Ella表示擺檔時可以幫客人即場在皮袋上畫出客人要求的寵物,「畫一隻寵物大約要 45至 90分鐘,好多客人都唔鍾意買現成,要訂購,所以提供即場畫嘅服務。」 

青雲路

貓樣烙印

Ads by Google

在女士的世界中,手袋擁有無與倫比的吸引力,修讀時裝設計的 Ella,認為手袋設計的發揮空間大,決心成為手袋設計師,但入行後深覺沒有發揮機會,她以愛貓為創作靈感,創立 PAW PAW,專為客人製作皮製寵物圖案手袋,栩栩如生的寵物圖案讓 Ella得到客人的讚賞,除了訂單不絕外,更重要是找到自己的方向,用青春追逐夢想。

 


利用電烙筆, Ella把寵物的神態一筆筆勾勒出來,「自己有學過畫畫,畫起上嚟有啲似鉛筆掃描,唔係太難上手。」 

採訪當日, Ella拿着電烙筆,把或深或淺的線條燙在皮製化妝袋上,約 1小時後,一隻栩栩如生的貓貓已出現在眼前,「客人可以訂製自己寵物嘅圖案,好似貓、狗、兔仔及雀都整過,只要畀張相我就可以跟住畫。之前擺手作攤檔,仲試過即場為客人畫寵物樣上皮袋,我對自己對手都有少少信心。」
今年 26歲的 Ella,創立了旳 PAW PAW品牌,提供訂製寵物圖案皮袋服務,產品包括八達通套、化妝袋、 tote bag、斜揹袋等,價錢$500至$4,500不等,活靈活現的寵物神情,吸引不少人士訂購,訂單已排到 12月。「自己要返工,每日只得 2個鐘去整袋,我真係一針一筆咁去整,一個袋至少要整 5日。」
在 HKDI修讀時裝設計高級文憑及 top-up degree的 Ella,在課程內接觸到手袋設計,讓她產生濃厚興趣,「課程有幾堂講關於 accessories嘅設計概念,接觸到手袋設計,自己好鍾意嗰種將平面圖紙立體化嘅過程,覺得手袋嘅發揮空間好大,之後仲諗住申請做手袋公司 intern,但唔成功,於是決定自己摸索。」

 

 


皮製寵物斜揹袋$2,200 

皮製寵物 tote bag$3,500 

珊瑚珠皮製寵物手挽袋$4,500

皮製寵物 iPad保護套$780 

釘珠艾菲爾鐵塔圖案 clutch bag$2,800 

細化妝袋$750

愛貓是創作源頭

在手袋設計上, Ella第一個靈感來自家中的愛貓 Eldy,讓她建立了明顯的個人風格,「我對皮製手袋好有興趣,於是上網睇人點整,去深水埗買材料時,見到有人用電烙筆喺木製品上刻字,當時就諗可唔可以用喺皮度呢?於是就買咗支電烙筆返屋企,我參考 Eldy個樣嚟構圖,再用電烙筆慢慢喺皮上燙啲線條出嚟,原來唔難上手,我有學過鉛筆掃描,兩者都有啲似,用咗 45分鐘就畫好。」
雖然 Ella對自製寵物圖案皮袋十分沉迷,當時只是興趣性質,畢業後,她加入手袋設計公司,希望能了解更多手袋設計的技巧,「我係一個新手,好多嘢都唔識,好似要用 AI畫設計圖,喺學校學到嘅都比較簡單,要重新學起;袋邊縫合位要留幾多?點樣設計先會令個袋起角?點加上水晶等唔同嘅配件?都係一路做一路學。」


