新車激試

轉款意義  MINI Cooper S 5-Door& MINI One 1.2 Twin Power Turbo

Ads by Google

2000年開始推出嘅 New MINI,今年已經推出到第 3代。不過香港上市 3個月,街上嘅流通量都好似唔及上兩代初推出時咁高。無他,鐘意 Classic Mini嘅覺得佢愈來愈唔似樣;追求新鮮感嘅又認為同前兩代差唔多款……
其實 New MINI出咗成 14年,已經唔係齋賣樣,車型發展到有 7種咁多,再唔係一款車,而係一整條 product line。而且今代再加多一款五門版 MINI 5-Door之外,三門嘅 MINI One平價版亦換上前所未有咁細嘅 1.2公升 turbo偈,提供多一種全新 go-kart駕駛樂趣。姑勿論覺得第 3代 MINI個樣點,就算當佢係普通揭背車仔,都有足夠吸引力令人換車!

身形定身價

可能大家對第 3代 MINI都未係太熟悉,其實就算三門版車身都已經比上代長 98mm、闊 44mm、高 7mm,軸距都多咗 28mm,車身愈來愈唔迷你,所以 MINI One入門版都已經唔算細部。不過同場嘅 MINI 5-Door五門版就更加誇張,拉長加多兩隻門之後,車身再比三門版長 161mm同高 11mm,軸距更大幅加長 72mm。加咗大包圍嘅 Cooper S型號車身已長達 4,005mm,即係仲大部過 Honda Jazz!不過因為五門版完全套用三門版嘅外形設計,所以睇落絕對唔覺係咁巨型。只係因為車身闊度冇改變之下,觀感好似高身咗啲。而車廠亦下咗唔少工夫,為五門版車頂加上類似 Countryman嘅凸起骨位,尾擋風玻璃亦變成孤形,令加大碼身形都可以保持 sporty。

 

MINI Cooper S 5-Door spec.
引擎: 1,998c.c.直四 turbo
馬力: 192hp/4,700-6,000rpm
扭力: 28.6kgm/1,250rpm
傳動: 6前速自動、附+/-模式
車身: 4,005 x 1,932 x
1,425(mm)
車重: 1,315kg
耗油: 5.9L/100km
0-100km/h: 6.8秒
售價:約$373,800
查詢: MINI Center(3193 6800)

MINI One spec.
引擎: 1,198c.c.直三 turbo
馬力: 102hp/4,250-6,000rpm
扭力: 18.4kgm/1,400-4,000rpm
傳動: 6前速自動、附+/-模式
車身: 3,821 x 1,727 x 1,414(mm)
車重: 1,195kg
耗油: 4.8L/100km
0-100km/h: 10.2秒
售價:$228,800
查詢: MINI Center(3193 6800)


Cooper S型號(左)原裝頭燈已有 LED外框,大燈同霧燈亦係 LED,但 One型號只用傳統燈膽。 

原裝 Cooper S(左)車側指揮燈同鬼面罩都有電鍍裝飾,但 One就冇,不過其實 Cooper型號都係冇嘅。 

Cooper S(左)原裝配 205/45R17胎軨,但 One只係用 15吋軨,仲要配最地獄嘅 175/65R15窄身韓國胎。

 

車身大咗,車價自然貴啲,所以 MINI Cooper S 5-Door車價比三門 MINI Cooper S貴咗約$15,000,但已經算好抵。因為舊時要買五門 MINI只有 SUV型嘅 Countryman,如果同係 Cooper S型號就要成$437,800,家陣 MINI Cooper S 5-Door只係約 37萬!不過吸引力仍然唔及 MINI One,因為外形上只係比以前最入門嘅 MINI Cooper少咗啲 LED燈同雙色車頂,但車價就平成$36,000!橫掂買得 MINI嘅人都鐘意改吓車,慳咗嘅錢已經夠換套極惡大包圍!

車系急擴張

2004 MINI Convertible
04年第一代 New MINI facelift時就第一次出變種版 Convertible,好似以前 Classic Mini改裝開篷版咁,換上軟篷頂,特別在軟篷有兩段式電動開關,唔開晒都可以當天窗咁淨係開前半部車頂。

 

2007 MINI Clubman
07年 New MINI用咗 Clubman個名喺新推出嘅旅行車版,外形好似 Classic Mini嘅 Countryman旅行版咁拉長車身同用對開式尾門,但右邊車側就加多一隻對開式後座車門。

 

2010 MINI Countryman

 

2011 MINI Coupe
同 Classic Mini冇關係嘅 Countryman都大賣, 12年就推出更大膽嘅跑車版 Coupe,車頭車尾都用番揭背版設計,最有型係換上一個超扁嘅孤形「 cap帽」頂同變成雙座位,仲有電子升降尾翼。

 

2012 MINI Roadster
Coupe推出一年後,簡單地將車頂變成軟篷,就推出咗雙座位開篷版 Roadster,成為 New MINI車系中第二款開篷車。

 

