港明天更好基金會」,以及董建華創辦嘅「中美交流基金會」。以維穩派思維去推敲事件,呢堆「合作伙伴」一定有份暗撐雨傘革命,簡直要落地獄啦。
香港明天更好基金第一時間撇清關係,話佢哋二○一○年三月安排過「富布賴特」學者交流午宴,由基金理事胡珠、葉毓強及行政總裁鄧淑德女士負責主持,強調活動只係做交流。教育局話未曾向港美中心「捐款」。研資局、中美交流基金會截稿前未有回覆,係咪問題太敏感唔方便答?

郭志樑啞子吃黃連


港美中心主席係永安集團主席郭志樑,點睇都唔似撐佔中噃!(《蘋果日報》圖片) 

大港美中心九三年成立,主席係永安集團主席郭志樑。中心今鋪啞巴吃黃連,有苦自己知。知情人士透露,中心怕咗班反佔中人士發大件事嚟搞,所以一直低調回應,最多只係喺網頁刊登澄清聲明。
中心強調無任何政治立場,只作學術交流,更冇送過 iPhone 6俾任何人,唔明點解某啲媒體報導前唔問吓中心回應。至於三月嘅「培訓」佔中工作坊,實情係邀請唔同政治光譜嘅人分享對政改見解,當時自由黨青年團主席李梓敬都有出席。

騎呢網民 佔領政總變佔領大台

雨傘革命保持膠着狀態,但上星期六金鐘爆發咗一場「大台風波」。當日有網民打算喺動植物公園發起撐傘行動,但因走漏風聲而轉戰金鐘,部分網民下晝六點幾,以鐵馬同垃圾筒堵塞海富中心天橋通往政府總部嘅出入口,聲稱打算留守至本週一,阻擋公務員返工,逼政府正視真普選訴求。但警方三兩下手勢就清走晒啲障礙物。雙方對峙約兩個鐘後,警方連隊都收埋。
明明係升級行動,點解會演變成衝擊大台?事關警方收隊後班網民圍圈商議,本刊記者親耳聽到有人建議衝上大台搶咪,希望向群眾解釋行動目標,呼籲更多人撐場,但有人問:「而家邊個願意上台?」各人你眼望我眼,無人出聲。
佢哋轉而周圍搵鐵馬,其後有義工到場,斥責佢哋早前未經同意擅取鐵馬,影響布防。網民於是將目標對準大台,呢次終於有個叫李啟迪嘅港大三年級生認頭,親身走到大台下,要求上台發言,但被拒絕。網民得悉後,一行約四十人決定全部落晒去大台要求俾佢佢哋發言,擾攘一輪之後,最終由黃之鋒出手,同李啟迪對話,後來又有自稱旺角佔領者幫佢哋 set音響,俾佢哋發言兼接受傳媒訪問,總算平息風波。
不過說好的堵塞政總出入口?最終不了了之。


網民發起升級行動,企圖堵塞海富中心天橋通往政總出入口,一度引嚟近百名市民聚集,百警到場戒備,但最終後勁不繼,行動失敗。(《蘋果日報》圖片) 

港大生李啟迪(舉手者)與約四十名網民到雨傘廣場大台,要求上台發言,一眾「地主」到場協助維持秩序,以防有人衝擊大台。(《蘋果日報》圖片) 

The Color Run明益民建聯

世界各地大受歡迎嘅 The Color Run,以一邊跑一邊掟七彩粉末為賣點,十二月初喺香港舉行。上星期五開始報名,萬六個名額即日爆滿。報名費四百五十八個半,貴過渣打馬拉松。不過,有網民質疑,善款嘅受助機構「東涌安全健康城市」成員主要來自民建聯,間接幫緊建制派籌款,有啲唔抵。
本刊翻查東安健社會服務基金有限公司,董事周轉香、老廣成等人都係民建聯區議員。公司秘書長黃頌行話,獲 The Color Run邀請為受惠機構,估計會得到二十萬元善款,贊助社區圖書館嘅報紙雜誌費一年。對於網民質疑建制派資源豐富,佢話:「唔覺得,募捐都好困難,可能我哋區域細,唔係有人有興趣,我哋又唔喺油尖旺。」
The Color Run對本刊話,活動喺機場博覽館舉行,東安健以東涌為基地,社區圖書館亦符合佢哋贊助原則,所以先揀中佢哋。呢個社區圖書館位於逸東商場,前身係臨時公共圖書館,後來公共圖書館搬到東涌市政大樓。但大樓距離逸東邨有一段距離,所以東安健接手辦圖書館,圖書由公共圖書館運送來。其實外國唔少呢類慈善賽,主辦者會列出幾個受助機構俾參加者選擇,甚至歡迎額外捐埋俾其他機構,咁咪皆大歡喜囉。


東安健社區圖書館租用領匯商場,主席周轉香話雖然有優惠租金,但要攤分水電費,皮費唔少。由於人手有限,週日最多人幫襯,亦只能開放半日。 

The Color Run上年已經喺超過三十個國家舉行一百七十場賽事,至今捐款高達三百萬美金。 

五粒鐘集合三丁友


由讀者提供嘅截圖睇到,佢哋三點幾嗰陣只係得三個人到場,點知去到八點幾仍然只得三個人。(讀者提供圖片) 

星期六晚要求上大台發言失敗之後,星期日就有一班網民諗住大反擊,所以喺網上討論區號召人「圍大台」,甚至拆埋佢。各人約晏晝三點行動,仲喺手機開埋群組,諗住方便啲組織同溝通,點知成個晏晝都係得廿幾人加入。
雖然個群組得廿幾人,發起人仲話已經好小心先俾人加入,但都竟然有「鬼」,有人將佢哋行蹤一五一十講咗出去,搞到佢哋要將集合地點轉嚟轉去。
過咗下晝三點,到咗場嘅人喺集合地點話只係見到三個人,但佢哋早已預計時間太早唔夠人,所以將集合時間推遲到六點。不過喺個群組度,去到八點幾都仲係話得三個人集合咗,仲有人不斷問對方喺邊,呢個組織真係幾山寨。

娘娘狂收護膚品

學聯發動九二二罷課至今,已經超過五十日,呢一班青春無敵嘅學生,個個捱到疲態畢現,唔少粉絲心痛學生唔惜身,日日送上靚湯蛋糕甜品俾佢哋補一補。其實,市民送上嘅心意,既貼心又貼身,例如學聯常委、港大學生會會長「娘娘」梁麗幗,女仔人家日日早起晚睡,皮膚當然有影響,有粉絲送上法國品牌面膜、暗瘡膏等護膚品,都咪話唔尷尬。
另一常委羅冠聰,上月底唔見咗副眼鏡,求問 facebook大神都搵唔番,何韻詩竟然送副眼鏡框俾佢,搞到阿聰大嗌「好滾動」。佢仲話有啲市民知道副秘書長岑敖暉緊張時有咬手指嘅習慣,心疼佢嘅指頭損晒,所以送 handcream俾佢。嚟緊天氣開始凍,唔知有冇粉絲會送溫暖牌頸巾俾學生呢?阿聰代表學聯多謝大家嘅心意,但佢話學聯嘅物資已經好足夠,唔使再送喇。


「娘娘」梁麗幗為罷課同佔中捱更抵夜,少不免皮膚變差,粉絲不知幾心痛,好體貼咁送上護膚品。(羅國輝攝) 

羅冠聰上月底大頭蝦唔見咗副眼鏡,何韻詩直呈送過副眼鏡俾佢,搞到阿聰不知幾感動。(羅冠聰 facebook圖片) 

mailto:centipede@nextmedia.com

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()