現時 6歲的 Eldy,是 Ella在 5前年在街上收養回來,感情十分深厚。 

初期 Ella讓 Eldy的爪上印上顏料,然後在袋上行走,造出有個人特色的手袋防塵袋。 

印有特色爪印的防塵袋已成為限量版, Ella表示已經不會再製作。

只是一個零件


平時 Ella都會用上自己設計的手袋及產品,「用自己設計嘅嘢,真係幾開心㗎!」facebook: PAW PAW 

Ella先後在不同公司擔任手袋設計師,參與近百款手袋的設計,當中包括幾米手袋,但她的心中還是鍾情製作寵物圖案皮袋,「做手袋設計有好多限制,主要係跟住嘅客人要求去做,唔需要自己出主意,自己只係一部大機器嘅一個零件,隨時可以被替換,慢慢返工變成滿足屋企人嘅期待同維持生活,反而自己設計嘅皮袋會得到別人嘅欣賞,整出嚟特別有滿足感。」
13年 9月, Ella決定創立了 PAW PAW,除售賣各款皮袋外,亦有售賣自製玻璃珠手鏈,「朋友不斷鼓勵我拎出嚟賣, Eldy係我嘅靈感來源,貓嘅爪係 Paw,加上賣嘅嘢都係用自己親手製,於是就起咗呢個名。」
為了令更多人認識 PAW PAW, Ella除了參加不同的手作市集外,更自薦上電台節目,「有去唔同嘅手作市集擺檔,好似 JCCAC、太古坊等,自己仲膽粗粗 send email自薦上 903嘅《口水多過浪花》,估唔到成功咗,上完節目後, facekbook嘅 fans數目多咗幾倍,喺節目上現過身嘅貓貓斜揹袋仲即時有人訂,好開心!」

好少俾家人讚

Ella表示訂購寵物圖案皮袋的客人多以送禮為主,「客人多數都係用嚟送畀人,好似男朋友送畀女朋友,媽咪送畀個女等。試過有位家姐見個妹嘅貓貓過咗身,拎張貓貓相畀我整袋,送畀妹妹做紀念,之後家姐講番妹妹收到後感動到喊同好多謝我。其實整袋不時都會俾支電烙筆整親,可能自細好少俾屋企人讚,當有客人讚我同肯定我做嘅嘢,就覺得幾辛苦都值得。」
現時 Ella希望可以一邊工作,一邊慢慢實現自己的夢想,「𠵱家都係想 keep住做設計自己嘅手袋,發展好 PAW PAW,年頭搵到一間鋪寄賣自製嘅手鏈,希望搵到更多嘅店鋪寄賣自己嘅袋,最理想係可以開到自己嘅 workshop。」


一有機會 Ella便申請手作市集,希望讓更多人認識到 PAW PAW,圖為在 JCCAC market擺檔時攝。 

現時在 inBetween有寄賣 Ella手製的玻璃珠手鏈。 

後記︰佔中借口

與 Ella細談下,發現她也支持佔領活動,也吃了幾個催淚彈,「屋企人唔想我參與,但我覺得個佔領行動好值得支持,唔想佢哋擔心, 9月 28日嗰晚,我就話去教人整皮手袋,鼠咗出街,其實去咗金鐘。」要實踐過,先知夢想可不可行。


Alex客人喺電台聽到 PAW PAW,上網見隻貓貓真係畫得好似,女朋友見到好鍾意,於是就買咗兩款斜揹袋送畀佢,佢收到都好開心。 

今年 9月, ZALORA marketplace與 Ella合作,讓她的作品放在網頁內售賣。 

點入行?

若有興趣入行,可以先修讀設計課程, Ella表示坊間亦有些短期的手袋設計課程,讓有興趣人士事先裝備自己,了解手袋設計的概念。對於初入行的面試, Ella有一些建議,「見工時不妨帶自己嘅作品,可以增加面試成功機會。記得見第一份工時,我帶咗自己設計嘅袋,請咗我之後,老闆講番雖然手袋整得有啲粗糙,但見我真係好有 heart,於是決定畀個機會我。」

課程資料

課程:創意手袋設計及營銷管理文憑課程
機構:香港生產力促進局生產力培訓學院
對象:有興趣人士
學費:$13,860
堂數: 30堂,共 90小時。
內容︰分析手袋結構、設計理論、電腦軟件繪圖、分析手袋業的發展、手袋商品化、了解生產工序等。
查詢︰ http://www.hktrainingonline.com 

晉升階梯
高級設計師(4年或以上經驗)
$20,000或以上

設計師(2年或以上經驗)
14,000至 18,000

助理設計師(1年或以上經驗)
$9,000至$11,000


撰文:曾志恒
攝影:楊晴、傅新發
部分圖片由被訪者提供
場地提供: inBetween( inBetweenshop.com)、寵物茶餐廳( 2648 8999)

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()