2013 MINI Paceman
運用母公司 BMW X6嘅跑車、 SUV混合體設計,將 Countryman車身㩒扁,取消後座車門變三門,再換上向後斜嘅流線車頂,就變身成罕有嘅小型 Sports Activity Coupe。

設備大對比

作為精品小車,特別係出名多嘢玩嘅 MINI,其實設備已經勁過 BMW 3系!但有幾多設備都係錢作怪,因為大部分都可以 option加。 Cooper S係最齊料嘅型號,呢部 MINI Cooper S 5-Door仲加咗唔少 option,當然目不暇及,但究竟車價相差 14萬有多嘅最齋 MINI One型號有幾齋?原來都唔算好地獄,起碼 keyless go按掣著車、 6速+/-波、停車熄匙系統同 Carbon裝飾等都齊晒,連今代最大特色嘅中控台同門板 6色 LED氣氛燈都有埋,只係唔識自動變色啫!
至於 MINI Cooper S 5-Door多出嘅皮座、前座手枕、白色花紋裝飾、雙區恆溫冷氣、藍牙免提、雨點感應水撥等,筆者都覺得可有可無,最吸引都只係個 8.8吋彩 mon.同自動變色 LED,但 MINI One加$7,000一樣可以加裝。而且拍攝嘅 MINI Cooper S 5-Door車上好有型嘅投射表板、天幕頂同後波鏡頭,其實都係要加錢買嘅。所以兩車喺裝備上,其實並唔算天與地咁大差別,如果攞 MINI One同 MINI Cooper型號比,分別會更少,可見車價平咗都唔代表 cheap!

MINI One 1.2 Twin Power Turbo

 


後座載兩個成人其實頭部同肩部都唔會頂,不過前座要推前少少後座先會唔頂腳。 

布料座椅都好厚實舒服,包圍力亦唔差,仲好細心咁用漸變彩色縫線。 

圓形框入面個單色 mon.只得 4行顯示,而且只可以用下面銀色旋鈕控制。

冷氣連溫度顯示都冇,好在按掣著車同停車熄匙系統仍然保留。 

中控台用單色細 mon.都影響唔大,最慘係軚盤冇包真皮,手感唔好同跣咗啲。 

原本只有 211L容量嘅尾箱好淺,手提行李箱都要側身擺,要擺大件少少嘅嘢就要摺後座擴至 731L。 

 

MINI Cooper S 5-Door


中控台既有 Visual Boost套裝嘅 8.8吋彩 mon.同自動變色 LED,又有軚盤遙控掣,不過白色 Off-White花紋裝飾要另加$3,800。 

尾箱容量比三門版多 67L達 278L,摺埋後座仲可以擴至 941L,同級車仔都係差唔多。 


前座真皮桶 seat上下半部有菱形暗花,腰部包圍特別強,座墊前端仲可以拉出調校。 

後座變成三座位,但地台中間仍有高大凸槽同杯架,載三個成人會好迫。 

無論 Cooper S、 Cooper定 One原裝都冇天幕頂,要加$14,000追加。 

原裝已用雙區恆溫冷氣,連冷氣掣表面都有顯示屏。 

空間剛剛夠

MINI從來都係 sell有型,就算車身長過 Jazz同有五隻門,都冇可能同你鬥空間,所以 MINI Cooper S 5-Door車廂並冇想像中咁闊落。數據上,延長 72mm嘅軸距完全反映喺後座腳位,同樣增加咗 72mm。而且後輪摃移後咗,後座可以降低啲同闊落啲,車身只係升高 11mm,但車廂頭部空間就多咗 15mm。同時後座肩部空間多咗 61mm,所以由三門版嘅兩座位變成三座位,連尾箱空間都多咗約 30%。
不過 5尺 8吋肥大身形嘅筆者實際試坐,後座空間亦只係啱啱夠。同三門嘅 MINI One比,最大分別係對腳唔使再貼住前座椅背,但亦稱唔上闊落。而且如果要坐足三個成人肩部空間亦一定唔夠,有兩個一定要打側身坐,頂多只可載兩大一細。值得一讚係後座門框雖然唔闊,但勝在車門開啟角度夠大,上車唔算困難,加上有 option可以加天幕頂令空間感提高。如果成日要載大班朋友周圍去就未必啱使,但小家庭就夠晒用。


入門 One型號都唔慳皮,照樣有金屬門檻。 

原裝門板只有手抽同儲物格有 LED燈光, Cooper S裝咗 Off-White花紋裝飾底下就多咗一條過 LED燈。 

變五門對手多

本來 MINI喺香港冇對手,因為大部分代理都唔會引入小型車嘅三門版,但 MINI Cooper S 5-Door脹大同變五門後,就同賣咗幾年嘅歐洲小型五門車正面對撼,花臣當然贏晒,但對手車價就平得多!

 

又勁又慳  Ford Fiesta
Fiesta其實已推出多年,最初引入嘅只有五門揭背版,但舊代理嘅定價唔吸引,令到銷量一般。不過轉新代理後即引入採用 182匹、 1.6公升 turbo引擎嘅 3門版 Fiesta ST,就算只得 6速手波,但$199,900實在太吸引,結果當然大賣。而五門版 facelift時轉用歐洲攞晒獎嘅 100匹、 1.0公升 turbo引擎,車價只係$169,900起。

 

剛剛換偈  VW Polo
Polo可以話係 VW最入門小車,全世界都大賣,所以車廠唔單只為佢設立最強 GTI版本,入門型號最近更換上 90匹、 1.2公升 turbo引擎,廢排同耗油進一步降低,車價更低到$173,880起。 GTI版本就完全唔同取向,改用三門車身,引擎亦改 180匹、 1.4公升 turbo款式,威力係普通版 2倍!

 

地上最強  Audi A1
A1同 Polo共用底盤已經唔係秘密,不過 Audi又點會翻炒 Polo? A1由外至內都更高級,最早引入嘅只有三門版,現時本港市場已由五門 Sportback版取代。版本方面,分 122匹、 1.4公升 turbo版及 185匹、 1.4公升 Twin Charge版,車價由$294,800起。 A1最頂級版本改名為 S1,同樣用 Sportback外表,但改用 231匹、 2.0公升 turbo引擎,再加埋四驅同 6速手波,同級中無敵手。

好劈到飛起

之前已經試過今代由 1.6公升 turbo升級成 2.0公升 turbo嘅 MINI Cooper S,變咗做五門版重咗 65kg, 192匹馬力嘅性能表現都分別都唔大,已經追上大一個碼嘅 hot hatch。不過有三門版同場測試,就可以試得出車架反應同車尾嘅靈活性降低咗少少,喺大帽山嘅 S彎切入冇咁 sharp、大油出彎車尾亦有少少拖住,但分別只係好輕微,仍然可以保持嗰份 go-kart直接操控感。
其實今次試車嘅重點並唔係 MINI Cooper S 5-Door,而係成個 BMW集團首次出現、喺 MINI One身上嘅 1.2公升 turbo引擎!原來呢副偈係由 MINI Cooper副 1.5公升 turbo偈降低排氣量而來,同樣係直三設計,有齊 double-VANOS同 Twin Power turbo技術。本來數字上少咗 34匹同 4kgm以為性能會好普通,但一開車就嚇咗一跳!因為 18.4kgm最大扭力低至 1,400rpm已經發揮,起步估唔到咁爽。雖然大腳踩油要等一陣先有反應,但引擎一過 3,000rpm就突爆,現代 turbo車消失咗嘅 turbo lag爆炸力重現,彈出嗰吓令人 high到震!而且愈踩高轉踩好爆,絕對唔似得 102匹咁少。
不過最值得推祟嘅都唔係副偈有幾勁,而係完全 under control嘅馬力配合輕量化車身嘅 go-kart駕駛樂趣,令人有超高滿足感!雖然速度唔夠 MINI Cooper S 5-Door快,但個人覺得 MINI One更加好玩,而且耗油只係 4.8L/100km,油費$0.8/km有找。有型、慳油、好飛、車價平,可以話係 New MINI推出以來吸引力最高嘅型號!

MINI One

 


102匹 1.2公升 turbo技術同 Cooper嘅 1.5公升 Twin Power turbo偈一樣,雖然 c.c.細咗同耗油多咗 0.1L/100km,但加速感仍然好爽,而且 turbo lag較明顯,爆 turbo嗰吓更過癮! 

6速 Steptronic波箱全車系通用,但喺 192匹嘅 Cooper S身上轉波反應會慢少少,用喺得 102匹嘅 One身上反而更快更暢順。 

今代 MINI表板搬返去軚盤前面易睇啲,而且咩版本表板款式都一樣,速度計下有大 mon.。

MINI Cooper S 5-Door

 


192匹 2.0公升 turbo偈嘅 28.6kgm扭力低到 1,250rpm就出晒,所以 Cooper S五門版重咗 65kg, 0-100km/h加速時間 6.8秒都只係慢咗 0.1秒,同埋耗油多咗 0.1L/100km。 

Cooper S型號原裝已有類似 iDrive嘅多媒體控制器,而且波棍台個框多咗 Sport、 Normal同 Green駕駛模式掣。 

投射表板屬 option,要加成$10,000,但除速度外仲可以顯示文字提示。

1.2公升增壓潮

近年引擎潮流又開始興返玩細 c.c., MINI One已經唔係先鋒,因為 VW早兩年已經開發出 1,197c.c.直四 turbo偈,用喺 Golf同 Beetle身上有 105匹同 17.9kgm,用喺 Polo身上有 90匹同 16.3kgm。
另一方面,日本車廠 Nissan仲犀利,早兩年為 Note開發出 98匹 1,198c.c.直三 supercharged引擎之後,最近又為 Juke整多副 116匹 1,197c.c.直四 DIG-Turbo引擎。不過筆者先後試過晒咁多副 1.2細偈,仍然覺得 MINI One呢副最生猛!


VW嘅 TSI系列引擎有齊 2.0、 1.8、 1.4同 1.2公升,最細嘅連 1.0公升 turbo都有! 

Nissan不斷嘗試新款細 c.c.引擎,最新就有 1.2公升 DIG-Turbo,唔只 Juke,連大一個碼嘅 Qashqai都有用。 

撰文:陳致新
攝影:葉偉豪

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()